Ruma 7:4 - Manobo Western Bukidnon

⁴ Ne iring din ded daan, menge suled, heini is nehitavù kenitew su zutun te kebpatey ni Kristu he elili kenitew, ne mibpatey ki zaan, ne tenged kayi kenè en egkehimu he ibpetuman kenita te minatey en is menge sug̵ù he imbilinbilin ni Moises. Ne umba nehimu heini su wey kiw mesakup ni Kristu he nevanhew en ne wey tew metuman is egkesuatan te Megbevayà.

Ruma 7:4 Кръстосани препратки

Mateo 26:26

Ne zutun te kemulu zan pa egkaan, mid-amì si Jesus te supas, ne mibpeselematan din te Megbevayà ne mibpenevìtevì din ne impemeg̵ey zin diyà te menge sumusundan din. Ke sikandin te, “Iyan heini lawa ku; dewata niw wey keena niw.”

Marcos 4:20

Ne sikan is benì he ziyà meketanà te meupiya he tanà, iyan is Lalag te Megbevayà he nezineg te menge etew ne midtuu zan; ne is Lalag te Megbevayà, ne ebpulus diyà te kandan. Is duma, ne ebpulus te zeisek diyà te kandan, ne is duma, ne ebpulus te malù dekelà, ne is duma, ne ebpulus te utew zekelà diyà te kandan.”

Juan 15:8

Emun ebpenigudu kew ebpemeg̵as, he ke và dà egkeg̵iya, ke layun meupiya is menge vaal niw, egkezelig̵an te menge etew is Amey ku he Megbevayà ne egketuenan he tutuu kew iyan he menge sumusundan ku.

Juan 3:29

Penenglitan ke zuen mibpengesawa, ne naangken din en haazà is mid-esawa zin. Sikan is kumekag̵un dutun, utew meupiya is gehinawa zin emun egkezineg din haazà is mibpengesawa he ebpekidlalag en dutun te mid-esawa zin. Ne iring din ded daan su utew ibmeupiya te g̵ehinawa ku zaan ke mezakel is edsundan ki Jesus. Kinahanglan he ed-iseg is bentug̵an ni Jesus, iyan, is kedì, kinahanglan he egkeawà,” ke si Juan.

Juan 6:51

Iyan a egkeenen he ebpuun te langit wey ebpekeveg̵ey te untung; ne ke zuen egkaan kediey kenè en ebpatey is gimukud din. Is egkeenen he ibeg̵ey ku, iyan is lawa ku. Ibeg̵ey ku heini su wey maangken te tivuk he menusiyà is untung he wazà pidtemanan,” ke si Jesus.

Ruma 6:11

Ne iring din ded daan, tentenuzi niw he g̵eina te minatey ki en he zuma ki Kristu, naawè en daan dini te kenita is kegkesemuki kenita te salè ta, ne pinaag̵i zaan ki Jesu Kristu imbeg̵ey en kenita is beg̵u en he untung, ne kinahanglan he igkezalig daan te Megbevayà heini is beg̵u en he untung ta.

Ruma 6:14

Su kenè en kinahanglan he iyan ebayàbayà kenita is mezaat he kebayè ta su kenè ta iyan edserig̵an is kedtumana te kesug̵uan, kekenà, iyan ta edserig̵an is kedtavang wey kegkeg̵eg̵awi te Megbevayà kenita.

Ruma 6:2

Ne kenà heini egkehimu su kenà egkehimu he ebpeniguduwan ta te ed-ulaula is mezaat su wazè en kelavet kenita te mezaat he ulaula. Su iring ki te minatey he naawè en diyà te kandin is daan he untung din.

Ruma 6:22

Iyan, guntaan, nevelukasan ki en te Megbevayà, ne nelibri ki en te kebpekeulaula ta te mezaat. Ne tenged kayi menge sulug̵uen ki en te Megbevayà, ne utew zekelà is pulus kayi kenita su ebpeketuman ki en te egkesuatan din, ne iyan rimeg̵as kayi te mid-ulaula te Megbevayà is kegkeveg̵ayi kenita te untung he wazà pidtemanan.

Ruma 7:3

Iyan, emun wazè pa mebpatey haazà is esawa zin ne ebpekiduma wey ebpekidhulid te sengememaame en, ne nesupak din is belaud su neselselaan din haazà is esawa zin. Ne emun ebpatey is esawa zin, ebpekepeesawa ne kenè en ebpekesalà sikandin su nelibri sikandin dutun te velaud mehitenged te telteleesawa.

Ruma 7:6

Ne hein nemeketuu kiw ki Jesus, nelibri kiw te Megbevayà ne wazè en kinahanglan he iyan tew pa edserig̵an is kedtuman te kesug̵uan, su zutun te kebpatey ni Jesus minatey kiw zaan ne nevelukasan kiw te kegkeuripen kenitew te salà. Ne g̵untaan beg̵u en is paag̵i te ked-ul-ulaha tew te egkesuatan te Megbevayà su pinaag̵i heini te kedtavang te Wag̵as he Mulin-ulin, ne kenè en pinaag̵i te zaan he paag̵i he iyan is kenitew he kedtumana te insurat he kesug̵uan.

Ruma 8:2

Su pinaag̵i te kebpekidsevaha ta ki Jesu Kristu imbeg̵ey kenita te Wag̵as he Mulin-ulin is beg̵u en he untung ne tenged kayi nelibri ki en te kebpekesalè ta he iyan edungguan din is kemetayen he wazè din pidtemanan.

1 Kurintu 10:16

Sikitew is menge tumutuu, emun edtig̵um kiw su edtumanen tew is kedtenuzi te kebpatey ni Kristu, duen ed-inumen tew he ebpeselematan tew te Megbevayà. Tuus heini he mibpelisan kiw en te lengesa ni Kristu. Ne is supas he ebpenebtevien tew ne egkeenen tew, kebpekeambit tew heini te lawa ni Kristu.

2 Kurintu 11:2

Su insavuk te Megbevayà kayi te kediey is dekelà he suat he kenè kew medsuwey te Nengazen. Iring kew te rag̵a he nekeg̵unan, iyan, iyan si Kristu ingkag̵un ku keniyu. Ne egkesuatan ku he wazà duma he ebpekeesawa keniyu.

Gelasya 3:13

Minsan pa te nesupak te en is kesug̵uan, nelibri ki ni Jesus te silut su midrewakan en si Jesus he elili kenitew zutun te kedrensanga kandin te krus, su zuen insurat he Lalag te Megbevayà he edhenduen te, “Ke zuen etew he edhimetayan ne idtaud te impasek he kayu ne tuus heini te rawak kandin te Megbevayà.”

Gelasya 5:18

Iyan, ke ebpesakup ki te Wag̵as he Mulin-ulin, kenè ki egkesakup te kesug̵uan he imbilinbilin ni Moises.

Ipisu 2:15

Pinaag̵i te kebpehimatey zin, in-awè din is kebpetumana tew te kesug̵uan he imbilinbilin ni Moises ragkes is menge tulumanen su wey sikitew is dezuwa he kelasi te etew, mehimu zin he veg̵u en he kelasi te etew pinaag̵i te kebpekidsevaha tew kandin, ne tenged kayi naawè en is kegkekuntada tew.

Pilipus 1:11

Ne zutun egkeveelan niw is minsan hengkey he metazeng he ulaula tenged te g̵ehem he ibeg̵ey ni Jesu Kristu su wey mezalig wey mevantug is Megbevayà.

Pilipus 4:17

Kenè ku iyan igkekeg̵iya kayi su wey a layun mekezawat te ibeg̵ey niw, kekenà, egkesuatan ku he zekelà is suhul keniyu te Megbevayà.

Kulusas 1:10

Su emun ebeelan din is iring kayi, ne human egkehimu is menge ulaula niw he zait he menge ulaula te menge etew he neg̵aked te Nengazen tew, ne egkehimu zaan he layun niw egkeveeli is egkesuatan din; layun niw egkeulaula is minsan hengkey he menge meupiya he ulaula. Ne layun daan ed-iseg is kegketueni niw te menge ulaula te Megbevayà.

Kulusas 1:22

Ne minsan pa te iyan haazà, midhimu kew g̵untaan te Megbevayà he menge emig̵u zin pinaag̵i te kebpatey ni Kristu. Umba mibpehimatey si Kristu su wey kew mehimu he menge etew he wazà mezaat he ulaula ne wazà igkesumbunga keniyu keuzemà emun ibpeetuvang kew zin diyà te Amey zin he Megbevayà.

Kulusas 1:6

Heini is migkag̵i he Meupiya he Tudtulanen, pinaag̵i te kedtuu kayi, mezakel en he menge etew ziyà te minsan hendei he inged is mibmeupiya is menge ulaula zan. Ne kenà duen dà taman su ed-iseg ebmezakel is menge tumutuu pinaag̵i te Meupiya he Tudtulanen, iring te layun daan ed-iseg ebmezakel is menge tumutuu ziyan te keniyu puun pa zutun te andew zengan he nezineg niw is tudtul te g̵ag̵ew kenitew te Megbevayà wey netuenan niw he venar iyan.

Kulusas 2:14

Ne minsan pa te wazè kiw medtuman te insurat he kesug̵uan din, pinaag̵i te kebpatey ni Kristu ziyà te krus, in-awè din is kesug̵uan ne tenged kayi wazè en igkesiluti zin kenitew.

Kulusas 2:20

Na, menge suled, geina te iring te minatey ki en duma ki Kristu, wey kenè ki en maan egkeveyveyaan te menge kenà hustu he tuluuwen, kinahanglan he kenè kew en maan mebpemineg te menge sug̵ù te menge etew he menge kuntada te Megbevayà. Menge sug̵ù heini te menge etew zà duen. Egkag̵i zan he zuen menge egkeenen he kenà ibpekaan kenitew te Megbevayà, ne minsan is kegezami wey is kegewezi zà kayi ne wazè din kun itug̵ut kenitew. Kenè niw, menge suled, pemineg̵a is iring dutun su wazà pulus te idawey zan su emun egkeenen tew is egkeenen ne egkeawà heini.

Hibriyuhanen 10:10

Ne g̵eina te midtuman ni Jesu Kristu is egkesuatan te Megbevayà, nengepalis is menge salè tew pinaag̵i te kesevaha zà he kebpemuhata zin te keugelingen din he lawa.

1 Pedro 2:24

Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

Impezayag 19:7

Edlilipey kiw utew ne edelig̵en tew sikandin tenged te zekelà he g̵ehem din! Su iyan en heini timpu he kegketuman te eseweey te nati he kerehidu. Is ed-esewaan te nati, ne mibistiyan en.

Impezayag 21:9

Ne zutun mid-uvayan a te sevaha zutun te pitu he velinsug̵uen he sikan is nen-ulà te pitu he lediyà he nepenù te pitu he huziyan en he idrasey te menusiyà, ne ke sikandin te, “Duma ka kedì su ibpeehè ku kenikew is ed-esawaan te nati he kerehidu.”