Ruma 8:7 - Manobo Western Bukidnon

⁷ Emun ebeyveyaan is isip te etew te menge mezaat he kebayà te lawa zin, kuntada sikandin te Megbevayà su kenè din edtumanen is menge sug̵ù te Megbevayà. Ne kenà duen dà taman su kenà egkehimu he egketuman din.

Ruma 8:7 Кръстосани препратки

Mateo 12:34

Iring din ded daan kayi te keniyu. Wazà meupiya he egkekag̵i niw su memezaat is ulaula niw. Iring kew te menge uled su ebpekekaid kew! Is diyà te g̵ehinawa te etew, iyan edlepew ziyà te vèbè din.

Mateo 5:19

Umba ke zuen minsan hentei he edlegkawen din is minsan utew zà deisey zuen te kesug̵uan ne ibpenurù din te zuma zin he kenà tumana haazà is midlagkew zin, iyan sikandin utew minus is pid-etawan din ke edhadì is Megbevayà he ziyà te langit. Ne iring din daan ke zuen etew he edtumanen din ebpurungi is kesug̵uan ne ibpenurù din diyà te zuma is kedtumana kayi, iyan sikandin lavew te langun he etew ke edhadì keuzemà is Megbevayà.

Juan 7:7

Kenè kew egkepeukan te menge etew he kuntada te Megbevayà, iyan, siak, egkepeukan e zan mulà su pinaag̵i te ibpenurù ku egketuenan he mezaat is menge ulaula zan.

Ruma 1:28

Ne g̵eina te egkeg̵iyen dan he wazè en pulus te kedtuuwi te Megbevayà, mid-iniyug̵an sikandan te Megbevayà ne tenged kayi iyan ebayàbayà kandan is kelelalung he netag̵ù diyà te isip dan ne ed-ul-ulahan dan is kenà hustu.

Ruma 1:30

ne edsudien dan is menge zuma zan. Menge kuntada sikandan te Megbevayà. Ne wazè dan kedtahud te minsan hentei. Ebpelavew zan ne edantal zan. Utew zan metau he ed-isip te menge veg̵u he paag̵i te kebaal te mezaat. Kenè dan ebpemineg te menge g̵inikanan dan

Ruma 3:31

Ibpesavut ku he iyan dà ketezengan ke maan is ed-isipen ki zin he metazeng is kedtuu ta, iyan, kenè niw isipa he tenged kayi wazè en pulus te menge sug̵ù te Megbevayà su tenged te kedtuu ta ki Jesus, hustu en dutun is kegketumana ta te menge sug̵ù din.

Ruma 5:10

Su zutun te timpu zengan he kemulu ki kuntada te Megbevayà, tenged te kebpehimatey te Anak din, nehimu ki he emig̵u zin. Ne emun iyan haazà, guntaan te emig̵u ki zin en, wey ki pe be kenà mehimu he melibri keuzemà te silut tenged te nevanhew en sikandin.

Ruma 7:22

Ne sumalà is egkesuatan te g̵ehinawa ku, utew ku pezem egkesuati is kedtumana te egkesuatan te Megbevayà.

Ruma 8:4

Umba mid-ulaula heini te Megbevayà su wey ki meketuman te hustu sumalà is insug̵ù te kesug̵uan. Ne egkehimu heini su wazè en kinahanglan he edtumanen ta is mezaat he suat te lawa ta, kekenà, ebpeketuman ki te hustu su edtevangan ki te Wag̵as he Mulin-ulin.

1 Kurintu 2:14

Ne is etew he wazà diyà te kandin is Wag̵as he Mulin-ulin, kenè din edewaten is ibpenurù te Wag̵as he Mulin-ulin su wazà pulus kayi ziyà te kandin, ne kenè din daan egkesavut su iyan dà ebpekeseysey kayi ziyà te kandin is Wag̵as he Mulin-ulin.

1 Kurintu 9:21

Ne ziyà te menge etew he kenà menge Hudiyu, emun iyan sikandan menge zuma ku ne kenè ku en maan ed-ul-ulahan is kesug̵uan he ebentayan te menge Hudiyu su ed-ul-ulahan ku is menge ulaula te kenà menge Hudiyu su wey ku sikandan maag̵ak ne ebpeketuu zan ki Jesus. Wazè ku engkezi is menge sug̵ù te Megbevayà su edtumanen ku is menge sug̵ù ni Kristu.

Kulusas 1:21

Kenè kew zengan menge emig̵u te Megbevayà, kekenà, menge kuntada kew zin su layun mezaat is menge isip niw wey ulaula niw.

Kulusas 2:18

Duen daan menge etew he egkag̵i he lavew sikandan tenged te zuen kun menge egkein-inuwan he impaahà kandan wey tenged te kenè dan mepelevawen. Ne ibpenurù dan he kinahanglan he ebpekeazap ki te menge velinsug̵uen te Megbevayà ziyà te langit. Kenè niw, menge suled, itetenged is kedsudì dan keniyu su is iring dutun he etew, ne ebpezalig dà, iyan, wazà hustu he ketezengan te kebpezalig dan su iyan ebayàbayà te isip dan is kelibutanen he kebayè dan.

2 Timoteo 3:4

Menge men-aakal sikandan; kenè dan ed-isipen ke hengkey is egkeulaula tenged te kelelalung dan. Menge gelbuwen sikandan. Iyan dan ibpelavi is kelibutanen he kelipey kenà is kebmahala zan te Megbevayà.

Hibriyuhanen 8:10

Ne mid-uman megkag̵i is Nengazen te, “Is beg̵u he paag̵i he edtukuzen ku wey ku mezawat is menge kevuwazan ni Israyil, ne iyan heini: is menge sug̵ù ku, ne idsurat ku ziyà te g̵ehinawa zan wey ziyà te isip dan ne egkesuatan dan human te edtuman heini. Ne human a egkehimu he Megbevayà dan ne egkehimu sikandan he menge g̵aked ku.

Santiago 4:4

Kenè kew metinumanen te pesarig niw ziyà te Megbevayà. Wazè niw ves metueni he emun iyan niw egkesuatan is mezaat he ed-ul-ulahan te menge kuntada te Megbevayà dini te kelibutan, ne menge kuntada kew zaan te Megbevayà. Is minsan hentei he iyan egkesuatan din is mezaat he ulaula zini te kelibutan, mibpekigkuntada sikandin te Megbevayà.

2 Pedro 2:14

Egkeerig̵an dan te minsan hentei he vahi; kenà egkepenù is suat dan te mezaat he ulaula. Ebpeeyatan dan is menge etew he kenè pa ebpekesavut te hustu. Utew zan leg̵ezen, iyan, kenà egkehimu he kenà sikandan egkesilutan te Megbevayà.