Ruma 8:26 - Manobo Western Bukidnon

²⁶ Ne elin daan baal te Wag̵as he Mulin-ulin is: sikita is kenà metau, edtevangan ki zin su kenè ta egketuenan is hustu he id-ampù, iyan, is Wag̵as he Mulin-ulin, ne iyan sikandin ebpengeetuvang te Amey tew he Megbevayà pinaag̵i te kedhangyù he kenà egkehimu te kineg̵iyan te etew.

Ruma 8:26 Кръстосани препратки

Mateo 10:20

Su is egkeg̵iyen niw zutun, ne kenà menge lalag he ebpuun te keniyu he isip, kekenà, diyà ebpuun te Wag̵as he Mulin-ulin he midsug̵ù te Amey tew he Megbevayà. Ne heini is Wag̵as he Mulin-ulin, iyan ebekà te menge vebè niw.

Mateo 20:22

Ne migkeg̵iyan ni Jesus haazà is dezuwa te, “Wazè niw mesavut ke hengkey is edhengyuen niw. Egkeantus niw ve is merasey he ibpaantus kedì?” Ne midtavak dan is dezuwa te, “Uya, egkeantus dey.”

Lucas 22:44

Ne utew si Jesus dutun neseeng ne midheg̵etan din is ked-ampù din te Megbevayà ne edteg̵aktak is rimuseng din he iring te lengesa.

Juan 14:16

ne edhengyuan ku is Amey ku su wey zin ikeveg̵ey keniyu is Menenavang he ed-ilis kediey he kenà edsuwey keniyu te minsan keenu.

Ruma 15:1

Ne sikitew is meheg̵et is kedtuu te Megbevayà, kinahanglan he ed-entusen ta is kenè ta ked-ul-ulaha te ulaula he ibpekesalà te menge zuma ta he kenè pa meheg̵et is kedtuu zan. Ne kenè ta iyan idteg̵el is kenita he egkesuatan,

Ruma 7:24

Utew merasey is egkeulaula ku! Hentei is ebpekevelukas kedì kayi te kegkeuripena kedì kayi te mekesesalà he lawa ku he midhukuman en te kemetayen?

Ruma 8:15

Su is Wag̵as he Mulin-ulin he imbeg̵ey kenitew te Megbevayà, ne wazè kiw zin himuwa he menge uripen he utew egkengehandek te Megbevayà, kekenà, midhimu kiw zin he menge anak te Megbevayà. Ne pinaag̵i te g̵ehem te Wag̵as he Mulin-ulin egkehimu en he egkeamey tew is Megbevayà.

2 Kurintu 5:2

Ne g̵eina te utew ki edlised te zini ki pa te kelibutan, utew ta igkesuat he iveg̵ey en pezem kenita haazà is beg̵u he lawa ta he ziyà te langit.

2 Kurintu 5:4

Su sikita is tumutuu he uuyag pa zini te kelibutan, edlised ki su neveg̵atan ki kayi te menge kemereg̵enan he egkeantus kayi te kelibutanen he lawa ta, asal kenè ta iyan egkesuatan he meewai ta heini is lawa ta, kekenà, iyan egkesuatan ta is wey meveg̵ayi ki en pezem guntaan dutun te veg̵u he lawa he ebpuun diyà te langit, ne zutun egkeilisan is lawa he zuen din kemetayen te lawa he zuen din untung he wazà pidtemanan.

Gelasya 4:6

Ne zutun wey ta metueni he anak ki iyan te Megbevayà, midsug̵ù te Megbevayà he ibpeubpà dini te kenita is Wag̵as he Mulin-ulin he ziyà te ki Jesus, ne ibpinted din kenita he mekekag̵i ki te, “Amey ku he Megbevayà.”

Ipisu 2:18

Tenged te kebpekidsevaha tew ki Kristu, sikami is menge Hudiyu wey sikiyu is kenà menge Hudiyu, ebpekeuvey kiw en ziyà te Amey tew he Megbevayà pinaag̵i te kedtavang te Wag̵as he Mulin-ulin.

Ipisu 6:18

Pekezesen kew ampù te minsan hengkey he timpu sumalà is ked-uwita keniyu te Wag̵as he Mulin-ulin. Buyù kew te tavang te Megbevayà ne layun kew andam ne peniguduwi niw layun te ked-ampù is langun he menge tumutuu.

Hibriyuhanen 4:15

Ne heini si Jesus is lavew he memumuhat tew, nesavut din is keg̵uyè tew tenged te kememenusiyai tew su neseg̵azan din he mibpenulayan sikandin dengan ni Setanas te minsan hengkey he paag̵i iring te ebpenulayan kiw zaan, iyan, wazà mulà sikandin mepenulayi.

Hibriyuhanen 5:2

Ne tenged te etew zà duen sikandin he layun egkesayep, egkehimu he mepelevayen sikandin te menge zuma zin he etew he egkengesayep daan tenged te kenè dan ebpekesavut.

Santiago 4:3

Ne minsan ke ebuyuen niw ziyà te kandin, kenè din ibeg̵ey su mezaat is tuyù niw te kebuyua niw kayi. Iyan ketezengan te kebuyù niw is wey niw metuman is mezaat he kebayè niw.