Ruma 6:19 - Manobo Western Bukidnon

¹⁹ Umba insempitè ku is egkeulaula te uripen su wey melemu niw mesavut is ibpesavut ku. Su zengan iring te mibpeuripen kew te mezaat he kebayà ne ingkesuat niw he ed-ul-ulahan te lawa niw is menge meremerik wey mezaat he ulaula he layun ed-iseg he mezaat. Iyan, guntaan kinahanglan he himuwa niw is lawa niw he metazeng he sulug̵uen te Megbevayà wey niw metuman is egkesuatan din.

Ruma 6:19 Кръстосани препратки

Mateo 4:23

Ne neeneb ni Jesus is tivuuk he prubinsya he Geliliya te ebpenurù te menge etew ziyà te menge simbahan dan. Impesavut din te menge etew is Meupiya he Tudtulanen te keag̵i te kedhadì te Megbevayà ne nengeulian din is egkengesekitan te migkelingulingu he varang te zaru.

Ruma 15:1

Ne sikitew is meheg̵et is kedtuu te Megbevayà, kinahanglan he ed-entusen ta is kenè ta ked-ul-ulaha te ulaula he ibpekesalà te menge zuma ta he kenè pa meheg̵et is kedtuu zan. Ne kenè ta iyan idteg̵el is kenita he egkesuatan,

Ruma 3:5

Ne zuen menge pilusupu he etew he egkag̵i te, “Emun ed-ulaula ki te mezaat, meupiya zaan haazà su emun egkeisip te menge etew is menge ulaula ta he mezaat, wey is menge ulaula te Megbevayà, siguradu egkesavut dan he utew mulà meupiya is menge ulaula te Megbevayà ne ebpekezalig dan te Megbevayà, ne utew haazà meupiya. Ne emun,” ke sikandan, “nehimu is meupiya tenged te mezaat he mid-ulaula ta, kenà metazeng is kedsiluti kenita te Megbevayà tenged te mid-ulaula ta he mezaat.” Ne pilusupu is menge lalag he iring kayi.

Ruma 6:13

Kenè ta egemiten is minsan hengkey he vahin te lawa ta te ked-ulaula te mezaat, kekenà, idtug̵ut ta he iyan ebayàbayà kenita is Megbevayà su zait heini kenita te nelibri en te kemetayen ne mibeg̵ayan te veg̵u en he untung. Ne idtug̵ut ta he iyan egamit te lawa ta is Megbevayà wey ta meulaula is metazeng.

Ruma 7:23

Iyan, dini te lawa ku, selakew is ebayàbayà kedì su edsug̵uen a te menge mezaat he kebayà te lawa ku he supaka ku is hustu he ulaula he egkesuatan te g̵ehinawa ku. Uripen a te mezaat he kebayè ku, ne ebpeketuman a te suat te lawa ku.

Ruma 8:26

Ne elin daan baal te Wag̵as he Mulin-ulin is: sikita is kenà metau, edtevangan ki zin su kenè ta egketuenan is hustu he id-ampù, iyan, is Wag̵as he Mulin-ulin, ne iyan sikandin ebpengeetuvang te Amey tew he Megbevayà pinaag̵i te kedhangyù he kenà egkehimu te kineg̵iyan te etew.

1 Kurintu 5:6

Maan is ebpegalbu kew? Netuenan niw is erubasa he edhenduen te, “Minsan ke zuen deisek dà he tapey ne egketepayan din is sengebisin en he erina he ebeelan he supas.”

1 Kurintu 6:11

Iring kayi is ulaula zengan te zuma keniyu, iyan, guntaan, nelumpiyuwan kew en te menge ulaula niw he mezaat ne nehimu kew en he menge g̵aked te Megbevaya. Ne pinaag̵i te g̵ehem te ngazan te Nengazen tew he si Jesu Kristu wey pinaag̵i te ked-ulini keniyu te Wag̵as he Mulin-ulin he ebpuun te Megbevayè tew, mid-isip kew en he metazang te Megbevayà.

1 Kurintu 9:8

Menge ketezengan heini he zini zà ebpuun te menge ulaula tew te menusiyà, iyan, iyan gihapun ibpenurù te kesug̵uan.

Gelasya 3:15

Menge suled, duen penenglitan he ibpesavut ku keniyu. Su ke zuen ibpenaad te sevaha he etew he insurat diyà te dukumintu he mibpirmahan din ne mibpirmahan daan te menge tistig̵us, ne kenà egkehimu he edhelinan wey ed-umanan haazà te minsan hentei su nelig-enan.

Hibriyuhanen 12:15

Bantey kew su kela ke zuen duma keniyu he kenà edawat te g̵ag̵ew te Megbevayà. Su is iring kayi he etew, ne ebpekeiring te sagbet he ebpemeg̵as te mepait he ebpekehilu. Ebpekesamuk sikandin te menge tumutuu ne mezakel he etew is ebpekeiring kandin te ed-ulaula te mezaat.

Hibriyuhanen 4:15

Ne heini si Jesus is lavew he memumuhat tew, nesavut din is keg̵uyè tew tenged te kememenusiyai tew su neseg̵azan din he mibpenulayan sikandin dengan ni Setanas te minsan hengkey he paag̵i iring te ebpenulayan kiw zaan, iyan, wazà mulà sikandin mepenulayi.