Ruma 8:15 - Manobo Western Bukidnon

¹⁵ Su is Wag̵as he Mulin-ulin he imbeg̵ey kenitew te Megbevayà, ne wazè kiw zin himuwa he menge uripen he utew egkengehandek te Megbevayà, kekenà, midhimu kiw zin he menge anak te Megbevayà. Ne pinaag̵i te g̵ehem te Wag̵as he Mulin-ulin egkehimu en he egkeamey tew is Megbevayà.

Ruma 8:15 Кръстосани препратки

Mateo 25:25

Ingkehandek ku sikew umba inleveng ku ziyà te tanà is selapì nu. Ahaa nu; heini zed sikan is selapì nu.’

Marcos 14:36

Ke sikandin dutun te ked-ampù din te, “Amey ku, egkehimu nu is minsan hengkey ne emun egkehimu zà ne kenà a kenikew ipehimetayi, iyan, kenà egkesunud is kediey he egkesuatan, kekenà, iyan egkesunud is kenikew.”

Lucas 11:2

Ne migkag̵i si Jesus te, “Iyan heini iringi niw ke ed-ampù kew; ke sikiyu te, ‘Amey zey ziyà te langit, berakat he tehuza te menusiyà is ngazan nu. Berakat he medhadì ka te menusiyà.

Lucas 22:42

Ke sikandin te, “Amey ku, emun iyan egkesuatan nu ne kenè nu en kediey ipeseg̵azi heini is merasey he imbanglis nu kediey, iyan, kenà egkesunud is kediey he egkesuatan, kekenà, iyan egkesunud is kenikew.”

Lucas 8:37

Ne zutun, haazà is langun he menge etew he meg̵inged dutun te tanà te menge Geresinen, ne midhangyù dan ki Jesus he med-awà sikandin dutun te kandan su utew zan ingkehandek sikandin. Ne iyan dà haazà, ne mid-untud ensi Jesus te avang su egenat dan.

Juan 16:8

Ne emun dini en sikandin, ibpesavut din te menusiyà he mezaat is ulaula te menusiyà wey ibpesavut din he zuen metazeng he ibayà wey ibpesavut din daan kandan he edsilutan sikandan te Megbevayà.

Juan 20:17

Ne migkag̵i kandin si Jesus te, “Kenè ka kepkep dini su wazè e pa vetuna pehendiyà te Amey ku. Beyai nu is menge suled ku ne keg̵iya nu te, ‘Edhendiyà a te Amey ku, diyà te Megbevayè ku. Iyan daan sikandin Amey niw wey Megbevayè niw.’ ”

Nengeulaula 16:29

Ne haazà is ebantey, midsug̵ù he uwita is sulù ne migaanggaan medseled ne midluhud is egkerkeren diyà te etuvangan ni Pablo wey ni Silas.

Nengeulaula 2:37

Ne hein nezineg haazà te menge etew utew zan nekedsendit. Ne ke sikandan diyà te ki Pedro wey te menge zuma zin he epustul te, “Menge suled, ebmenumenu key?”

Ruma 8:16

Iyan is Wag̵as he Mulin-ulin is ebpesavut kenitew he menge anak kiw iyan te Megbevayà.

Ruma 8:23

Ne kenà duen dà taman, su sikita zaan is nekezawat te Wag̵as he Mulin-ulin he iyan tuus he zuen pa keuzemà ibeg̵ey kenita te Megbevayà, utew egkeheg̵et is kebperetenga ta kayi. Su utew ta egkesuati he meume en haazà is timpu he zutun edhimesazen te Megbevayà is ked-anak-anak din kenita wey edtumanen din is kedtulusa zin te lawa ta.

Ruma 8:26

Ne elin daan baal te Wag̵as he Mulin-ulin is: sikita is kenà metau, edtevangan ki zin su kenè ta egketuenan is hustu he id-ampù, iyan, is Wag̵as he Mulin-ulin, ne iyan sikandin ebpengeetuvang te Amey tew he Megbevayà pinaag̵i te kedhangyù he kenà egkehimu te kineg̵iyan te etew.

Ruma 9:4

Su menge kevuwazan daan sikandan ni Israyil; mid-anak-anak sikandan dengan te Megbevayà. Ne impeehè din kandan is mekeg̵eg̵ehem he anlag din, ne zuen menge midtukud din he paag̵i te kedtuvazi zin kandan, ne imbeg̵ey zin kandan is kesug̵uan, ne impenurù din kandan is paag̵i te ked-ezapa kandin. Ne mezakel pa is meupiya he penaad din kandan.

1 Kurintu 2:12

Sikitew is menge tumutuu, imbeg̵ey kenitew te Megbevayà is Wag̵as he Mulin-ulin ne is ed-ulin kenitew, diyà ebpuun te Megbevayà ne kenà ebpuun diyà te etew zà duen. Umba imbeg̵ey is Wag̵as he Mulin-ulin kenitew su wey tew mesavut is langun he ibeg̵ey kenitew te Megbevayà.

2 Kurintu 11:4

Umba egkeipeng a su ke zuen ebpekeuma ziyan he selakew is ibpesavut dan mehitenged ki Jesus, ne selakew is mulin-ulin he ibpenurù dan, ne kenè dan iyan ibpesavut is tutuu he tuluuwen he impesavut dey, kekenà, selakew is ibpenurù dan, ne ed-entusen niw mulà is kandan he kebpenurù ne kenà duen dà taman su utew niw egkesuati te ebpemineg.

Gelasya 2:4

Iyan, duen menge etew he kenà tutuu he menge tumutuu te tutuu he tuluuwen he midtampu kenami. Egkesuatan dan dutun he sirkunsidara si Tito. Umba midtampu zan he id-eles dan he kenè dan tutuu he tumutuu su wey zan maahà ke edtumanen tew is menge sug̵ù he imbilinbilin ni Moises. Su egkesuatan dan he meiring kiw te uripen pinaag̵i te kedtuman te kesug̵uan minsan te nelibri kiw en ni Jesu Kristu ne wazè en kinahanglan he ebenteyanan tew pa is kesug̵uan.

Gelasya 5:1

Pinaag̵i te kebelukasi kenitew ni Kristu, nelibri kiw en te kedtumana te kesug̵uan. Umba, kinahanglan he edsukul kiw is mibelukasan su wey kenè kiw en maan meuripen.

Ipisu 1:5

Ne tenged te utew zekelà is gag̵ew zin kenitew, dengan te wazè pa is kelibutan, mid-isip din he pinaag̵i ki Jesu Kristu edhimuwen kiw zin he menge anak din su iyan egkesuatan din wey tuyù din.

2 Timoteo 1:7

Su is Mulin-ulin he impeulin kenita te Megbevayà, kenè ta igketalew, kekenà, edlig-enan ki zin wey ebeg̵ayan ki zin te zesen su wey mehimu he ebmahalen ta is menge zuma ta wey edtengkaan ta is langun he ed-ul-ulahan ta.

Hibriyuhanen 2:15

ne wey pinaag̵i kayi metevangi kiw zin ne libriya kiw zin te kemetayen. Su zengan te wazè kiw pa libriya, kenà egkeawà dini te kenitew is kegkehandek te kemetayen ne iring te menge uripen kiw zutun te kegkehandek.

Santiago 2:19

Emun midtuu ki he sebsevaha zà is Megbevayà utew meupiya heeyan, iyan, kenè pa hustu su minsan is menge mezaat he mulin-ulin, midtuu zan daan te iring keniyan, iyan, egkerkeren dan te kegkehandek su netuenan dan he edsilutan sikandan keuzemà.

1 Juan 4:18

Ne is minsan hentei he ebmahalen te Megbevayà, wazà kinahanglan he egkehandek sikandin te Megbevayà. Ne g̵eina te wazà kurang te kebmahala kenitew te Megbevayà in-awè din en is kegkehandek tew kandin. Umba egkehandek is etew su egkeperateng din is silut kandin te Megbevayà, iyan, sikan is etew he egkehandek te Megbevayà, wazè pa meheg̵et diyà te isip din is kebmahala kandin te Megbevayà.