Ruma 8:28 - Manobo Western Bukidnon

²⁸ Sikitew is langun he mahal is Megbevayà diyà te g̵ehinawa zin, sikitew is midhimu zin he meketuu sumalà is tuyù diyà te isip din, netuenan tew he pinaag̵i te minsan hengkey he egkehitavù kenitew, edtuvazan kiw zin gihapun te meupiya.

Ruma 8:28 Кръстосани препратки

Marcos 12:30

Kinahanglan he iyan nu sikandin mahala ziyà te g̵ehinawa nu is Megbevayà he Nengazen tew. Iyan nu sikandin mahala ziyà te g̵ehinawa nu, isip nu, kedsavut nu wey tivuuk he ulaula nu.’

Nengeulaula 13:48

Ne hein nezineg haazà te menge etew zutun he kenà menge Hudiyu, nengelipey zan utew ne mibpeselematan dan is impesavut kandan te Nengazen. Ne is langun he menge etew he imbanglis kandan te Megbevayà is untung he wazà pidtemanan, nemeketuu.

Ruma 11:29

Su kenà egkehalinhalin is ed-isipen te Megbevayà, kekenà, is ebpilien din he menge etew, ne iyan daan edtuvazan din te meupiya.

Ruma 8:30

Ne zutun, sikitew is langun he mibpilì din wey mehimu he menge anak din, impetuu kiw zin daan. Ne kenà duen dà taman, su mid-isip kiw zin daan he metazeng he iring te wazè kiw mekesalà. Ne impenaad din daan he zuen timpu keuzemà he edtulusen kiw zin.

Ruma 9:11

Ne si Rebecca, hein meg̵aan en ed-anak, migkeg̵iyan sikandin te Megbevayà, ke sikandin te, “Sulug̵uen is kakey te hazi zin.” Migkag̵i zin heini te wazè pa ianak haazà is sereping, ne wazè pa ulaula zan he mezaat wey meupiya. Ne umba neulaula heini su ibpesavut te Megbevayà he is kebpilia zin te menge etew, ne kenà tenged te menge meupiya he ulaula he nehimu zan, kekenà, tenged dà te iyan egkesuatan din.

1 Kurintu 1:24

Iyan, is minsan hentei, Hudiyu se Gerisyahanen, emun ebpemineg dan te Megbevayà dutun te kebpetuuwa zin kandan, netuenan dan he pinaag̵i te kedrensanga ki Kristu impezayag te Megbevayà is gehem din wey ketau zin.

1 Kurintu 1:9

Is Megbevayà, egkeserig̵an tew is lalag din, ne iyan sikandin mibpetuu kenitew wey kiw mebpekid-upakat ki Jesu Kristu he iyan Anak din wey iyan Nengazen tew.

1 Kurintu 2:9

Ne tenged kayi iyan ibpenurù dey is insurat dengan he Lalag te Megbevayà he edhenduen te, “Is utew meupiya wey egkein-inuwan he wazè pa maahà wey wazè pa mezineg te menusiyà wey wazè pa meisip te minsan hentei he etew, ne iyan heini mid-andam te Megbevayà he ibeg̵ey zin diyà te langun he menge etew he mahal sikandin diyà te g̵ehinawa zan.”

2 Kurintu 5:1

Is lawa ta, ne iring te valey he egkeubpaan ta. Ne netuenan ta he ke egkerundus heini is baley, duen baley he egkeubpaan ta ziyà te langit he iyan is beg̵u he lawa he ibeg̵ey te Megbevayà. Kandin he vaal heini ne wazè din pidtemanan.

Gelasya 1:15

Ne minsan pa zutun, ingkeg̵ag̵ew a te Megbevayà ne mibpilì e zin he sulug̵uen din te wazè e pa ianak ne nehimu zin he meketuu a kandin.

Gelasya 1:6

Utew ku sikiyu igkeinuinu su wazè en utew meug̵et ne henduen be te nahalin en is kedtuu niw, ne is Megbevayà he iyan mibpetuu keniyu pinaag̵i te g̵ag̵ew ni Kristu, ed-iniyug̵an niw ne edtuuwan niw is selakew he tuluuwen he egngezanan daan te menge etew he Meupiya he Tudtulanen.

Gelasya 5:8

Kenà heini vaal te Megbevayà is kebpekesuwey niw su iyan mid-umbita keniyu wey kew meketuu.

Ipisu 3:11

Umba mid-ulaula zin heini su edtumanen din is mid-isip din dengan te wazè pa limbag̵a is minsan hengkey. Ne nehimu zin en heini g̵untaan pinaag̵i te Nengazen tew he si Jesu Kristu.

Ipisu 4:1

Ne tenged kayi te langun, siak is pirisu tenged te midtuman ku is menge sugù te Nengazen, edhengyuan ku sikiyu he g̵eina te midhimu kew te Megbevayà he menge tumutuu zin, ul-ulaha niw is ulaula he zait he ed-ul-ulahan te tumutuu.

Pilipus 3:14

Ebpenigudu e pa wey ku mekuwa is suhul te Megbevayà su iyan heini ketezengan ke maan is mid-umew kiw zin te ked-angken te untung he wazà pidtemanan pinaag̵i te kebpekidsevaha tew ki Jesu Kristu.

1 Tiselunika 5:9

Su is Megbevayà, wazè din ivanglis kenitew is silut, kekenà, midluwas kiw zin pinaag̵i te Nengazen tew he si Jesu Kristu.

2 Timoteo 1:9

Is Megbevayà, ne iyan midlibri kenita te silut ne midhimu ki zin he g̵aked din. Umba mid-ulaula zin heini, kenà tenged te meupiya is menge ulaula ta, kekenà, tenged dà te iyan tuyù din wey tenged te utew zekelà is gag̵ew zin kenita. Dengan te wazè pa limbag̵a is minsan hengkey mid-isip din he ibpeehè din is gag̵ew zin kenita pinaag̵i te kebeg̵aya zin kenita ki Jesu Kristu.

2 Timoteo 2:19

Ne minsan pa zutun kenà egkehalin kes tuluuwen he midtukud te Megbevayà su zuen insurat he Lalag te Megbevayà he edhenduen te, “Egketuenan te Nengazen ke hentei is menge etew he g̵aked din,” wey zuen pa zaan lalag he edhenduen te, “Is minsan hentei he egkag̵i he g̵aked sikandin te Nengazen, ne kinahanglan he ed-iniyug̵an din is mezaat he ulaula.”

Hibriyuhanen 9:15

Ne tenged kayi zaan nehimu en si Kristu he zatù tew su wey zin metukud is beg̵u en he paag̵i te kebpekidsevaha tew te Megbevayà. Ne pinaag̵i kayi, is langun he midhimu te Megbevayà he meketuu, egkezawat dan is langun he meupiya he wazè din pidtemanan he impenaad te Megbevayà. Umba egkehimu heini su pinaag̵i te kebpatey ni Kristu nengepalis is langun he menge mezaat he ulaula he nehimu te menge etew zutun te timpu he nengesakup sikandan te nehuna he paag̵i.

Santiago 1:12

Utew zeyzey is etew he ebpurung ed-antus te penggezam kandin su emun egkeahà he hustu is kedtuu zin, ebeg̵ayan sikandin te untung he wazà pidtemanan he iyan impenaad te Megbevayà diyà te langun he ebmahalen dan sikandin diyà te g̵ehinawa zan.

Santiago 2:5

Pemineg̵a niw, menge minahal ku he suled, is ibpesavut ku keniyu. Duen mibpilì te Megbevayà he egkengeayuayu. Ne minsan deisek is ketig̵eyunan dan midhimu te Megbevayà he zekelà mulà is kedsarig dan kandin ne iyan sikandan edtuvazan din pinaag̵i te kedhadì din sumalà is penaad din diyà te langun he ebmahalen dan sikandin diyà te g̵ehinawa zan.

1 Pedro 2:9

Iyan, sikitew mulà, pinilì kiw zin. Menge memumuhat kiw te mibpilì he hadì he iyan si Kristu. Iyan kiw menge sakup din; iyan kiw menge g̵aked din he etew. Umba mibpilì kiw zin su wey tew mesangyew is tudtul te utew egkein-inuwan he menge vaal zin. Iyan sikandin nengelintau wey kiw meketuu wey kiw maawà dutun te kerusireman. Ne g̵untaan edteyawan kiw zin, he ke và dà egkeg̵iya, utew en meupiya is kedtuvazi zin kenitew.

1 Pedro 3:9

Ke zuen ebpesipala keniyu kenè niw velesi te mezaat. Ke zuen edrawak keniyu kenè niw zaan penrewaki, kekenà, belesi niw te meupiya. Su umba midhimu kew te Megbevayà he menge tumutuu su wey kew zin metuvazi te meupiya.

1 Pedro 5:10

Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin.

1 Juan 4:10

Is tutuu he g̵ag̵ew, kenà iyan is kebmahala tew te Megbevayà, kekenà, iyan is kebmahala zin kenitew wey is kebpehendiniya zin te Anak din su wey pinaag̵i te kebpehimatey zin mepesaylu is menge salè tew.

1 Juan 4:19

Umba utew en mahal sikandin dini te g̵ehinawa tew su nehuna kiw zin he mibmahal ziyà te kandin he g̵ehinawa.

Impezayag 3:19

Is langun he menge etew he mahal zini te g̵ehinawa ku, edsewayan ku wey edsilutan ku su wey mepenurù sikandan. Ne tenged dutun purungi niw is ulaula niw wey iniyug̵i niw is ulaula niw he mezaat.