Ruma 11:20 - Manobo Western Bukidnon

²⁰ Ne venar iyan he iyan kew in-ilis, iyan, umba in-awà is menge Hudiyu te Megbevayà su wazè dan medtuu. Ne umba in-ilis kew kandan su midtuu kew mulà. Ne minsan pa te iyan heini, kenè niw isipa he iyan kew lavew, kekenà, tegteg̵ami niw is menge ulaula niw.

Ruma 11:20 Кръстосани препратки

Lucas 18:14

Ne ke si Jesus dutun te, “Benar is egkeg̵iyen ku he haazà is menunukut te vuhis, hein mid-ulì diyà te valey zin ne wazè en isipa te Megbevayà is salè din su nepesaylu en. Iyan, kenà iring dutun haazà is gelbuwen he Perisiyu su is etew he kunaan din ke utew lavew sikandin diyà te etuvangan te Megbevayà, ne ebminusen sikandin te Megbevayà, iyan, is etew he netuenan din he utew sikandin mekesesalà, ne ibpelavew sikandin te Megbevayà.”

Nengeulaula 18:6

Ne hein wazè dan dewata su edsumpalit sikandan kandin, inhuyab din is kumbalè din he tuus te mid-engkezan din en sikandan. Ke sikandin te, “Kenè en kediey he salà ke edsilutan kew te Megbevayà. Ne g̵untaan diyè ku en ibpesavut is Lalag te Megbevayà te kenà menge Hudiyu.”

Ruma 11:18

Ne kinahanglan he kenè niw isipa he lavew kew kenà is menge Hudiyu su menge subpang kew zà daan ne is sustansya te subpang, ne ziyà ebpuun te lawa te kayu ne kenà ebpuun diyà te menge subpang is sustansya te lawa.

Ruma 11:21

Su emun midtamped te Megbevayà is menge tutuu he menge subpang, he ke và dà egkeg̵iya, is menge Hudiyu, iyan kew pe be kenè din daan tempeza is subpang te wazà ipemula he ulivu ke kenè kew is kenà menge Hudiyu edtuu.

Ruma 12:16

Kinahanglan he mesevaha is gehinawa niw te menge tumutuu. Kenè kew mebmepelevawen, kekenà, mebpekiduma kew te menge etew he minus is pid-etawan dan. Ne kenè niw isipa he uluwanen kew kenà sikandan.

Ruma 12:3

Ne tenged te imbeg̵ey kedì te Megbevayà is keg̵ehem te kedsengyawa te lalag din, egkeg̵iyen ku keniyu te langun he kinahanglan he kenè niw isipa he lavew kew te menge zuma niw, kekenà, kinahanglan he hustu is ked-isipa niw te ketau niw sumalà is kedtuu he imbeg̵ey te Megbevayà diyà te kada sevaha keniyu.

Ruma 3:3

Ne minsan pa te zuen menge zuma zey te menge Hudiyu he wazà mebpemineg te Lalag te Megbevayà, kenà egkehimu he kenà edtumanen te Megbevayà is impenaad din dengan.

1 Kurintu 10:12

Ne tenged kayi, haazà is etew he egkeisip din he mezesen en is kedtuu zin, ne kinahanglan he purungi zin pa heg̵eta is kedtuu zin su kela ke mekesalà sikandin gihapun.

1 Kurintu 15:1

Ne g̵untaan, menge suled ku te kedtuu, ed-umanan ku sikiyu te ebpenurù mehitenged te Meupiya he Tudtulanen he impesavut ku zengan keniyu, ne midtuuwan niw ne midhemenan niw.

1 Kurintu 16:13

Layun kew, menge suled, med-andam; hemeni niw te edtuu si Jesu Kristu; kenè niw ikeeled is kedtuu niw, kekenà, ipeehè niw is kelig-en te kedtuu niw.

2 Kurintu 1:24

Kenè dey egkesuatan he ebayàbayè key ke hengkey is edtuuwan niw su netuenan dey he meheg̵et en is kedtuu niw. Egkesuatan dey zà he mehimu key he timbang niw te ebpeveelan kenitew te Megbevayà su wey kew melipey.

2 Kurintu 10:5

Ne iyan heini egemiten dey te kedeeg̵a te menge tarù he ketezengan te menge mepedelig̵en he etew he kenà egkesuat he edtuu te ibpesavut te Megbevayà. Ne minsan is ked-isipa zan te tarù, egkehimu he ed-ilisan dey su wey zan human meisip is tutuu ne pinaag̵i kayi ebpemineg̵en dan is menge sug̵ù ni Kristu.

Pilipus 2:12

Ne umba, menge suled, iring te layun kew ebpememineg te menge sug̵ù ku, ne kenà dutun dà te kebpekiduma ku keniyu, kekenà, minsan te wazà a ziyan te keniyu, ne iring din ded daan guntaan kinahanglan is uman sevaha keniyu, ne himuwa zin is taman te egkehimu zin he edumahan te kegkehandek te Megbevayà su wey mepasad haazà is nepuunan en te Megbevayà te kedlibriya zin keniyu te silut.

Kulusas 2:7

Purung kew pendalid diyà te kandin; purungi niw istudyuwi is menge ulaula zin; purungi niw tuuwi sikan is tutuu he tuluuwen he impenurù keniyu. Ne kinahanglan he layun niw peselemati te Megbevayà is gag̵ew zin keniyu.

2 Tiselunika 2:4

Edsukulan din wey edlevawan din pezem is minsan hengkey he mid-isip te menge etew he megbevayà wey is minsan hengkey he ed-ezapen dan. Ne ebpinuu sikandin minsan diyà te simbahan he Valey te Megbevayà su egkeg̵iyen din he iyan sikandin Megbevayà.

1 Timoteo 6:17

Is menge tumutuu he mezakel is menge azen dan, keg̵iyi nu he kenè dan mebpelavew wey kenè dan medsarig te menge azen dan su kenè ta egketuenan ke keenu ki egkeewai te menge azen ta. Keg̵iyi nu he iyan dan serig̵i is Megbevayà su iyan sikandin metulanged. Is minsan hengkey he naazen ta, imbeg̵ey zin kenita wey mebmeupiya is kebpekesavuk ta.

Hibriyuhanen 3:12

Umba, menge suled, susiya niw is gehinawa niw. Kinahanglan he wazà minsan sevaha keniyu he mezaat is ed-isipen din nè wazè din kedtuu, su pinaag̵i kayi egkeengkezan din is wazè din kemetayen he Megbevayà.

Hibriyuhanen 3:19

Ne netuenan tew he wazè dan mekeseled dutun su wazè dan tuuwi is Lalag te Megbevayà.

Hibriyuhanen 4:11

Umba, sikitew zaan, ebeelan tew is taman te egkehimu tew wey kiw zaan mekeseled dutun te edhimelayan he midteg̵ana te Megbevayà. Kenè tew ed-iringan haazà is menge etew zengan he wazà mebpemineg te Lalag te Megbevayà su wey wazà minsan sevaha kenitew he kenà ebmehimuwen he mekeseled dutun te edhimelayan.

Hibriyuhanen 4:6

Tenged kayi, netuenan ta he haazà is menge etew zengan he nehuna he nemekezineg te Meupiya he Tudtulanen mehitenged kayi te kedhimeley, wazà sikandan mehimuwa te Megbevayà he mekeseled dan wey zan mekehimeley tenged te wazè dan kebpemineg. Iyan, netuenan tew zaan he zuen menge zuma pa he ebmehimuwen mulà te Megbevayà he mekeseled sikandan wey zan mekehimeley zuma kandin.

Santiago 2:19

Emun midtuu ki he sebsevaha zà is Megbevayà utew meupiya heeyan, iyan, kenè pa hustu su minsan is menge mezaat he mulin-ulin, midtuu zan daan te iring keniyan, iyan, egkerkeren dan te kegkehandek su netuenan dan he edsilutan sikandan keuzemà.

Santiago 4:6

iyan, mezesen pa utew is tavang kenita te Megbevayà.” Ne tenged dutun duen insurat he lalag din he edhenduen te, “Egkuntedahan te Megbevayà is mepelevawen, iyan, edtevangan din mulà is ebpesakup kandin.”

1 Pedro 1:17

Ne g̵eina te mibpetavang ki te Amey ta he Megbevayà kinahanglan he utew meheg̵et is kedtehuza ta kandin te zini ki pa ed-ubpà te kelibutan. Iyan sikandin edsusi te menge ulaula te menusiyà sumalà is mid-ulaula te kada sevaha ne wazè din ibpelavi he minsan hentei.

1 Pedro 5:12

Mid-ug̵upan a ni Silvanu te edsurat kayi. Suled tew sikandin he utew egkeserig̵i. Iyan insurati ku keniyu kayi su wey ku meheg̵et is kedtuu niw. Ibpesavut ku keniyu he impenurù ku en keniyu he tutuu is gag̵ew te Megbevayà keniyu. Ne kenè niw heini lipati.

1 Pedro 5:9

Sukuli niw sikandin, ne hamen kew sarig te Megbevayà su netuenan niw he is menge zuma niw he tumutuu zini te tivuuk he kelibutan, ebpekeantus dan daan te merasey he iring te egkeantus niw.

Impezayag 18:7

Utew subra is kebpurungi zin te kebpekesavuk din ne g̵untaan iyan bales kandin is kegkeseeng wey is merasey he kebpekesavuk. Su kenà sikandin ed-engked he ebpegalbu, ke sikandin diyà te isip din te, ‘Bai a ne kenà a valu. Kenà egkehimu he egkeumahan a te kemereg̵enan.’

Impezayag 3:17

Egkag̵i kew te, “Sepian kiw ne meupiya is kebpekesavuk tew ne wazè tew en kurang te minsan hengkey.” Ne minsan pa zutun, wazè niw metueni he mekehizuhizu kew utew su egkengeayuayu kew te kedtuu; nengelakap is isip niw wey nengelevasan kew su wazè niw menge metazeng he ulaula.