Ruma 3:22 - Manobo Western Bukidnon

²² Ed-isipen kiw te Megbevayà he metazeng emun edtuuwan tew si Jesu Kristu. Is minsan hentei he etew, ne ed-isipen te Megbevayà he metazeng emun edtuuwan din si Jesu Kristu su wazà ibpelavi te Megbevayà te minsan hentei he etew.

Ruma 3:22 Кръстосани препратки

Lucas 15:22

Iyan, haazà is amey zin, mid-umew zin is menge sulug̵uen din dutun te valey, ne ke sikandin te, ‘Ihated niw pa zini sikan is meupiya he ugelingen, ne isun-ud niw ziyà te kandin. Sisingi niw is tezù din wey sun-uzi niw te sepatus is menge paa zin.

Nengeulaula 11:12

Ne migkeg̵iyan a te Wag̵as he Mulin-ulin he ibpezume e zin dutun te menge etew ne kenà a melenew te keduma kandan. Heini zaan is heenem he tumutuu he menge zuma tew he Hudiyu is miduma kedì diyà te Sisarya. Ne midseled key ziyà te valey ni Cornelio.

Nengeulaula 15:9

Wazà daan isipa te Megbevayà he zuen kebpekeviza te kenà menge Hudiyu kenitew su tenged te kedtuu zan mibpesaylu zin sikandan te menge ulaula zan he mezaat iring te kebpesaylu zin dini te kenitew.

Nengeulaula 3:16

Ne iyan nekeulì kayi te kenà ebpekehipanew is gehem te ngazan ni Jesus. Heini is etew he kilala niw he neehè niw g̵untaan, tenged te kedtuu zey ki Jesus neulian heini kayi te etuvangan niw su nekesarig key te g̵ehem te ngazan ni Jesus.

Ruma 1:17

Su pinaag̵i te Meupiya he Tudtulanen ibpetuenan kenitew te Megbevayà is paag̵i wey kiw zin meisip he metazeng. Ne heini is paag̵i, ne pinaag̵i te kedtuu zà. Su zuen insurat he Lalag te Megbevayà he edhenduen te, “Is etew he nehimu he metazeng pinaag̵i te kedtuu zin, ne iyan ebeg̵ayan te untung he wazè din pidtemanan.”

Ruma 10:12

Su is Nengazen, wazè din ibpelavi te minsan hentei he etew, minsan ke Hudiyu wey ke kenà be Hudiyu, ne umba wazè din ibpelavi kayi su Nengazen sikandin te minsan hentei ne edtevangan din is minsan hentei he etew he ebpetavang kandin.

Ruma 10:4

Su midhimu ni Kristu he wazè en pulus te kedsarig te kedtuman te kesug̵uan su wey is minsan hentei, pinaag̵i zà te kedtuu ki Kristu, ebpeketezengen sikandin te Megbevayà.

Ruma 2:1

Netuenan ta he utew metazeng is idsiluti te Megbevayà te menge etew he ed-ulaula te menge mezaat he iring kayi, iyan, sikew is egkag̵i he utew mezaat heini is menge ulaula kayi te menge etew, wazè nu zaan kebpekeg̵awas su edsudien nu is mezaat he ulaula te zuma, iyan, mezaat daan is ed-ul-ulahan nu. Ne tenged kayi zutun te kedsudia nu kandin, nesudì nu zaan is kenikew he ulaula.

Ruma 3:30

Su sebsevaha zà is Megbevayà ne ed-isipen din is menge Hudiyu he metazeng emun edtuuwan dan si Jesus. Ne is menge etew he kenà Hudiyu, ed-isipen din daan sikandan he metazeng emun edtuuwan dan si Jesus.

Ruma 4:16

Umba midhimu te Megbevayà he egkezawat tew is impenaad din pinaag̵i zà te kedtuu tew su wey mehimu heini pinaag̵i te g̵ag̵ew zin, ne kenà pinaag̵i te ed-ul-ulahan tew. Ne tenged kayi kenè en ebperis he egkezawat tew te langun he menge kevuwazan ni Abraham is impenaad te Megbevayà. Ne kenà iyan dà ebpekezawat is menge Hudiyu he nesakup te kesug̵uan, kekenà, elin daan is minsan hentei he zuen din kedtuu he iring ki Abraham su nehimu si Abraham he kepuun te langun he edtuu, Hudiyu se kenà Hudiyu.

Ruma 8:1

Ne sikita is nekidsevaha ki Jesu Kristu, kenè ki en egkehukuman te silut.

Ruma 9:30

Ne iyan ibpesavut ku kayi is: is menge etew he kenà menge Hudiyu, minsan pa te wazà metag̵ù diyà te isip dan he egkehimu he meisip sikandan he metazeng te Megbevayà, duen menge zuma kandan he pinaag̵i te kedtuu zan mid-isip sikandan gihapun he metazeng.

1 Kurintu 12:13

Ne sikitew is langun, Hudiyu se kenà Hudiyu, sulug̵uen se kenà sulug̵uen, ne pudu kiw mibewtismuwan te sevaha zà he Wag̵as he Mulin-ulin; ne pinaag̵i kayi nehimu kiw en he sevaha zà he lawa, ne mid-ulinan kiw pudu te sevaha zà he Wag̵as he Mulin-ulin.

1 Kurintu 4:7

Kunaan niw vuwa ke lavew kew te menge zuma he tumutuu ki Kristu. Is dekelà he kedsavut niw, ne kunaan niw vuwa ke zaan heini ziyan te keniyu ne wazà iveg̵ey keniyu te Megbevayà! Su emun netuenan niw he imbeg̵ey zà heini keniyu, maan is idantal niw?

Gelasya 2:16

Ne minsan pa zutun, netuenan ta he kenè ki egkeisip he metazeng te Megbevayà pinaag̵i te kedtumana ta te kesug̵uan he imbilinbilin ni Moises, kekenà, pinaag̵i zà te kedsarig ta ki Jesu Kristu. Sikita is Hudiyu, nekesarig ki zaan ki Jesu Kristu su wey pinaag̵i te kedtuu ki Jesu Kristu meisip ki zaan te Megbevayà he metazeng. Netuenan ta he kenà heini egkehimu pinaag̵i te kedtumana te kesug̵uan. Su wazà minsan hentei he ed-isipen he metazeng te Megbevayà tenged te kedtumana zin te kesug̵uan.

Gelasya 2:20

Tenged te kedsarig ku ki Kristu, inransang a te krus duma kandin su elili ku sikandin. Minatey a, iyan, uuyag a g̵ihapun su zini ed-ubpà te kediey si Kristu ne heini is kebpengungubpaan ku zini te kelibutan, pinaag̵i zà te kedsarig ku kandin te Anak te Megbevayà. Mahal a ziyà te g̵ehinawa zin ne mibpehimatey sikandin he elili kediey su wey a melibri.

Gelasya 3:22

Iyan, impesavut kenitew te insurat he Lalag te Megbevayà he sikitew is tivuuk he menusiyà, sakup kiw en pudu te mezaat he kebayè tew. Ne tenged kayi, wey zà edtumana te Megbevayà is menge penaad din kenita ke edsarig kiw kandin. Wey kiw zà egkeveg̵ayi te untung he wazà pidtemanan ke zuen tew kedtuu.

Gelasya 3:28

Ne tenged dutun kinahanglan he kenè niw isipa he ibpelavi te Megbevayà is menge Hudiyu, ne emun kenà, ne iyan is kenà menge Hudiyu, su ziyà te kandin neked-iiring is langun he menge etew, uripen se kenà uripen, maama se vahi, ne sikiyu zaan, neked-iiring kew ziyà te Megbevayà su neked-iiring kew he edtuu ki Jesu Kristu.

Ipisu 3:12

Ne g̵untaan tenged te kebpekidsevaha tew ki Jesus wey pinaag̵i te kedsarig tew kandin, egkehimu en he ebpekeetuvang kiw te Megbevayà pinaag̵i te ked-ampù ne wazè en igkeeled tew kandin.

Pilipus 3:9

su wey a zaan meisip te Megbevayà he metazeng tenged ki Kristu. Wazà a meisip he metazeng pinaag̵i te kediey zà he ulaula te kedtumana te kesug̵uan, su mibpeketazeng a te Megbevayà pinaag̵i te kedtuu ku ki Kristu. Heini is kebmetazeng, ne idtuvad kenita te Megbevayà emun edtuu ki ki Kristu.

Kulusas 3:11

Ne tenged kayi, sikita is midhimu zin he veg̵u he etew, wazè ta zapit ibpelavi te etew he Hudiyu wey te etew he kenà Hudiyu su neked-iiring diyà te Megbevayà is nesirkunsidar wey is wazà mesirkunsidar; neked-iiring daan diyà te kandin is neketunghà wey is wazà meketunghà, is sulug̵uen wey is egalen. Dini te kenitew te menge veg̵u he etew, iyan dà lavew si Kristu ne midlumunan ni Kristu is kada sevaha kenitew.

Santiago 2:23

Ne tenged dutun egkesavut ta he utew tutuu sikan is insurat he Lalag te Megbevayà he edhenduen te, “Midtuu si Abraham te Megbevayà, ne tenged dutun te kedtuu zin, mid-isip sikandin te Megbevayà he metazeng.” Ne migeraran sikandin he Emig̵u te Megbevayà.