Ruma 3:27 - Manobo Western Bukidnon

²⁷ Umba, wazà igkezantal te minsan hentei. Kenè ki ebpekekag̵i he iyan ketezengan ke maan is ed-isipen ki te Megbevayà he metazeng su midtuman ta is kesug̵uan su iyan idewata kenita te Megbevayà is kedtuu ta ki Jesus.

Ruma 3:27 Кръстосани препратки

Marcos 16:16

Ne sikan is edtuu kayi wey ebpebewtismu, ebeg̵ayan te untung he wazà pidtemanan. Ne sikan is kenà edtuu ne edhukuman te silut.

Juan 3:36

Is minsan hentei he edtuu te Anak te Megbevayà, ebeg̵ayan sikandin te untung he wazà pidtemanan; is minsan hentei he kenà ebpemineg te menge sug̵ù te Anak te Megbevayà, kenà egkeveg̵ayan te untung he wazà pidtemanan, kekenà, wazà pidtemanan te kegkepeuki kandin te Megbevayà.

Ruma 10:5

Iyan, duen insurat he lalag ni Moises mehitenged te kebpeketezenga te etew pinaag̵i te kedtumana te kesug̵uan he edhenduen te, “Is etew he iyan edserig̵an din is kedtumana zin te kesug̵uan, ne egkeveg̵ayan sikandin te untung he wazà pidtemanan emun wazà minsan hengkey he sayep dutun te kebpurungi zin kedtumana te minsan hengkey he insug̵ù dutun te kesug̵uan,” ke si Moises.

Ruma 11:6

Umba mibpilì din sikandan su tenged dà te g̵ag̵ew zin kandan ne kenà tenged te mid-ulaula zan te egkesuatan din. Ne emun suhul kandan haazà is kebpilia zin kandan tenged te menge ulaula zan he meupiya, ne kenà egkehimu he tenged te g̵ag̵ew zin dà mibpilì din sikandan.

Ruma 2:17

Ne sikiyu zaan is menge zuma ku he menge Hudiyu, kunaan niw ke egkeserig̵an niw is kedtumana niw te kesug̵uan ne ibpezalig niw is upakat niw te Megbevayà.

Ruma 2:23

Ibpezalig niw is kedtumana niw te kesug̵uan, iyan, edsupak kew g̵ihapun te kesug̵uan, ne tenged kayi egkesudian is Megbevayà.

Ruma 3:19

Ne netuenan ta he is ibpesavut kenita kayi te Lalag te Megbevayà, ne ibpesavut daan diyà te menge etew he nesakup te kesug̵uan he iyan key is menge Hudiyu. Ne pinaag̵i kayi egketuenan ta he wazà minsan hentei he etew he ebpekekag̵i he kenà sikandin dait he edsilutan su nekesupak te Megbevayà is tivuuk he menusiyà.

Ruma 3:26

Iyan, kinahanglan he zuen silut tenged te menge salà te menusiyà, umba midsilutan din si Jesus. Ne tenged dutun egketuenan tew he metazeng is kedhukum te Megbevayà ne tenged kayi egkehimu he ed-isipen din he metazeng is minsan hentei he edtuu ki Jesus.

Ruma 4:2

Netuenan ta he kenà iyan ketezengan ke maan is mid-isip te Megbevayà sikandin he metazeng su wazè din mesupak is egkesuatan te Megbevayà. Su ke wazà supak din, tutuu iyan he zuen din igkezantal. Iyan, netuenan ta he nekesupak gihapun si Abraham ne tenged dutun wazè din iyan igkezantal ziyà te etuvangan te Megbevayà.

Ruma 7:21

Ne layun iring kayi is egkehitavù dini te kedì, ne emun ed-ulaula a pezem te meupiya, egkeeg̵en a te mezaat he kebayà he zini te lawa ku.

Ruma 7:23

Iyan, dini te lawa ku, selakew is ebayàbayà kedì su edsug̵uen a te menge mezaat he kebayà te lawa ku he supaka ku is hustu he ulaula he egkesuatan te g̵ehinawa ku. Uripen a te mezaat he kebayè ku, ne ebpeketuman a te suat te lawa ku.

Ruma 7:25

Ne utew zekelà is kebpeselemati ku te Megbevayà su pinaag̵i te Nengazen tew he si Jesu Kristu nevelukasan e en! Ne egkesavut niw en is egkeulaula ku. Su sakup is gehinawa ku te Megbevayà, ne is lawa ku, ne sakup mulà te mezaat he kebayè din.

Ruma 8:2

Su pinaag̵i te kebpekidsevaha ta ki Jesu Kristu imbeg̵ey kenita te Wag̵as he Mulin-ulin is beg̵u en he untung ne tenged kayi nelibri ki en te kebpekesalè ta he iyan edungguan din is kemetayen he wazè din pidtemanan.

Ruma 9:11

Ne si Rebecca, hein meg̵aan en ed-anak, migkeg̵iyan sikandin te Megbevayà, ke sikandin te, “Sulug̵uen is kakey te hazi zin.” Migkag̵i zin heini te wazè pa ianak haazà is sereping, ne wazè pa ulaula zan he mezaat wey meupiya. Ne umba neulaula heini su ibpesavut te Megbevayà he is kebpilia zin te menge etew, ne kenà tenged te menge meupiya he ulaula he nehimu zan, kekenà, tenged dà te iyan egkesuatan din.

Ruma 9:31

Iyan, is menge kevuwazan ni Israyil, kunaan dan ke egkehimu sikandan he metazeng pinaag̵i te kedserig̵i zan te kedtumana te kesug̵uan, ne nasì wazà heini mehimu.

Ruma 9:32

Ne maan is wazà heini mehimu? Su iyan dan midserig̵an is keugelingen dan he menge ulaula he meupiya ne wazè dan medtuu ki Jesu Kristu. Ne tenged kayi nehimu sikandan he iring te menge etew he nekesipà te zekelà he vatu ziyà te zalan.

1 Kurintu 4:7

Kunaan niw vuwa ke lavew kew te menge zuma he tumutuu ki Kristu. Is dekelà he kedsavut niw, ne kunaan niw vuwa ke zaan heini ziyan te keniyu ne wazà iveg̵ey keniyu te Megbevayà! Su emun netuenan niw he imbeg̵ey zà heini keniyu, maan is idantal niw?

Gelasya 2:16

Ne minsan pa zutun, netuenan ta he kenè ki egkeisip he metazeng te Megbevayà pinaag̵i te kedtumana ta te kesug̵uan he imbilinbilin ni Moises, kekenà, pinaag̵i zà te kedsarig ta ki Jesu Kristu. Sikita is Hudiyu, nekesarig ki zaan ki Jesu Kristu su wey pinaag̵i te kedtuu ki Jesu Kristu meisip ki zaan te Megbevayà he metazeng. Netuenan ta he kenà heini egkehimu pinaag̵i te kedtumana te kesug̵uan. Su wazà minsan hentei he ed-isipen he metazeng te Megbevayà tenged te kedtumana zin te kesug̵uan.

Gelasya 3:22

Iyan, impesavut kenitew te insurat he Lalag te Megbevayà he sikitew is tivuuk he menusiyà, sakup kiw en pudu te mezaat he kebayè tew. Ne tenged kayi, wey zà edtumana te Megbevayà is menge penaad din kenita ke edsarig kiw kandin. Wey kiw zà egkeveg̵ayi te untung he wazà pidtemanan ke zuen tew kedtuu.