Ruma 2:14 - Manobo Western Bukidnon

¹⁴ Is menge etew he kenà menge Hudiyu, wazà sikandan mesayud te kesug̵uan he imbilinbilin ni Moises, iyan, duen timpu he egketuman dan is insug̵ù dutun te kesug̵uan su minsan pa te kenè dan egketuenan is kesug̵uan, duen diyà te g̵ehinawa zan ebpekepenurù kandan ke hengkey is meupiya he ed-ul-ulahan. Ne tenged dutun ebpekekag̵i ki he zuen kesug̵uan diyà te g̵ehinawa zan.

Ruma 2:14 Кръстосани препратки

Nengeulaula 10:35

su is meg̵inged te minsan hengkey he inged dini te kelibutan, emun edtehuzen din is Megbevayà wey metazeng is ulaula zin, edewaten sikandin te Megbevayà.

Nengeulaula 14:16

Dengan intug̵ut din kenitew te tivuuk he menusiyà he ed-ul-ulahan tew is sumalà te egkesuatan tew, minsan ke wazà pulus dutun.

Nengeulaula 17:30

Dengan hein wazè pa sikandin mekilala te menusiyà, mibpesagdan din is mezaat he ulaula te menge etew, iyan, guntaan indawey zin en te langun he menge etew te minsan hendei he ibpeiniyug̵an is memezaat he ulaula.

Ruma 1:32

Netuenan dan pezem he ke ed-ul-ulahan dan is menge iring kayi, edsilutan sikandan te kemetayen he wazè din pidtemanan, iyan ebpeniguduwan dan gihapun, ne kenà duen dà taman, su utew zan egkesuat emun egkeehè dan is ulaula te zuma he iring ded te kandan.

Ruma 2:12

Is menge etew he kenà menge Hudiyu, wazè dan metueni ke hengkey is insug̵ù te kesug̵uan he imbilinbilin ni Moises. Ne ke ebeelan dan is mezaat, edhukuman gihapun sikandan keuzemà te Megbevayà, iyan, kenè din egemiten is kesug̵uan dutun te kedhukumi zin kandan, ne idsilut din kandan is kemetayen he wazè din pidtemanan. Ne is menge etew he Hudiyu, netuenan dan mulà is insug̵ù dutun te kesug̵uan, ne emun ebeelan dan is mezaat, edhukuman sikandan te Megbevayà sumalà is nesupak dan dutun te kesug̵uan.

Ruma 2:15

Pinaag̵i te menge ulaula zan he meupiya egketuusan ta he ibpenurù kandan te g̵ehinawa zan is insug̵ù te kesug̵uan. Netuenan dan diyà te isip dan ke hengkey is meupiya wey ke hengkey is mezaat he ed-ul-ulahan su zuen ke egkeg̵iyen dan he meupiya is ulaula zan ne zuen ke keg̵iya zan he mezaat.

Ruma 2:27

Ne minsan ke kenà Hudiyu sikandin, pinaag̵i te kedtumana zin te kesug̵uan, igkepeehè din he edsilutan kew is menge Hudiyu te Megbevayà su edsupak kew mulà te kesug̵uan. Ne iyan kew pezem kes mibilvilinan te kesug̵uan ne iyan kew nesirkunsidar!

1 Kurintu 11:14

Su puun pa te zengan dà ne netuenan tew he utew igkeeled te maama ke melayat is bulvul zin he iring te vahi.

1 Kurintu 9:21

Ne ziyà te menge etew he kenà menge Hudiyu, emun iyan sikandan menge zuma ku ne kenè ku en maan ed-ul-ulahan is kesug̵uan he ebentayan te menge Hudiyu su ed-ul-ulahan ku is menge ulaula te kenà menge Hudiyu su wey ku sikandan maag̵ak ne ebpeketuu zan ki Jesus. Wazè ku engkezi is menge sug̵ù te Megbevayà su edtumanen ku is menge sug̵ù ni Kristu.

Ipisu 2:12

Netuenan niw he zengan wazè niw upakat ki Kristu ne wazè kew iragkes te menge etew he pinilì te Megbevayà. Wazè kew zaan mekeambit duen te menge meupiya he impenaad te Megbevayà kandan. Wazà egkepaabut niw he tavang te Megbevayà ne kenà duen dà taman su wazè niw metueni ke hentei is tutuu he Megbevayà dini te kelibutan.

Ipisu 2:3

Ne sikitew zaan, elin kiw zengan ebpen-ulaula te mezaat sumalà is mezaat he kebayà te lawa tew, wey is mezaat he isip tew. Ne tenged kayi neragkes kiw pa zutun te silut iring te zuma he menusiyà he kenà sakup te Megbevayà.

Pilipus 4:8

Ketepusan heini, menge suled, he menge lalag ku keniyu. Iyan niw itag̵ù diyà te isip niw is meupiya, is dait he igkezelig̵i, is tutuu he tuluuwen, is metazeng wey hustu wey mekempet he ulaula, wey is minsan hengkey he igkehimu te minsan hentei he egketahud.