Ruma 3:25 - Manobo Western Bukidnon

²⁵ Midsug̵ù sikandin te Megbevayà wey mehimu sikandin he pemuhat he elili kenitew, ne tenged te kegkepelisi kenitew te lengesa zin ebpeseyluwen te Megbevayà is menge salè tew emun edtuuwan tew sikandin. Midhimu heini te Megbevayà su wey tew mesavut he metazeng is hukum din, minsan pa zengan tenged te meinentusen sikandin, wazè din dè pa siluti is menge etew tenged te menge salè dan.

Ruma 3:25 Кръстосани препратки

Juan 6:47

Utew venar is egkeg̵iyen ku he is etew he edtuu kediey, naangken din en is untung he wazà pidtemanan.

Nengeulaula 14:16

Dengan intug̵ut din kenitew te tivuuk he menusiyà he ed-ul-ulahan tew is sumalà te egkesuatan tew, minsan ke wazà pulus dutun.

Nengeulaula 15:18

Lalag heini te Nengazen; impesavut din en heini zengan.

Nengeulaula 17:30

Dengan hein wazè pa sikandin mekilala te menusiyà, mibpesagdan din is mezaat he ulaula te menge etew, iyan, guntaan indawey zin en te langun he menge etew te minsan hendei he ibpeiniyug̵an is memezaat he ulaula.

Nengeulaula 2:23

Ne heini si Jesus, impalad te etew keniyu. Ne zaan he netuenan heini te Megbevayà su iyan imbanglis din ki Jesus. Impehimetayan niw sikandin te menge etew he kenà ed-azap te Megbevayà. Ne inransang dan te krus.

Nengeulaula 3:18

Impesavut dengan te Megbevayà pinaag̵i te tagnà te ebpemeneuven din he edresayen te menge etew is mibpilì din he ibpahadì. Ne midhimu zin he metuman heini pinaag̵i te mid-ulaula niw.

Nengeulaula 4:28

Ne mid-uyunan dan ke hengkey is ed-ul-ulahan dan diyà te kandin sumalà is imbanglis nu he meulaula zan.

Ruma 2:4

Kunaan nu vuwa ke g̵eina te utew mepelevayen wey metulanged is Megbevayà, ne kenè en kinahanglan he ebpezumdumahan nu is menge lalag din. Iyan, iyan ketezengan ke maan is utew velig̵eg̵awen is Megbevayà su ed-eg̵aken ke zin su wey nu meiniyug̵i is mezaat he ulaula.

Ruma 3:26

Iyan, kinahanglan he zuen silut tenged te menge salà te menusiyà, umba midsilutan din si Jesus. Ne tenged dutun egketuenan tew he metazeng is kedhukum te Megbevayà ne tenged kayi egkehimu he ed-isipen din he metazeng is minsan hentei he edtuu ki Jesus.

Ruma 5:1

Guntaan, tenged te midtuu ki en ki Jesus, mid-isip ki en te Megbevayà he metazeng he iring te wazè ki keenu mekesalà, ne tenged kayi pinaag̵i te mid-ulaula te Nengazen tew he si Jesu Kristu melinew en is kedepitè tew te Megbevayà.

Ruma 5:11

Ne kenà duen dà taman su utew zekelà is kelipey ta tenged te g̵ag̵ew kenita te Megbevayà he impeehè din pinaag̵i te Nengazen tew he si Jesu Kristu, ne pinaag̵i zaan kandin nehimu ki en he emig̵u te Megbevayà.

Ruma 5:18

Ne iring din ded daan, egkeehè ta he tenged te sevaha he mezaat he mid-ulaula ni Adan, nehukuman is langun he menge etew te silut, iyan, tenged te sevaha zaan he metazeng he mid-ulaula ni Jesu Kristu he iyan is kebpehimatey zin, egkehimu he ed-isipen te Megbevayà he metazeng is langun he menge etew he edtuu ne ibeg̵ey kandan is untung he wazà pidtemanan.

Ruma 5:9

Ne emun pinaag̵i te kedtig̵is te lengesa ni Kristu mid-isip kiw en te Megbevayà he metazeng, wey kiw pe be kenà melibri tenged ki Kristu te silut keuzemà te Megbevayà.

1 Kurintu 5:7

Is mezaat he ulaula, ne iring te tapey su ke ed-ulaula is sevaha te mezaat egkeuwit din daan is mezakel he menge zuma zin. Kinahanglan he iawè niw ziyan te keniyu is daan he tapey su wey wazà mezaat diyan te keniyu. Emun edtumanen niw heini ne egkeiringan niw is beg̵u en he supas he wazè din tapey. Netuenan ku he zaan kew en he iring kayi tenged te kedtuu niw ki Kristu. Su si Kristu, iring sikandin te nati he kerehidu he ibpemuhat emun Pista te Kedlevayi su impemuhat en sikandin wey kiw melibri.

2 Kurintu 5:21

Wazà minsan hengkey he mezaat he ulaula ni Kristu, iyan, midhimu te Megbevayà he iyan sikandin midsilutan tenged te salè tew su wey pinaag̵i te kebpekidsevaha tew kandin, egkehimu he ed-isipen kiw he metazeng te Megbevayà.

Ipisu 1:7

Su tenged te utew zekelà is gag̵ew zin kenitew, midlibri kiw zin te silut pinaag̵i te kedtig̵is te lengesa zutun te kebpehimatey ni Kristu, ne mibpesaylu zin is menge salè tew.

Ipisu 2:13

Iyan, guntaan, tenged te nekidsevaha kew en ki Jesus, sikiyu is menge etew he utew meziyù te Megbevayà dengan, impeuvey kew zin en tenged te kebpelisi keniyu te lengesa ni Jesus dutun te kebpehimatey zin.

1 Timoteo 1:15

Duen erubasa he utew tutuu ne kinahanglan he tuuwi te minsan hentei; ne iyan is: “Midhendini si Jesu Kristu te kelibutan wey zin libriya te silut is menge mekesesalà.” Ne siak, iyan a tuwas he lalung te langun kandan.

Hibriyuhanen 10:4

Su kenà egkehimu te minsan hengkey he paag̵i he igkeawà te menge salè tew is lengesa te menge vaka wey menge kambing.

Hibriyuhanen 11:14

Ne is menge etew he iring kayi g̵untaan, kenè dan ed-isipen he iyan hustu he inged dan heini is kelibutan, kekenà, ebperetengen dan he zuen selakew he inged he iyan hustu he inged dan.

Hibriyuhanen 11:17

Netuenan ta he impenaad te Megbevayà ki Abraham he pinaag̵i te anak din he si Isaak egkehimu he utew mezakel is kevuwazan din. Ne hein migezaman te Megbevayà is kedtuu ni Abraham, migkeg̵iyan din si Abraham he ipemuhat din si Isaak. Iyan, utew zekelà is kedtuu ni Abraham te penaad te Megbevayà ne tenged dutun wazè din isipa he kenà egkehimu he kenè din ibpemuhat si Isaak.

Hibriyuhanen 11:7

Ne zuen daan kedtuu ni Noe su hein midleg̵uyan sikandin te Megbevayà te limas he egkehitavù, midtuuwan din, minsan te wazè din pa maahà haazà is limas. Ne mibeelan din is dekelà he avang he egngezanan te arka ne hein midlapey is dag̵at, nelibri sikandin wey is pemilya zin ne wazè dan melened. Ne pinaag̵i zutun te kedtuu zin, impesavut din he zait he edlimasen te Megbevayà is tivuuk he mekesesalà he menusiyà. Ne zutun mid-isip sikandin te Megbevayà he metazeng tenged te midtuuwan din is migkag̵i te Megbevayà.

Hibriyuhanen 9:28

Ne si Kristu zaan, kesevaha zà is kebpehimatey zin he iyan kebpemuhata zin te lawa zin wey zin maawà is menge salà te utew mezakel he menge etew. Ne ed-uman pa ebulus si Jesus dini te kelibutan, kenà te ked-ewaa zin te menge salè tew, kekenà, edhimesazen din is kedlibriya zin te langun he utew zekelà is perateng dan kandin.

Hibriyuhanen 9:5

Ne insihung haazà is kavan dutun te zezuwa he ledawan te menge mekeg̵eg̵ehem he kedesenan he iyan tuus he zutun is Megbevayà. Mibekar zan is pakpak dan ne intezung dan dutun te vulawan he vangkù he zutun ebpelisa te Megbevayà is menge salà te menge etew. Ne kayi zà taman heini su kenè en egkehimu he id-amin ku te edseysey is langun kayi.

1 Juan 1:10

Iyan, ke egkag̵i ki he wazè ki mekesalà, henduen be te migkag̵i ki he teruen is Megbevayà ne wazè ki mebpezumazuma te lalag din.

1 Juan 2:2

Iyan sikandin impemuhat tenged kenitew wey mepalis is menge salè tew, ne kenè kenitew zà he salà is egkepalis, kekenà, is menge salà daan te tivuuk he menusiyà.

1 Juan 4:10

Is tutuu he g̵ag̵ew, kenà iyan is kebmahala tew te Megbevayà, kekenà, iyan is kebmahala zin kenitew wey is kebpehendiniya zin te Anak din su wey pinaag̵i te kebpehimatey zin mepesaylu is menge salè tew.

Impezayag 13:8

Ed-ezapen haazà is langgam te langun he menge etew zini te kelibutan he wazà ikesurat is ngazan dan diyà te libru he zutun ilista is menge etew he ebeg̵ayan te untung. Iyan haazà kes libru zuen te nati he kerehidu he zengan dà imbanglis is kebpehimatey zin te wazè pa tukuza is kelibutan.

Impezayag 20:15

Is minsan hentei zutun he wazà ilista is ngazan din diyà te libru te untung, in-agbur zaan sikandin diyà te ranew he egkeregreg.

Impezayag 5:9

Ne egkanta zan te veg̵u en he kentahan, ke sikandan te, “Dait ka he egkuwa te velesahan wey ed-awà te menge tiyap din su mibpehimatey ka ne imbelukas nu is lengesa nu te menge etew wey maangken sikandan te Megbevayà. Ebpemuun sikandan diyà te minsan hengkey he kepuun wey kineg̵iyan wey tribu wey g̵inhedian.