Ruma 5:6 - Manobo Western Bukidnon

⁶ Isipa nu is gag̵ew kenita te Megbevayà. Su zutun te timpu he intelaan te Megbevayà, hein wazà minsan hengkey he egkeulaula ta he ebpekehimu he melibri ki te silut, mibpehimatey si Kristu he elili kenita te mesinupaken.

Ruma 5:6 Кръстосани препратки

Ruma 11:26

Ne zutun egkeamin egkelibri te silut is langun he menge kevuwazan ni Israyil su zuen insurat he Lalag te Megbevayà he edhenduen te, “Duen Menluluwas he ziyà ebpuun te menge Hudiyu ne pinaag̵i kandin ed-engkezan te langun he menge kevuwazan ni Hakub is kenè dan ked-azap kediey te Megbevayà.

Ruma 4:25

Iyan si Jesus kes midsug̵ù te Megbevayà wey mebpehimatey te silut tenged te menge kedsupak tew. Ne zutun mibanhew sikandin te Megbevayà wey mehimu he metazeng is ked-isipa kenitew te Megbevayà he iring te wazè kiw keenu mekeulaula te mezaat.

Ruma 4:5

Ne kenà iring dutun is ked-isipa te Megbevayà kenita he metazeng su g̵ag̵ew zà kenita. Umba mid-isip ki te Megbevayà he metazeng, kenà tenged te midtuman ta is mibpeveelan din kenita, kekenà, tenged dà te midtuuwan ta sikandin is ebpekehimu he mebmetazeng is menge mesinupaken.

Ruma 5:10

Su zutun te timpu zengan he kemulu ki kuntada te Megbevayà, tenged te kebpehimatey te Anak din, nehimu ki he emig̵u zin. Ne emun iyan haazà, guntaan te emig̵u ki zin en, wey ki pe be kenà mehimu he melibri keuzemà te silut tenged te nevanhew en sikandin.

Ruma 5:7

Mezelag dà buwa he zuen etew he ebpehimatey he elili te minsan metazeng he etew. Egkehimu vuwa he zuen etew he ebpekevurut he ebpehimatey he elili te etew he meupiya is ulaula zin.

Ruma 5:8

Iyan, is Megbevayà mulà, impeehè din is gag̵ew zin kenitew su mibpehimatey si Kristu he elili kenitew zutun te timpu zengan te kemulu kiw pa ed-ulaula te mezaat.

Ruma 8:32

Su minsan is Anak din he si Jesus, wazè din menug̵uni, kekenà, midsug̵ù din wey mekepehimatey he elili kenita. Ne emun iyan haazà gag̵ew zin kenita, kenà egkehimu he kenè din daan ibeg̵ey kenita is langun he impenaad din kenita.

Ruma 8:34

Ne wazà daan ebpekekag̵i he zait ki he edsilutan su edtevangan ki ni Jesu Kristu. Minatey sikandin he elili kenita ne kenà duen dà taman, su nevanhew en daan. Ne g̵untaan utew sikandin lavew su ziyà sikandin ebpinuu te zapit te egkekewanan te Megbevayà ne edtevangan ki zin diyà te etuvangan te Megbevayà.

Gelasya 2:20

Tenged te kedsarig ku ki Kristu, inransang a te krus duma kandin su elili ku sikandin. Minatey a, iyan, uuyag a g̵ihapun su zini ed-ubpà te kediey si Kristu ne heini is kebpengungubpaan ku zini te kelibutan, pinaag̵i zà te kedsarig ku kandin te Anak te Megbevayà. Mahal a ziyà te g̵ehinawa zin ne mibpehimatey sikandin he elili kediey su wey a melibri.

Gelasya 4:4

Ne hein netuman en is hustu he timpu he netagnà dengan, is Megbevayà, midsug̵ù din dini te kelibutan is Anak din. Ne heini is Anak din, nehimu he etew pinaag̵i te ked-enaka kandin te vahi. Ne pinaag̵i kayi nehimu zaan sikandin he nezizalem te kesug̵uan he imbilinbilin ni Moises,

Ipisu 5:2

Kinahanglan he ipeehè niw layun he mahal ziyà te g̵ehinawa niw is menge zuma niw iring te mahal kiw ziyà te g̵ehinawa ni Kristu. Mibpehimatey sikandin he elili kenitew wey kiw zin melibri. Nehimu heini he pemuhat he utew mehemut, he ke và dà egkeg̵iya, utew egkesuati te Megbevayà.

Kulusas 2:13

Ne sikiyu, wazè niw pa zengan untung he wazè din pidtemanan tenged te memezaat is menge ulaula niw te kenà menge Hudiyu wey tenged te midtuman niw is memezaat he kebayà te lawa niw. Ne minsan pa zutun, mibeg̵ayan kew te Megbevayà te untung he wazè din pidtemanan ne nevanhew kew en duma ki Kristu. Mibpesaylu kiw te Megbevayà te langun he menge salè tew.

1 Tiselunika 5:9

Su is Megbevayà, wazè din ivanglis kenitew is silut, kekenà, midluwas kiw zin pinaag̵i te Nengazen tew he si Jesu Kristu.

1 Timoteo 1:9

Iyan, wazà isug̵ù heini su wey mezawey is menge metazeng he etew, kekenà, insug̵ù heini su wey mezawey is menge mesinupaken, menge kenà metinumanen, menge kenà edtuu te Megbevayà, menge selaan, menge lalung wey menge kenà edtahud te Megbevayà, menge ebunù te amey wey iney zan, menge teremunù,

Tito 2:12

Ne pinaag̵i zutun te g̵ag̵ew egkesavut ta he kinahanglan he meengkezi ta is menge ulaula he kenà igkesuat te Megbevayà wey is kedtumana ta te menge suat te lawa ta zini te kelibutan. Kinahanglan he ed-eg̵enen ta is menge kebayà ta he mezaat. Kinahanglan daan he metazeng wey igkesuat te Megbevayà is menge ulaula ta te zini ki pa ed-ubpà te kelibutan.

Hibriyuhanen 8:3

Is lavew he memumuhat dini te kelibutan, insug̵ù kandin is kebpemuhata te menge ibpelengesa wey is kebeg̵aya te menge halad diyà te Megbevayà. Ne iring din ded daan kinahanglan he zuen daan ibpemuhat te kenitew he lavew he memumuhat.

Hibriyuhanen 9:26

su emun iyan haazà egkinehenglanen, puun pa te kedlimbag̵a te kelibutan, ne utew mezakel is kebpekeantus din te kebpehimatey. Iyan, wazà iyan haazà kinehenglana su iyan mid-ulaula zin kayi te timpu he meg̵aan en egketapus is kelibutan is: midlepew sikandin wey zin maawà is salè tew pinaag̵i te kebpemuhata zin te keugelingen din he lawa. Ne kesevaha zà is kedhimuwa zin kayi.

1 Pedro 1:20

Te wazè pa limbag̵a is kelibutan, daan en si Kristu he intezù te Megbevayà wey mehimu he Menluluwas tew. Ne kayi te timpu g̵untaan, impezayag sikandin wey kiw mevelukasi.

2 Pedro 3:7

Ne haazà is Lalag te Megbevayà he iyan inlimbag din dengan, pinaag̵i zutun midteg̵enahan din en is langit wey tanà su wey melimas din te hapuy keuzemà dutun te andew te kedsusiya zin wey kedsiluti zin te menge etew he wazè dan kedtahud kandin.

Hudas 1:15

su edsusiyen din is nengeulaula te minsan hentei he etew. Edsilutan din is minsan hentei he lalung he wazè dan kedtahud te Megbevayà tenged te menge kelelalung he mid-ulaula zan wey tenged te kedsumpelita zan te Megbevayà.”

Hudas 1:18

Ke sikandan te, “Keuzemà te ketepusan he menge andew ebpenlepew is menge etew he edsumpalit keniyu. Iyan edtumanen dan is menge kebayè dan he supak te Megbevayà.”

Hudas 1:4

Umba kinahanglan he egkeg̵iyen ku heini su zuen menge etew he nekeamur keniyu, iyan, id-eles dan he kenà hustu is edtuuwan dan. Wazè dan kedtahud te Megbevayà; edhelinen dan pezem is tutuu he tuluuwen su ibpenurù dan he egkehimu ke ed-ul-ulahan tew is meremerik su utew kun belig̵eg̵awen is Megbevayà ne ebpeseyluwen kiw zin gihapun. Kenè dan edtuu he si Jesu Kristu, iyan dà egalen tew wey Nengazen tew. Dengan dà isurat te menge ebpeneuven te Megbevayà ke hengkey is silut kandan.