Ruma 15:3 - Manobo Western Bukidnon

³ Su si Kristu, wazè din isipa is kandin he egkesuatan su insurat dengan is midtagnà he menge lalag din diyà te Megbevayà he edhenduen te, “Is menge mezaat he lalag te menge etew he insulè dan kenikew, ne iyan daan kedsulaa zan kediey.”

Ruma 15:3 Кръстосани препратки

Mateo 10:25

Umba, siak is egalen niw wey ebpenurù keniyu, kinahanglan he egkeiringan a keniyu. Su siak is egalen niw, emun egngezanan a te menge etew ki Endedaman, wey pe be kenà tuwas pa he mezaat is igngazan dan keniyu te menge sakup ku?

Mateo 26:39

Ne midlaus si Jesus diyà te uvey zà dutun ne midlangkeb sikandin ne mid-ampù, ke sikandin te, “Amey ku, ke egkehimu zà ne kenè nu en kediey ipeseg̵azi heini is merasey he imbanglis nu kediey, iyan, kenà egkesunud is kediey he egkesuatan, kekenà, iyan egkesunud is kenikew he egkesuatan.”

Mateo 26:42

Ne midlikù si Jesus ne mid-ampù med-uman, ke sikandin te, “Amey ku, emun kenè en egkehimu he id-awà sikan is kedresaya kedì ne iyan egkesunud is kenikew he egkesuatan.”

Mateo 27:44

Ne minsan sikan is menge tulisan he inransang diyà te pesikilizè din, ne midsumpalit dan daan sikandin.

Juan 15:10

Emun edtumanen niw is menge sug̵ù ku keniyu, ne kenè kew egkeawà te kebmahala ku keniyu zini te g̵ehinawa ku iring te midtuman ku is menge sug̵ù kediey te Amey ku he Megbevayà ne kenà ad daan egkeawà te kebmahala zin kedì diyà te g̵ehinawa zin.

Juan 15:24

Duen mibeelan ku he neehè dan he menge egkein-inuwan he kenà egkeveelan te minsan hentei he menusiyà. Angin ke wazè dan maahà heini su kenà sikandan egkevesulan tenged te mezaat he mid-ulaula zan kedì. Iyan, neehè dan en ne minsan pa zutun, siak wey is Amey ku, egkuntedahan key zan.

Juan 4:34

“Iring te egkekaan ku,” ke si Jesus, “is kedtumana ku te egkesuatan te Megbevayà he midsug̵ù kediey wey is kedhimesaza ku te impeveelan din kediey su iyan ibmezesen ku.

Juan 5:30

Wazà egkehimu ku te sebsevaha ku; su is paag̵i te kedsusiya ku te nengeveelan te menusiyà, impenurù kediey te Amey ku he Megbevayà. Ne metazeng mulà is kediey he kedsusi kandan su kenè ku ebpengahaan is kediey he egkesuatan, kekenà, is egkesuatan te Amey ku he midsug̵ù kediey.

Juan 6:38

Iyan igkeg̵iya ku kayi keniyu su midhendini a he ebpuun te langit wey ku metuman is egkesuatan te Megbevayà he midsug̵ù kediey; kenè ku iyan edtumanen is kediey zà he egkesuatan.

Juan 8:29

Ne is Amey ku he midsug̵ù kedì, duma ku zaan; kenè e zin ed-ewaan su kenà a ed-engked he edtuman te egkesuatan din.”

2 Kurintu 8:9

Netuenan ta ke hengkey is kezekelà te g̵ag̵ew kenita te Nengazen tew he si Jesu Kristu. Su tenged te hizu zin kenita, minsan te utew sikandin sepian diyà te langit, midhimu zin he utew sikandin ayuayu pinaag̵i te kebpeetew zin wey kebpehimatey zin. Ne tenged kayi te kegkeayuayu zin egkehimu ki he utew sepian.

Pilipus 2:5

Kinahanglan he iring is isip niw te isip ni Jesu Kristu.

Pilipus 2:8

Ne zutun te etew en sikandin wazà sikandin mebpelavew, kekenà, mibpezumazuma sikandin te menge sug̵ù kandin te Amey zin he Megbevayà minsan pa te pinaag̵i kayi inransang sikandin te krus ne zutun mibpatey.