Ruma 5:1 - Manobo Western Bukidnon

¹ Guntaan, tenged te midtuu ki en ki Jesus, mid-isip ki en te Megbevayà he metazeng he iring te wazè ki keenu mekesalà, ne tenged kayi pinaag̵i te mid-ulaula te Nengazen tew he si Jesu Kristu melinew en is kedepitè tew te Megbevayà.

Ruma 5:1 Кръстосани препратки

Lucas 19:38

Ke sikandan is edalig te, “Delig̵a is hadì he ebpekeuma he midsug̵ù te Nengazen! Melinew en is kedepitè tew te Megbevayà! Delig̵a is Megbevayà diyà te langit!”

Lucas 19:42

Ke sikandin te, “Angin pezem ke netuenan niw zà ke hengkey is hustu he ed-ul-ulahan su wey zuen kelinew ziyan te inged niw, iyan, kenè niw en guntaan egketuenan!

Lucas 2:14

ke sikandan te, “Edelig̵en tew is Megbevayà he ziyà te langit. Ne zini te lumpad te kelibutan mebmelinawen is kebpekesavuk te langun he menge etew he igkesuat te Megbevayà.”

Juan 14:27

Edteg̵akan ku is isip niw te kelinew. Is kelinew he zini te isip ku, iyan idtag̵ak ku keniyu. Is menge etew zini te kelibutan he kenà edtuu, kenè dan ebpekeveg̵ey keniyu te kelinew he iring kayi. Ne kinhanglan he kenà mebmesakit is gehinawa niw ne kenè kew zaan mahandek.

Juan 16:33

Umba migkag̵i ku keniyu heini is langun su wey mebmelinawen layun is gehinawa niw tenged kediey. Dini te kelibutan ebpesipelahan kew te menge etew he kuntada ku, iyan, kenè kew mahandek su nezaag ku en sikan is egalen te menge kuntada ku!”

Juan 20:31

Ne iyan insurata ku kayi te menge egkein-inuwan su wey kew meketuu he iyan si Jesus Anak te Megbevayà wey sikan is mibpilì te Megbevayà he ibpahadì, ne emun edtuu kew kandin ebeg̵ayan kew te untung he wazà pidtemanan.)

Juan 5:24

Utew venar is egkeg̵iyen ku he is minsan hentei he ebpemineg te menge lalag ku ne edtuu te Megbevayà he midsug̵ù kediey zini, iyan ebpekeangken te untung he wazà pidtemanan. Kenà sikandin keuzemà edsilutan su nekelikey en te kemetayen is gimukud din wey naangken din en is untung he wazà pidtemanan.

Nengeulaula 10:36

Netuenan niw en is Meupiya he Tudtulanen he impesavut te Megbevayà kenami te menge kevuwazan ni Israyil su pinaag̵i ki Jesu Kristu he iyan Nengazen te langun he menge etew, impesavut din he egkeawà is pauk te Megbevayà kenitew.

Ruma 1:17

Su pinaag̵i te Meupiya he Tudtulanen ibpetuenan kenitew te Megbevayà is paag̵i wey kiw zin meisip he metazeng. Ne heini is paag̵i, ne pinaag̵i te kedtuu zà. Su zuen insurat he Lalag te Megbevayà he edhenduen te, “Is etew he nehimu he metazeng pinaag̵i te kedtuu zin, ne iyan ebeg̵ayan te untung he wazè din pidtemanan.”

Ruma 1:7

Ne tenged kayi, ebpesuratan ku sikiyu is langun diyan te inged he Ruma he mahal ziyà te g̵ehinawa te Megbevayà he midhimu zin he menge sakup din. Is Amey tew he Megbevayà wey is Nengazen tew he si Jesu Kristu, berakat he ikeg̵ag̵ew kew zan wey iveg̵ey keniyu is melinawen he kebpekesavuk.

Ruma 10:10

Su pinaag̵i te isip ta ke edtuu ki ed-isipen ki te Megbevayà he metazeng, ne zutun ebpenudtulen ta ziyà te zuma is kedtuu ta ne human egkeheg̵et is kedlibriya kenita te silut.

Ruma 10:15

Ne wey zà egkehimu is ebpenudtul ke edsug̵uen sikandin te Megbevayà. Ne zuen iyan midsug̵ù te Megbevayà su iring te migkag̵i ziyà te insurat he Lalag te Megbevayà he “Utew igkeg̵alew is kebpekeuma te menge etew he edsangyew te Meupiya he Tudtulanen.”

Ruma 14:17

Su is kedhedii kenita te Megbevayà, ne kenà pinaag̵i te kedtumana ta te menge sug̵ù mehitenged te menge keenen wey inumen he idawey, kekenà, pinaag̵i te kebpeketezenga kenita te Megbevayà he metazeng wey pinaag̵i te melinawen he kebpekidepitè ta te menge zuma ta, wey pinaag̵i zaan te kelipey he ibeg̵ey te Wag̵as he Mulin-ulin.

Ruma 15:13

Is Megbevayà he iyan puunà te langun he meupiya he ebpeebuten tew, berakat he veg̵ayi kew zin te utew zekelà he kelipey wey melinawen he kebpekesavuk tenged te kedtuu niw kandin su wey pinaag̵i te g̵ehem te Wag̵as he Mulin-ulin meheg̵et is kebpeebuta niw te langun he meupiya he egkezawat niw keuzemà.

Ruma 15:33

Is Megbevayà he iyan puunà te kelinew, berakat he ulini kew zin.

Ruma 3:22

Ed-isipen kiw te Megbevayà he metazeng emun edtuuwan tew si Jesu Kristu. Is minsan hentei he etew, ne ed-isipen te Megbevayà he metazeng emun edtuuwan din si Jesu Kristu su wazà ibpelavi te Megbevayà te minsan hentei he etew.

Ruma 3:30

Su sebsevaha zà is Megbevayà ne ed-isipen din is menge Hudiyu he metazeng emun edtuuwan dan si Jesus. Ne is menge etew he kenà Hudiyu, ed-isipen din daan sikandan he metazeng emun edtuuwan dan si Jesus.

Ruma 4:5

Ne kenà iring dutun is ked-isipa te Megbevayà kenita he metazeng su g̵ag̵ew zà kenita. Umba mid-isip ki te Megbevayà he metazeng, kenà tenged te midtuman ta is mibpeveelan din kenita, kekenà, tenged dà te midtuuwan ta sikandin is ebpekehimu he mebmetazeng is menge mesinupaken.

Ruma 5:11

Ne kenà duen dà taman su utew zekelà is kelipey ta tenged te g̵ag̵ew kenita te Megbevayà he impeehè din pinaag̵i te Nengazen tew he si Jesu Kristu, ne pinaag̵i zaan kandin nehimu ki en he emig̵u te Megbevayà.

Ruma 5:18

Ne iring din ded daan, egkeehè ta he tenged te sevaha he mezaat he mid-ulaula ni Adan, nehukuman is langun he menge etew te silut, iyan, tenged te sevaha zaan he metazeng he mid-ulaula ni Jesu Kristu he iyan is kebpehimatey zin, egkehimu he ed-isipen te Megbevayà he metazeng is langun he menge etew he edtuu ne ibeg̵ey kandan is untung he wazà pidtemanan.

Ruma 6:23

Ke zuen etew he ebpevayàbayà te suat te mekesesalà he lawa zin ne zuen silut kandin he iyan is kemetayen he wazè din pidtemanan. Iyan, is etew mulà he edtuuwan din si Jesu Kristu he Nengazen tew, duen ibeg̵ey kandin te Megbevayà he iyan is untung he wazè din pidtemanan.

Ruma 9:30

Ne iyan ibpesavut ku kayi is: is menge etew he kenà menge Hudiyu, minsan pa te wazà metag̵ù diyà te isip dan he egkehimu he meisip sikandan he metazeng te Megbevayà, duen menge zuma kandan he pinaag̵i te kedtuu zan mid-isip sikandan gihapun he metazeng.

Gelasya 2:16

Ne minsan pa zutun, netuenan ta he kenè ki egkeisip he metazeng te Megbevayà pinaag̵i te kedtumana ta te kesug̵uan he imbilinbilin ni Moises, kekenà, pinaag̵i zà te kedsarig ta ki Jesu Kristu. Sikita is Hudiyu, nekesarig ki zaan ki Jesu Kristu su wey pinaag̵i te kedtuu ki Jesu Kristu meisip ki zaan te Megbevayà he metazeng. Netuenan ta he kenà heini egkehimu pinaag̵i te kedtumana te kesug̵uan. Su wazà minsan hentei he ed-isipen he metazeng te Megbevayà tenged te kedtumana zin te kesug̵uan.

Gelasya 3:25

Ne g̵untaan, te impezayag en kenitew is paag̵i he iyan is kedtuu, kenè kiw en egkeveyveyaan te kesug̵uan.

Gelasya 5:22

Egketuusan ta zaan is menge ulaula he egkehimu pinaag̵i te g̵ehem te Wag̵as he Mulin-ulin. Su emun ed-uwiten ki te Wag̵as he Mulin-ulin, mahal zini te g̵ehinawa ta is menge zuma ta, layun ki egkelipey, melinawen layun is gehinawa ta, mepelevayen ki, belig̵eg̵awen ki, metulanged ki, metinumanen ki,

Ipisu 2:7

Umba mid-ulaula zin heini su wey ikepeehè din kenitew is utew lavew he kezekelà te g̵ag̵ew zin wey kedtavang din kenitew pinaag̵i ki Jesu Kristu te wazè din pidtemanan.

Pilipus 3:9

su wey a zaan meisip te Megbevayà he metazeng tenged ki Kristu. Wazà a meisip he metazeng pinaag̵i te kediey zà he ulaula te kedtumana te kesug̵uan, su mibpeketazeng a te Megbevayà pinaag̵i te kedtuu ku ki Kristu. Heini is kebmetazeng, ne idtuvad kenita te Megbevayà emun edtuu ki ki Kristu.

Kulusas 1:20

Ne egkesuatan din daan he pinaag̵i te Anak din meked-uliey te meupiya he kedepità sikandin wey is minsan hentei zini te tanà wey ziyà te langit. Ne pinaag̵i te kedtig̵is duen te lengesa te Anak din diyà te krus egkehimu he menge emig̵u zin is minsan hentei.

Kulusas 3:15

Ne kinahanglan daan, he iyan niw ipelavi ziyà te g̵ehinawa niw is kelinew he ibeg̵ey ni Kristu su umba midhimu kiw he tumutuu te Megbevayà su wey kiw mebmelinawen su nesevaha kiw is menge tumutuu. Ne layun niw peselemati te Megbevayà is gag̵ew zin keniyu.

1 Tiselunika 5:23

Is Megbevayà, ne iyan ebeg̵ey te kelinew, berakat he purungi zin lumpiyuwi is ulaula niw. Lig-eni zin is tivuuk he g̵ehinawa niw, isip niw, wey lawa niw su para wazà igkesewayi keniyu keuzemà te kedlikù te Nengazen tew he si Jesus.

2 Tiselunika 3:16

Berakat he iveg̵ey keniyu te Nengazen is melinawen he g̵ehinawa te minsan keenu he timpu wey te minsan hengkey is kebpekesavuk niw. Iyan sikandin ebeg̵ey te kelinew. Dumahi kew is langun te Nengazen.

Hibriyuhanen 13:20

Is Megbevayà, mibanhew zin is Nengazen tew he si Jesus. Midtig̵is is lengesa zin he iyan tuus te veg̵u wey wazà pidtemanan he paag̵i te kebpekidsevaha tew te Megbevayà. Ne tenged dutun nehimu si Jesus he mekeg̵eg̵ehem he ed-elima kenitew te menge kerehidu zin.