Ruma 11:11 - Manobo Western Bukidnon

¹¹ Ne nekeurambak is menge zuma ku he Hudiyu pinaag̵i te kenè dan kedtuu ki Kristu, iyan, kenè niw isipa he kenà egkehimu te Megbevayà he mekelikù dan te kedtuu. Tenged te kenè dan kebpemineg te Lalag te Megbevayà nehimu he nengelibri te silut is menge kenà Hudiyu su wey meima is menge Hudiyu. Ne umba nehimu heini su wey likui te menge Hudiyu is kedtuu zan ke egkeehè dan he nengelibri en is kenà menge Hudiyu.

Ruma 11:11 Кръстосани препратки

Lucas 20:16

Iyan is: ebeyaan din haazà is menge etew ne ebpenhimetayan din, ne ebpeelimahan din haazà is perasan din te selakew en maan he menge etew.” Ne hein nezineg dutun te menge etew he ebpemineg ki Jesus ne utew zan neseeng ne ke sikandan te, “Kenà heeyan ed-ul-ulahan te Megbevayà!”

Nengeulaula 13:42

Ne hein miguwà si Pablo wey si Bernabe zutun te simbahan, migkeg̵iyan sikandan te menge etew he medlikù dan te ed-ilis he Sebadu wey zan iuman ipesavut haazà is midseysey ni Pablo.

Nengeulaula 18:6

Ne hein wazè dan dewata su edsumpalit sikandan kandin, inhuyab din is kumbalè din he tuus te mid-engkezan din en sikandan. Ke sikandin te, “Kenè en kediey he salà ke edsilutan kew te Megbevayà. Ne g̵untaan diyè ku en ibpesavut is Lalag te Megbevayà te kenà menge Hudiyu.”

Ruma 10:19

Ne kela ke kunaan ta ke wazà mesavut te menge kevuwazan ni Israyil is impenudtul kandan, iyan, nesavut dan en he zaan su zuen insurat he Lalag te Megbevayà dengan diyà te kandan pinaag̵i te lalag ni Moises he edhenduen te, “Edhimuwen ku keuzemà he egkeima kew is menge Hudiyu te kedtevangi ku te menge etew he kenà menge pinilì ku. Ne edhimuwen ku he egkepauk kew tenged te kegkehizuwi ku te menge etew he zengan wazè dan metueni ke hentei a,” ke sikandin.

Ruma 11:1

Ne kenè tew ed-isipen he tenged te wazà medtuu is menge etew he kevuwazan ni Israyil, mid-engkezan en te Megbevayà is tivuuk he kehudiyuwan su siak, Hudiyu a zaan iring kandan; kepuun ku si Abraham su kevuwazan a he ebpuun duen te sevaha he kevuwazan din he si Benjamin.

Ruma 11:12

Ne pinaag̵i te supak te menge Hudiyu he iyan is kenè dan kedtuu, midtuvazan te Megbevayà te utew meupiya is tivuuk he menusiyà. Ne pinaag̵i zaan te naawà diyà te menge Hudiyu is kedtuvazi kandan te Megbevayà, utew zekelà is kebpaahaa te Megbevayà te menge etew he kenà Hudiyu te g̵ag̵ew zin. Ne emun iyan heini, wey pe be kenà utew pa zekelà is meupiya he egkezawat te menge etew he kenà menge Hudiyu zutun te timpu keuzemà ke edlikuan te menge Hudiyu is kedtuu zan.

Ruma 11:14

su egkesuatan ku he meima is menge zuma ku he Hudiyu pinaag̵i te kedtevangi ku keniyu. Su kela ke pinaag̵i zutun duen duma kandan he edtuu ne egkelibri te idsilut te Megbevayà.

Ruma 11:31

Ne iring din ded daan diyà te kandan, su minsan pa te kenè dan guntaan ebpemineg, egkehimu he iring te kegkehizuwi wey kebpeseyluwa keniyu te Megbevayà, egkehizuwan din daan sikandan keuzemà.