Ruma 9:30 - Manobo Western Bukidnon

³⁰ Ne iyan ibpesavut ku kayi is: is menge etew he kenà menge Hudiyu, minsan pa te wazà metag̵ù diyà te isip dan he egkehimu he meisip sikandan he metazeng te Megbevayà, duen menge zuma kandan he pinaag̵i te kedtuu zan mid-isip sikandan gihapun he metazeng.

Ruma 9:30 Кръстосани препратки

Ruma 10:10

Su pinaag̵i te isip ta ke edtuu ki ed-isipen ki te Megbevayà he metazeng, ne zutun ebpenudtulen ta ziyà te zuma is kedtuu ta ne human egkeheg̵et is kedlibriya kenita te silut.

Ruma 10:20

Ne keladu pa utew is Lalag te Megbevayà he impenudtul zengan ni Esaias su edhenduen te, “Neturedu a te menge etew he kenà ebpen-ahà kedì, ne minsan ke wazè e zan iinsà, impesavut ku kandan ke hentei a,” ke sikandin.

Ruma 10:6

Iyan, mehitenged te kebpeketezenga te etew he egkehimu pinaag̵i te kedtuu, duen daan insurat he lalag he edhenduen te, “Kenè niw isipa he wey ki zà ed-isipa te Megbevayà he metazeng ke zuen edhendiyà te langit wey meveyai si Kristu,

Ruma 3:5

Ne zuen menge pilusupu he etew he egkag̵i te, “Emun ed-ulaula ki te mezaat, meupiya zaan haazà su emun egkeisip te menge etew is menge ulaula ta he mezaat, wey is menge ulaula te Megbevayà, siguradu egkesavut dan he utew mulà meupiya is menge ulaula te Megbevayà ne ebpekezalig dan te Megbevayà, ne utew haazà meupiya. Ne emun,” ke sikandan, “nehimu is meupiya tenged te mezaat he mid-ulaula ta, kenà metazeng is kedsiluti kenita te Megbevayà tenged te mid-ulaula ta he mezaat.” Ne pilusupu is menge lalag he iring kayi.

Ruma 4:11

Umba mibpesirkunsidar sikandin su nehimu is kedsirkunsidar he tuus diyà te lawa zin he mid-isip te Megbevayà sikandin he metazeng tenged te kedtuu zin dutun te wazè pa sikandin sirkunsidara. Ne nehimu si Abraham he kepuun tew, he ke và dà egkeg̵iya, egkeiringan te langun he edtuu, minsan te wazà sikandan sirkunsidara. Umba edtuu zan su wey isipa te Megbevayà sikandan he metazeng.

Ruma 4:13

Dengan dà impenaad te Megbevayà ki Abraham wey te menge kevuwazan din he iyan sikandan ebpekevayàbayà te tivuuk he menusiyà. Umba impenaad heini, kenà tenged te midtuman ni Abraham is kesug̵uan, kekenà, tenged te midtuuwan ni Abraham is Megbevayà, ne tenged kayi te kedtuu zin mid-isip te Megbevayà sikandin he metazeng.

Ruma 4:22

Ne tenged dutun te kedtuu ni Abraham, insurat dengan he mid-isip te Megbevayà sikandin he metazeng.

Ruma 4:9

Ne heini is kegkezeyzey he migkag̵i ni David, wazà heini ituvad kayi zà te kenami te menge Hudiyu, kekenà, intuvad daan diyà te menge etew he kenà menge Hudiyu. Su sumalà te nekag̵i ku en, si Abraham, midtuu sikandin te Megbevayà ne tenged dutun te kedtuu zin mid-isip te Megbevayà sikandin he metazeng.

Ruma 5:1

Guntaan, tenged te midtuu ki en ki Jesus, mid-isip ki en te Megbevayà he metazeng he iring te wazè ki keenu mekesalà, ne tenged kayi pinaag̵i te mid-ulaula te Nengazen tew he si Jesu Kristu melinew en is kedepitè tew te Megbevayà.

Ruma 9:14

Ne egkehimu he zuen egkag̵i he kenè bes metazeng is paag̵i te Megbevayà su zuen ibpelavi zin. Iyan, kenà iyan haazà ibpesavut ku.

Ruma 9:31

Iyan, is menge kevuwazan ni Israyil, kunaan dan ke egkehimu sikandan he metazeng pinaag̵i te kedserig̵i zan te kedtumana te kesug̵uan, ne nasì wazà heini mehimu.

Gelasya 2:16

Ne minsan pa zutun, netuenan ta he kenè ki egkeisip he metazeng te Megbevayà pinaag̵i te kedtumana ta te kesug̵uan he imbilinbilin ni Moises, kekenà, pinaag̵i zà te kedsarig ta ki Jesu Kristu. Sikita is Hudiyu, nekesarig ki zaan ki Jesu Kristu su wey pinaag̵i te kedtuu ki Jesu Kristu meisip ki zaan te Megbevayà he metazeng. Netuenan ta he kenà heini egkehimu pinaag̵i te kedtumana te kesug̵uan. Su wazà minsan hentei he ed-isipen he metazeng te Megbevayà tenged te kedtumana zin te kesug̵uan.

Gelasya 3:24

Nehimu zaan is kesug̵uan he iring te ed-uyamu he iyan ebayàbayà kenitew te iring te menge vatà taman dà te kebpekeuma ni Kristu su wey, ke ebpekeuma si Kristu, meisip kiw te Megbevayà he metazeng pinaag̵i te kedtuu tew kandin.

Gelasya 3:8

Daan he migkag̵i is Megbevayà diyà te insurat he lalag din he minsan is menge etew he kenà menge Hudiyu, ne ed-isipen din sikandan he metazeng emun edtuuwan dan sikandin. Impesavut din he zaan ki Abraham is Meupiya he Tudtulanen, ke sikandin te, “Tenged te midtuu ka te migkag̵i ku, midtuvazan ku sikew. Ne pinaag̵i zaan kayi te kedtuu nu edtuvazan ku is tivuuk he menusiyà dini te kelibutan.”

Gelasya 5:5

Iyan, sikami mulà, pinaag̵i te g̵ehem te Wag̵as he Mulin-ulin wey tenged te kedtuu zey kandin, iyan ebpeebuten dey is kedhimuwa kenami he metazeng te Megbevayà.

Ipisu 2:12

Netuenan niw he zengan wazè niw upakat ki Kristu ne wazè kew iragkes te menge etew he pinilì te Megbevayà. Wazè kew zaan mekeambit duen te menge meupiya he impenaad te Megbevayà kandan. Wazà egkepaabut niw he tavang te Megbevayà ne kenà duen dà taman su wazè niw metueni ke hentei is tutuu he Megbevayà dini te kelibutan.

Pilipus 3:9

su wey a zaan meisip te Megbevayà he metazeng tenged ki Kristu. Wazà a meisip he metazeng pinaag̵i te kediey zà he ulaula te kedtumana te kesug̵uan, su mibpeketazeng a te Megbevayà pinaag̵i te kedtuu ku ki Kristu. Heini is kebmetazeng, ne idtuvad kenita te Megbevayà emun edtuu ki ki Kristu.

1 Timoteo 6:11

Ne sikew mulà, sulug̵uen ka te Megbevayà; likayi nu is langun he iring kayi he menge ulaula. Hemeni nu is metazeng he ulaula, is kedtumana te egkesuatan te Megbevayà, is kedsarig kandin, is kegkeg̵eg̵awi nu te menge zuma nu, is kebmeinentusen te menge supak dan, wey is kelinew te ulaula nu.

Hibriyuhanen 11:7

Ne zuen daan kedtuu ni Noe su hein midleg̵uyan sikandin te Megbevayà te limas he egkehitavù, midtuuwan din, minsan te wazè din pa maahà haazà is limas. Ne mibeelan din is dekelà he avang he egngezanan te arka ne hein midlapey is dag̵at, nelibri sikandin wey is pemilya zin ne wazè dan melened. Ne pinaag̵i zutun te kedtuu zin, impesavut din he zait he edlimasen te Megbevayà is tivuuk he mekesesalà he menusiyà. Ne zutun mid-isip sikandin te Megbevayà he metazeng tenged te midtuuwan din is migkag̵i te Megbevayà.

1 Pedro 4:3

Su kinahanglan he kenè niw en maan ul-ulaha sikan is mezaat he ed-ul-ulahan he egkesuatan te menge etew he wazà medtuu te Megbevayà. Su zengan meremerik is ulaula niw; mezaat is egkesuatan te lawa niw; lelenguten kew ne mezaat is kelenganan he ibpelepew niw ziyà te menge keemuran he zutun kew ebpenginum. Utew kew egkeepesi te Megbevayà su kenà tutuu he megbevayà is ed-ezapen niw.