Ruma 11:21 - Manobo Western Bukidnon

²¹ Su emun midtamped te Megbevayà is menge tutuu he menge subpang, he ke và dà egkeg̵iya, is menge Hudiyu, iyan kew pe be kenè din daan tempeza is subpang te wazà ipemula he ulivu ke kenè kew is kenà menge Hudiyu edtuu.

Ruma 11:21 Кръстосани препратки

Ruma 11:17

Is menge kevuwazan ni Israyil, ne iring sikandan te kayu he ulivu he ed-elimahan te Megbevayà. Ne zuen menge subpang dutun te kayu he midtamped te Megbevayà. Ne sikiyu is kenà menge Hudiyu, ne iring kew te menge subpang te wazà ipemula he ulivu he in-ilis te Megbevayà he impetuvù din dutun te midtempezan din te subpang. Ne iring ded daan guntaan utew meupiya is kedtuvazi keniyu te Megbevayà, iring te meupiya zaan is kedtuvazi zin dengan te menge Hudiyu.

Ruma 11:19

Ne egkehimu he zuen egkag̵i te, “Sikami is kenà menge Hudiyu, iyan key lavew su iyan key in-ilis te Megbavayà te menge Hudiyu.”

Ruma 11:20

Ne venar iyan he iyan kew in-ilis, iyan, umba in-awà is menge Hudiyu te Megbevayà su wazè dan medtuu. Ne umba in-ilis kew kandan su midtuu kew mulà. Ne minsan pa te iyan heini, kenè niw isipa he iyan kew lavew, kekenà, tegteg̵ami niw is menge ulaula niw.

Ruma 11:22

Ne pinaag̵i kayi egkesavut ta is gag̵ew te Megbevayà wey ke maan is edsilut sikandin. Midsilutan din is wazà mebpemineg, iyan, igkehizu kew zin ke edhemenan niw is gag̵ew zin, su emun kenà, ne id-awè kew zin daan.

Ruma 8:32

Su minsan is Anak din he si Jesus, wazè din menug̵uni, kekenà, midsug̵ù din wey mekepehimatey he elili kenita. Ne emun iyan haazà gag̵ew zin kenita, kenà egkehimu he kenè din daan ibeg̵ey kenita is langun he impenaad din kenita.

Hudas 1:5

Netuenan niw en is egkeg̵iyen ku, iyan, ed-umanan ku pa egkeg̵iya ziyan te keniyu wey niw kenà melipati. Dengan midlibri te Megbevayà is menge pinilì din he etew ne impeg̵uwè din sikandan diyà te g̵inhedian he Ihiptu, iyan, dutun te nekeg̵uwè dan en, mibpenhimetayan din is duma kandan he wazà medsarig kandin.