Ruma 12:16 - Manobo Western Bukidnon

¹⁶ Kinahanglan he mesevaha is gehinawa niw te menge tumutuu. Kenè kew mebmepelevawen, kekenà, mebpekiduma kew te menge etew he minus is pid-etawan dan. Ne kenè niw isipa he uluwanen kew kenà sikandan.

Ruma 12:16 Кръстосани препратки

Mateo 26:11

Layun niw egketevangi is egkengeayuayu su kenè niw mulà sikandan egkesuwey, iyan, siak, meg̵aan ku en sikiyu egkesuwey.

Lucas 14:13

Iyan, emun edtukud ka te keemuran ne iyan nu umbitaha is egkengeayuayu wey is menge pigket, menge pungkul, wey is menge lakap.

Lucas 6:20

Ne mibpenlangulangu si Jesus diyà te menge sumusundan din ne migkag̵i sikandin te, “Utew kew zeyzey is menge ayuayu su iyan kew en edhedian te Megbevayà!

Nengeulaula 4:32

Mezesen is kebpekid-upakat te menge tumutuu su nesevaha zà is isip dan wey g̵ehinawa zan. Wazà minsan sevaha kandan he mid-isip din is menge azen din he iyan dà sikandin ebpehimulus, kekenà, mid-isip dan he sevaha zan dà te azen.

Ruma 11:20

Ne venar iyan he iyan kew in-ilis, iyan, umba in-awà is menge Hudiyu te Megbevayà su wazè dan medtuu. Ne umba in-ilis kew kandan su midtuu kew mulà. Ne minsan pa te iyan heini, kenè niw isipa he iyan kew lavew, kekenà, tegteg̵ami niw is menge ulaula niw.

Ruma 11:25

Egkesuatan ku, menge suled, he mesavut niw is ed-ul-ulahan te Megbevayà he zengan wazà mesavut te menusiyà. Umba ibpesavut ku heini keniyu su wey kenè niw isipa he iyan kew lavew kenà is menge Hudiyu. Ne minsan pa te intug̵ut te Megbevayà te zuma he menge Hudiyu is kenè dan kedtuu, duen timpu keuzemà he ed-engkezan dan is kenè dan kedtuu te Megbevayà su taman dà heini zutun te timpu he egkeamin ebpeketuu is langun he kenà menge Hudiyu he imbanglis te Megbevayà kandan is kebpeketuu zan.

Ruma 12:3

Ne tenged te imbeg̵ey kedì te Megbevayà is keg̵ehem te kedsengyawa te lalag din, egkeg̵iyen ku keniyu te langun he kinahanglan he kenè niw isipa he lavew kew te menge zuma niw, kekenà, kinahanglan he hustu is ked-isipa niw te ketau niw sumalà is kedtuu he imbeg̵ey te Megbevayà diyà te kada sevaha keniyu.

Ruma 15:5

Is Megbevayà, ne iyan edsambag kenitew wey ebeg̵ey kenitew te kebmeinentusen te kemeresayan. Berakat he himuwa zin he mesevaha is gehinawa niw wey isip niw kayi te kedsundani niw ki Jesu Kristu.

Ruma 6:2

Ne kenà heini egkehimu su kenà egkehimu he ebpeniguduwan ta te ed-ulaula is mezaat su wazè en kelavet kenita te mezaat he ulaula. Su iring ki te minatey he naawè en diyà te kandin is daan he untung din.

1 Kurintu 1:10

Menge suled ku tenged te kedtuu, duen idhangyù ku keniyu pinaag̵i te kebayàbayà kenitew te Nengazen tew he si Jesus; iyan is: kinahanglan he kenè kew mevahinbahin, kekenà, uyun-uyun kew su wey mesevaha is isip niw wey g̵ehinawa niw.

1 Kurintu 3:18

Kinahanglan he kenè kew mebpetazin te menge ulaula niw su ke zuen sevaha keniyu he ed-isipen din he zuen ketau zin te ked-isip sumalà is ked-isipa kandin te zuma zin he menusiyà, deyzey ke ed-engkezan din is kandin he ketau wey sikandin mehimu he etew he kenà metau sumalà is ked-isipa kandin te menge etew. Ne human egkehimu sikandin he metau iyan he venar.

1 Kurintu 4:10

Sikami, egkeg̵iyen te menge etew he kenè key metau he ed-isip su ibpenurù dey is lalag ni Kristu. Ne sikiyu mulà, egkeg̵iyen niw he utew kew metau tenged te kedtuu niw ki Kristu! Telawen key kun, iyan, sikiyu, utew kew memevurut! Edtehuzen kew te menge etew, iyan, sikami, kenè key mulà edtehuzen, kekenà, ebpesipelahan key zan.

1 Kurintu 6:5

Umba egkeg̵iyen ku heini su wey kew meeled. Siguradu zuen sevaha keniyu he egkehimu he zatù he metau he edhusey te menge tumutuu.

1 Kurintu 8:2

Is etew he kunaan din ke zekelè en is netuenan din, is hustu he ibpesavut pezem kandin te Megbevayà, wazè din pa metueni.

2 Kurintu 13:11

Menge suled, iyan dà heini menge lalag ku keniyu; berakat he mebmelipayen kew. Purungi niw is menge ulaula niw; tumana niw is menge sambag ku keniyu. Kinahanglan he mesevaha is gehinawa niw ne mebmelinawen is ked-ubpè niw. Su emun ebeelan niw heini, is Megbevayà he iyan puunà te g̵ag̵ew wey kelinew, layun eduma keniyu.

Pilipus 1:27

Menge suled, ke minsan hengkey is egkehitavù kediey, utew kinahanglan he is menge ulaula niw, ne kenà ebpekesuwey te impenurù ni Kristu pinaag̵i te Meupiya he Tudtulanen. Su emun kenè kew edsuwey kayi, minsan ke kenà a ebpekelikù diyan, egketudtulan a he nesevaha is gehinawa niw wey tuyù niw te kedhag̵ù su wey metuuwi te mezakel he menge etew is Meupiya he Tudtulanen.

Pilipus 3:16

Iyan, kinahanglan guntaan he edtumanen tew is daan he impenurù kenitew te Megbevayà.

Pilipus 4:2

Edhengyuan ku sikiyu, Ibudya wey Sintiki, he melinew is kebpekid-upakat niw su telesuled kew tenged te upakat niw te Nengazen.

Hibriyuhanen 13:5

Bantey kew su kela ke utew subra is suat niw te selapì. Kinahanglan he imeupiye en te g̵ehinawa niw is naazen niw, su migkag̵i is Megbevayà te, “Kenè ku sikiyu ed-ewaan ne kenè ku sikiyu ed-engkezan.”

1 Pedro 3:8

Duen pa egkeg̵iyen ku keniyu te langun ne iyan is: kinahanglan he mesevaha is isip niw wey g̵ehinawa niw. Mebpepurpurungè kew wey megig̵ineg̵awè kew su iring kew en te teltelesuled. Kinahanglan he memetulanged kew wey kenè kew menge mepelevawen.

1 Pedro 5:3

Kenè kew medhadìhadì kandan te insarig keniyu, kekenà, eg̵aka niw sikandan su wey iyan kew zan edsunuzen te menge meupiya he ulaula.

3 Juan 1:9

Mibpesuratan ku is menge tumutuu ziyan, iyan, si Diyutripis, kenè din ebpemineg̵en is menge sug̵ù ku. Iyan egkesuatan din is: iyan dà sikandin ebayàbayà.