Ruma 1:13 - Manobo Western Bukidnon

¹³ Egkesuatan ku, menge suled, he metueni niw he kenà egkeawà dini te isip ku is kegkesuat ku te edhendiyan, iyan, kenè e pa g̵untaan ebpekehendiyan su zuen edsanggen kedì. Egkesuat a he edhendiyan su pinaag̵i te kebpenurù ku, kela ke zuen menge etew ziyan he ebpeketuu ki Jesus, iring te pinaag̵i te kebpenurù ku, duen menge kenà Hudiyu zaan diyà te zuma he menge inged he nemeketuu kandin.

Ruma 1:13 Кръстосани препратки

Juan 12:24

Utew venar is egkeg̵iyen ku keniyu he emun kenà idleveng is benì diyà te tanà, kenà egkevuwad. Ne emun igkeleveng en ne edtuvù; ne ebeg̵as te mezakel. Iring din ded daan kedì, su emun ebpatey a ne mezakel is egkeveg̵ayan te veg̵u en he untung.

Juan 15:16

Kenè kew iyan nekepilì kediey, kekenà, iyan a nekepilì keniyu. Intezù ku sikiyu wey kew mekepemeg̵as te menge meupiya he ulaula ne wey kenà daan mahanew is beg̵as niw. Ne is minsan hengkey he ebuyuen niw ziyà te Amey ku he Megbevayà tenged te kedtuu niw kediey, ibeg̵ey zin keniyu.

Juan 4:36

Ne sikan is edrag̵un, he ke và dà egkeg̵iya, is ebpesavut kandan wey zan meketuu kedì, duen suhul kandin te Megbevayà, ne sikan is menge etew he nerag̵un din, ebeg̵ayan te untung he wazà pidtemanan. Ne tenged dutun is ebpemula te Lalag te Megbevayà wey is edrag̵un te veg̵as te Lalag te Megbevayà, pudu zan egkelipey.

Nengeulaula 1:15

Ne nekepira zutun, nengetig̵um is menge tumutuu, menge nenggatus wey keluwaan sikandan is mibpetemtempuwà dutun; ne midhitindeg si Pedro is egkag̵i te,

Nengeulaula 14:27

Ne hein nekeuma zan diyà te Entiyukya, midtig̵um dan is menge tumutuu ne midtudtul zan is langun he nehimu te Megbevayà pinaag̵i kandan wey is kedhimuwa zin te paag̵i wey meketuu is menge etew he kenà Hudiyu.

Nengeulaula 15:12

Ne zutun, wazè en midtavak; ne mibpemineg dan is tudtul ni Bernabe wey si Pablo te langun he egkengein-inuwan he mibeelan te Megbevayà pinaag̵i kandan hein diyè dan te kenà menge Hudiyu.

Nengeulaula 19:21

Ne zutun, neisip ni Pablo is edhipanew he ziyà ebayà te menge prubinsya he Mesidunya wey Gerisya pehendiyà te Hiruselim. Ke sikandin te, “Emun ebpekehendiyà a te Hiruselim, ebpekelaus e pa ziyà te inged he Ruma.”

Nengeulaula 21:19

Ne mibpengemusta kandan si Pablo ne zutun mibpenudtul zin kandan is langun he nengehimu te Megbevayà diyà te menge etew he kenà menge Hudiyu, pinaag̵i te kedwali zin.

Nengeulaula 28:14

Duen menge tumutuu zutun he neuma zey ne mid-eg̵ut key zan he med-ubpè key ziyà te kandan seled te sengesimana. Ne zutun midlaus key medhipanew pehendiyà te Ruma. Hein nezineg te menge tumutuu ziyà te Ruma he ebpekeuma key en, midsinug̵ung key zan diyà te mirkadu ni Apio wey zuen daan diyà te egngezanan te Tetelu he Valey he Hulevungà. Ne hein naahà sikandan ni Pablo mibpeselamat sikandin te Megbevayà ne neteg̵uan sikandin te kebpekesarig ne zutun nekeuma key human diyà te inged he Ruma.

Ruma 1:12

Ne iyan ibpesavut ku is ebpein-iniyatè kiw te kedtuu.

Ruma 11:25

Egkesuatan ku, menge suled, he mesavut niw is ed-ul-ulahan te Megbevayà he zengan wazà mesavut te menusiyà. Umba ibpesavut ku heini keniyu su wey kenè niw isipa he iyan kew lavew kenà is menge Hudiyu. Ne minsan pa te intug̵ut te Megbevayà te zuma he menge Hudiyu is kenè dan kedtuu, duen timpu keuzemà he ed-engkezan dan is kenè dan kedtuu te Megbevayà su taman dà heini zutun te timpu he egkeamin ebpeketuu is langun he kenà menge Hudiyu he imbanglis te Megbevayà kandan is kebpeketuu zan.

Ruma 7:1

Menge suled, nesavut te en ke hengkey is belaud te gubirnu ne netuenan ta he zizalem ki te menge sug̵ù te velaud taman te kenè ki pa ebpatey, ne emun ebpatey ki, kenè en egkehimu he ibpetuman pa kenita is menge sug̵ù te velaud.

1 Kurintu 1:10

Menge suled ku tenged te kedtuu, duen idhangyù ku keniyu pinaag̵i te kebayàbayà kenitew te Nengazen tew he si Jesus; iyan is: kinahanglan he kenè kew mevahinbahin, kekenà, uyun-uyun kew su wey mesevaha is isip niw wey g̵ehinawa niw.

1 Kurintu 10:1

Egkesuatan ku, menge suled, he metueni niw ke hengkey is neulaula zengan te menge kepuun dey te menge Hudiyu he nemenduma ki Moises. Su mibpeyungan sikandan te g̵apun he iyan tuus he mibulus diyà te kandan is Megbevayà, ne midrapas dan is dag̵at he migngezanan te Merig̵à, ne wazà nelened kandan.

1 Kurintu 12:1

Menge suled, egkesuatan ku he mepurung niw mesavut ke hengkey sikan is menge ketau he imbeg̵ey keniyu te Wag̵as he Mulin-ulin.

1 Kurintu 14:20

Kinahanglan, menge suled, he kenà iring te ked-isip te menge vatà is ked-isipa niw kayi. Iyan dà ulaula te vatà he meupiya he ed-iringan, haazà is kenè dan kegketueni te ked-isip te mezaat. Iyan, kinahanglan he iring te ked-isip te meg̵urang is ked-isipa niw kayi.

1 Kurintu 14:26

Umba, menge suled, ke edtig̵um kew, iyan heini meupiya he ed-ul-ulahan. Meupiya ke zuen sevaha he andam te kegkanta te kedalig te Megbevayà, ne is sevaha, ebpenurù, ne is sevaha, idseysey zin is impesavut kandin te Megbevayà, ne zuen sevaha he egkag̵i te kineg̵iyan he kenè din egketuenan, ne zuen daan sevaha he edluwas kayi. Ne minsan hengkey he ed-ul-ulahan niw zutun ne kinahanglan he ebpekeheg̵et te kedtuu te menge tumutuu.

1 Kurintu 9:2

Ne minsan ke kenà ebpeketuu is duma he epustul a, sikiyu is diyan te Kurintu, netuenan niw en he epustul a su kenà egketarù he pinaag̵i kedì mibeg̵ayan kew en te veg̵u en he untung.

2 Kurintu 1:8

Su egkesuatan dey, menge suled, he metueni niw is dekelà he samuk dey hein diyè key te prubinsya he Asya. Utew merasey is penggezam kenami he kenè dey pezem egkeantus umba kunaan dey ke ibpatey zey.

2 Kurintu 2:14

Ne minsan pa zutun utew zekelà is kebpeselemati ku te Megbevayà su tenged te kebpekidsevaha tew ki Kristu, iring kiw te menge vihag ni Kristu he ibpeehè din diyà te minsan hentei. Ne pinaag̵i kenitew ibpesavut din diyà te menge etew ke hentei sikandin diyà te minsan hendei.

Gelasya 3:15

Menge suled, duen penenglitan he ibpesavut ku keniyu. Su ke zuen ibpenaad te sevaha he etew he insurat diyà te dukumintu he mibpirmahan din ne mibpirmahan daan te menge tistig̵us, ne kenà egkehimu he edhelinan wey ed-umanan haazà te minsan hentei su nelig-enan.

Gelasya 6:18

Menge suled, berakat he ikeg̵ag̵ew kew is langun te Nengazen tew he si Jesu Kristu. Iyan a si Pablo.

Pilipus 1:22

Kenè ku egketuenan ke hendei zapit is meupiya he ebpilien ku, su egkesuatan ku he metapus en is ked-ubpaubpè ku zini te kelibutan wey a mekepekidume en ki Kristu su meupiya pa utew haazà. Iyan, ke zuen pa ebpeveelan kedì he ebpulus, meupiya zaan.

Pilipus 4:17

Kenè ku iyan igkekeg̵iya kayi su wey a layun mekezawat te ibeg̵ey niw, kekenà, egkesuatan ku he zekelà is suhul keniyu te Megbevayà.

Kulusas 1:10

Su emun ebeelan din is iring kayi, ne human egkehimu is menge ulaula niw he zait he menge ulaula te menge etew he neg̵aked te Nengazen tew, ne egkehimu zaan he layun niw egkeveeli is egkesuatan din; layun niw egkeulaula is minsan hengkey he menge meupiya he ulaula. Ne layun daan ed-iseg is kegketueni niw te menge ulaula te Megbevayà.

Kulusas 1:6

Heini is migkag̵i he Meupiya he Tudtulanen, pinaag̵i te kedtuu kayi, mezakel en he menge etew ziyà te minsan hendei he inged is mibmeupiya is menge ulaula zan. Ne kenà duen dà taman su ed-iseg ebmezakel is menge tumutuu pinaag̵i te Meupiya he Tudtulanen, iring te layun daan ed-iseg ebmezakel is menge tumutuu ziyan te keniyu puun pa zutun te andew zengan he nezineg niw is tudtul te g̵ag̵ew kenitew te Megbevayà wey netuenan niw he venar iyan.

1 Tiselunika 2:18

Ne tenged kayi layun dey egkeisip he edlikù key pezem diyan te Tiselunika. Siak si Pablo, layun ku egkeisip is iring dutun, iyan, mibangen key ni Setanas, umba wazè key mekelaus.

1 Tiselunika 4:13

Menge suled, egkesuatan dey he metueni niw is egkeulaula te menge tumutuu he minatey en su wey kew kenà meseeng iring te kegkeseeng te zuma he menge etew he kenè dan egkeperateng he egkevanhew sikandan.

2 Tiselunika 2:7

Su is gehem dutun te utew mesinupaken, egemiten din en guntaan he meeles. Ne ebpekeeles-eles pa sikandin taman te kenè pa id-awà sikan is ed-eg̵en kandin.

2 Timoteo 4:17

Minsan pa zutun midtevangan a te Nengazen ne midlig-enan e zin ne tenged dutun nepurungan ku te edsangyew is Meupiya he Tudtulanen diyà te langun he menge etew zutun he kenà menge Hudiyu. Ne tenged dutun nelibri a ne wazà a mehimetayi.