Ruma 9:7 - Manobo Western Bukidnon

⁷ Is langun he egngezanan he menge kevuwazan ni Abraham, kenà daan langun te sikandan ed-isipen te Megbevayà he tutuu he menge kevuwazan ni Abraham, he ke và dà egkeg̵iya, kenè dan is langun ebpekezawat te impenaad te Megbevayà. Su migkag̵i zengan is Megbevayà diyà te ki Abraham, ke sikandin te, “Pinaag̵i zà ki Isaak is tutuu he kevuwazan nu.”

Ruma 9:7 Кръстосани препратки

Mateo 3:9

Ne kenè niw iyan serig̵i is kevuwazan kew ni Abraham su wazà dutun pulus diyà te Megbevayà. Su egkeg̵iyan ku sikiyu he emun iyan egkinehenglanen te Megbevayà, egkehimu he ebeelan din heini is menge vatu he kevuwazan ni Abraham.

Lucas 16:30

Ne midtavak haazà is sepian te, ‘Kenè dan, Apù, haazà ebpemineg̵en, iyan, emun duen minatey he egkevanhew he edhendiyà te kandan, ne ed-iniyug̵an dan is memezaat he ulaula zan.’

Lucas 3:8

Emun tutuu he mid-iniyug̵an niw is memezaat he ulaula, ipeehè niw pinaag̵i te menge meupiya he vaal niw. Ne kenè niw iyan serig̵i is kevuwazan kew ni Abraham su wazà dutun pulus diyà te Megbevayà. Su egkeg̵iyan ku sikiyu he emun iyan egkinehenglanen te Megbevayà, ne egkehimu he ebeelan din heini is menge vatu he kevuwazan ni Abraham.

Juan 8:33

Ne midtavak dutun is menge punuan te, “Iyan kepuun dey si Abraham, ne wazè key meuripen te minsan hentei; maan is migkag̵i nu he egkevelukasan key?”

Gelasya 4:23

Is ked-enaka te anak te vahi he uripen, ne iring ded te ked-enaka te minsan hengkey he vatà, iyan, kes ked-enaka zutun te sevaha he in-anak te vahi he kenà uripen, ne kenà egkehimu emun wazà ipenaad te Megbevayà diyà te ki Abraham.

Gelasya 4:28

Na, menge suled, iring din ded daan, nehimu kiw en he menge anak te Megbevayà tenged te netuman din is penaad din. Iring heini zuen te ked-enaka ki Isaak ni Sara tenged te netuman is pesarig te Megbevayà diyà te ki Abraham.

Pilipus 3:3

Iyan kiw kes tutuu he menge sakup te Megbevayà, ne kenà iyan sikandan, su pinaag̵i te Wag̵as he Mulin-ulin ed-azap kiw te Megbevayà ne edlipey kiw tenged te upakat tew ki Jesu Kristu. Ne kenè tew iyan edserig̵an is kelibutanen he ulaula iring te kebpesirkunsidar.