Ruma 14:2 - Manobo Western Bukidnon

² Is etew he meheg̵et en is kedtuu zin, ne iyan ed-isipen din is: egkehimu ke egkeenen ta is minsan hengkey he egkeenen, iyan, is etew he kenè pa meheg̵et is kandin he kedtuu, ne kunaan din ke wazà itug̵ut kenitew is kegkaan te minsan hengkey he usa, ne menge lumbey zà is idsezè din.

Ruma 14:2 Кръстосани препратки

Ruma 14:1

Ne ke zuen duma niw he edtuu ki Kristu, iyan, kenè pa meheg̵et is kedtuu zin, dewata niw sikandin, iyan, kenè kew mebpekidlewanà kandin ke is ulaula zin tenged te kedtuu zin, ne kenà utew ebpekeiring te keniyu.

Ruma 14:14

Tenged te kebpekidsevaha ku te Nengazen tew he si Jesus, impesavut kedì he wazà minsan hengkey he egkeenen he idawey te Megbevayà. Iyan, ke zuen etew he edtuuwan din he indawey te Megbevayà is sevaha he egkeenen ne kenà meupiya ke egkeenen din.

Ruma 14:20

Ne kenè niw zèdeeti is ed-ul-ulahan te Megbevayà pinaag̵i te kegkaan niw te egkeenen he kunaan te zuma ke indawey kenita. Egkehimu ke egkaan ki te minsan hengkey he egkeenen, iyan, emun iyan ibpekesalà te zuma is kegkaan ta ne kenà haazà meupiya.

Ruma 15:1

Ne sikitew is meheg̵et is kedtuu te Megbevayà, kinahanglan he ed-entusen ta is kenè ta ked-ul-ulaha te ulaula he ibpekesalà te menge zuma ta he kenè pa meheg̵et is kedtuu zan. Ne kenè ta iyan idteg̵el is kenita he egkesuatan,

1 Kurintu 10:25

Na. Egkehimu he egkeenen ta is minsan hengkey he usa he imbelegyà diyà te mirkadu, iyan, kenè ta id-insà ke impemuhat be wey ke wazà su wey wazà ibmesakit te g̵ehinawa ta ke egkeenen ta.

1 Kurintu 8:9

Ne minsan pa zutun kinahanglan he purungi niw isipa heini is intug̵ut en keniyu su kela ke tenged keniyu egkesanggen is kedtuu te sevaha he wazè pa sikandin mekesavut te hustu.

1 Kurintu 9:22

Ne haazà is menge tumutuu he wazà sikandan mekesavut te hustu, egkehimu a he iring kandan ne kenè ku idteg̵el is kediey he egkesuatan su wey pinaag̵i kedì meheg̵et is kedtuu zan. Ne zuen te kada sevaha he ebpenudtulan ku te Lalag te Megbevayà, ebpen-ahaan ku is paag̵i he engayan kandin su wey ku maag̵ak sikandin ne ebpeketuu sikandin ki Jesus.

1 Timoteo 4:4

Meupiya is minsan hengkey he egkeenen he midlimbag te Megbevayà ne kinahanglan he kenè tew egkeg̵iyen he mezaat is minsan hengkey, kekenà, edewaten tew wey ebpeselematan tew.

Tito 1:15

Ke zuen etew he nelumpiyuwan te Megbevayà, wazà minsan hengkey he ibmeremerik din. Iyan, ke zuen etew he wazà melumpiyuwi te Megbevayà, wazà minsan hengkey pa he paag̵i he igkelumpiyu kandin su kenè sikandin edtuu ne nelalung utew is isip din wey g̵ehinawa zin.

Hibriyuhanen 13:9

Umba, kenè niw tuuwi is menge selakew he tuluuwen he kenà iyan kes tutuu he impenurù keniyu. Iyan hustu he ibmelig-en te kedtuu tew is kedtevangi kenitew te Megbevayà, ne kenà iyan is kedlikayi te menge egkeenen he indawey te kesug̵uan su wazà heini ikezeyzey te menge etew he ebantey kayi.

Hibriyuhanen 9:10

Su heini he paag̵i te ked-ezapa te Megbevayà, ne pinaag̵i zà te menge sug̵ù mehitenged te vetasan te kegkaan, ked-inum, kebpenlùlù, wey kedhemesa te lawa he paag̵i he insug̵ù te Megbevayà. Menge sug̵ù heini he edtumanen te menge etew pinaag̵i zà te lawa wey tenged dà te insug̵ù ne kenà tenged te iyan diyà te g̵ehinawa zan. Ne is pulus kayi te paag̵i, ne taman dà heini kayi te timpu g̵untaan te ked-ilisi te Megbevayà kayi te veg̵u he paag̵i.