Ruma 3:31 - Manobo Western Bukidnon

³¹ Ibpesavut ku he iyan dà ketezengan ke maan is ed-isipen ki zin he metazeng is kedtuu ta, iyan, kenè niw isipa he tenged kayi wazè en pulus te menge sug̵ù te Megbevayà su tenged te kedtuu ta ki Jesus, hustu en dutun is kegketumana ta te menge sug̵ù din.

Ruma 3:31 Кръстосани препратки

Mateo 15:6

Ne zutun,” ke si Jesus, “sumalà is penurù niw, wazè en kinahanglan he ebeg̵ayan din pa te tavang is ginikanan din. Iyan heini paag̵i niw wey niw kenà metuman is Lalag te Megbevayà wey niw iyan metuman haazà is keniyu he penurù.

Mateo 3:15

Ne midtavak si Jesus, ke sikandin te, “Kenà, su kinahanglan he ebeelan ta is iring kayi wey ta meveeli is langun he egkesuatan te Megbevayà.” Ne zutun human mebpezumazuma si Juan, ne mibewtismuwan din si Jesus.

Mateo 5:17

Kenè niw isipa he iyan inhendini ku te kelibutan is id-awè ku kes kesug̵uan he imbeg̵ey kenitew pinaag̵i ki Moises wey kes menge penurù dengan he imbeg̵ey pinaag̵i te menge ebpeneuven te Megbevayà. Umba nekehendini a su wey mepurungi te edtuman.

Mateo 5:20

Egkeg̵iyan ku sikiyu he wey kew zà egkehedii te Megbevayà ke edtumanen niw is egkesuatan te Megbevayà ne kinahanglan daan he lavew kew pa he metinumanen kenà is menge menunudlù te kesug̵uan wey is menge Perisiyu.

Lucas 20:16

Iyan is: ebeyaan din haazà is menge etew ne ebpenhimetayan din, ne ebpeelimahan din haazà is perasan din te selakew en maan he menge etew.” Ne hein nezineg dutun te menge etew he ebpemineg ki Jesus ne utew zan neseeng ne ke sikandan te, “Kenà heeyan ed-ul-ulahan te Megbevayà!”

Ruma 10:4

Su midhimu ni Kristu he wazè en pulus te kedsarig te kedtuman te kesug̵uan su wey is minsan hentei, pinaag̵i zà te kedtuu ki Kristu, ebpeketezengen sikandin te Megbevayà.

Ruma 2:20

Kunaan niw ke iyan kew ebpekepenurù te menge etew he wazà mesayud te Megbevayà, ne kunaan niw zaan ke iyan kew ebpekepenudlù te menge etew he sikan pa mekeistudyu te hustu. Umba iyan heini ed-isipen niw su insarig keniyu te Megbevayà is kesug̵uan ne utew hustu is ketau wey utew tutuu is tuluuwen he ebpuun dutun.

Ruma 3:4

Su minsan ke teruen is tivuuk he menusiyà, tutuu mulà is minsan hengkey he egkeg̵iyen te Megbevayà. Su zuen insurat dengan he lalag ni Hadì David te kedtistig̵usi zin te ketazeng te Megbevayà he edhenduen te, “Kenà egkehimu he kenà hustu is kenikew he ketezengan, su ke idsumbung ka, layun ebpekezaag is kenikew he ketezengan,” ke si David.

Ruma 3:6

Su kenà egkehimu he kenà metazeng is Megbevayà su emun kenà sikandin metazeng, kenà egkehimu he iyan sikandin edhukum keuzemà te tivuuk he menusiyà.

Ruma 4:14

Su emun iyan dà ebpekezawat kayi te impenaad te Megbevayà is etew he edtuman te kesug̵uan, wazè en pulus te kedtuu tew te Megbevayà, ne wazè en daan pulus te penaad te Megbevayà su wazà minsan hentei he ebpeketuman te kesug̵uan.

Ruma 7:22

Ne sumalà is egkesuatan te g̵ehinawa ku, utew ku pezem egkesuati is kedtumana te egkesuatan te Megbevayà.

Ruma 7:25

Ne utew zekelà is kebpeselemati ku te Megbevayà su pinaag̵i te Nengazen tew he si Jesu Kristu nevelukasan e en! Ne egkesavut niw en is egkeulaula ku. Su sakup is gehinawa ku te Megbevayà, ne is lawa ku, ne sakup mulà te mezaat he kebayè din.

Ruma 8:4

Umba mid-ulaula heini te Megbevayà su wey ki meketuman te hustu sumalà is insug̵ù te kesug̵uan. Ne egkehimu heini su wazè en kinahanglan he edtumanen ta is mezaat he suat te lawa ta, kekenà, ebpeketuman ki te hustu su edtevangan ki te Wag̵as he Mulin-ulin.

1 Kurintu 9:21

Ne ziyà te menge etew he kenà menge Hudiyu, emun iyan sikandan menge zuma ku ne kenè ku en maan ed-ul-ulahan is kesug̵uan he ebentayan te menge Hudiyu su ed-ul-ulahan ku is menge ulaula te kenà menge Hudiyu su wey ku sikandan maag̵ak ne ebpeketuu zan ki Jesus. Wazè ku engkezi is menge sug̵ù te Megbevayà su edtumanen ku is menge sug̵ù ni Kristu.

Gelasya 2:19

Siak, nesavut ku en he kenà a egkeveg̵ayan te untung he wazè din pidtemanan pinaag̵i te kedtumana ku te kesug̵uan, ne tenged dutun mid-engkezan ku is kedsarig ku te kedtumana ku te kesug̵uan su wey ku iyan metuman is menge sug̵ù te Megbevayà.

Gelasya 2:21

Kenà egkehimu he kenè ku edewaten is gag̵ew te Megbevayà kedì su ke egkehimu he ed-isipen ki zin he metazeng pinaag̵i te kedtumana ta te kesug̵uan, wazè bes pulus te kebpehimatey ni Kristu!”