Pilipus 4:8 - Manobo Western Bukidnon

⁸ Ketepusan heini, menge suled, he menge lalag ku keniyu. Iyan niw itag̵ù diyà te isip niw is meupiya, is dait he igkezelig̵i, is tutuu he tuluuwen, is metazeng wey hustu wey mekempet he ulaula, wey is minsan hengkey he igkehimu te minsan hentei he egketahud.

Pilipus 4:8 Кръстосани препратки

Mateo 22:16

Ne midsug̵ù dan diyà te ki Jesus is menge sumusundan dan wey menge sakup te upakat he midtukud ni Hirudis. Ne haazà is midsug̵ù dan, migkag̵i ziyà te ki Jesus te, “Menunudlù, netuenan dey he metazeng ka he etew; su ibpenurù nu is tutuu he ebpeveelan kenitew te Megbevayà, ne is lalag te menge etew, kenà ebpekehalin te ibpenurù nu tenged te wazè nu ibpelavi he minsan hentei.

Marcos 6:20

Ne si Hadì Hirudis, egkehandek sikandin ki Juan su netuenan din he metazeng he etew si Juan he ed-ulinan te Megbevayà. Umba wazè din itug̵ut he mehimetayi. Egkesuatan ni Hirudis te ebpemineg is kebpenurù ni Juan, iyan, ingkeliveg din haazà is penurù.

Lucas 16:15

Ne zutun migkag̵i si Jesus diyà te kandan te, “Iyan kew sikan is henduen be te meupiya is ulaula ke ziyà te etuvangan te menge etew, iyan, wazà mekeeles te Megbevayà ke hengkey is diyà te isip niw. Is ed-isipen te etew he utew mahal, ne wazè din bali ziyà te Megbevayà.

Lucas 2:25

Ne zuen dutun maama he ed-ubpà diyà te Hiruselim he egngezanan ki Simeon. Metazeng haazà he etew he layun edsimba te Megbevayà. Kenà egkeawà diyà te g̵ehinawa zin is kebperetenga zin te kegketuman te midtagnà dengan he zuen timpu he edlibriyen te Megbevayà is nengepilì din he menge etew he menge kevuwazan ni Israyil. Layun ed-ulinan si Simeon te Wag̵as he Mulin-ulin.

Lucas 23:50

Ne zuen sevaha zutun he etew he egngezanan ki Jose he meg̵inged diyà te inged he Erimetiya he ziyà te prubinsya he Hudiya. Heini si Jose, ne metazeng he etew ne telehuzen daan. Sevaha sikandin te menge Hudiyu he edtag̵ad te kedhadì te Megbevayà dini te kelibutan. Sevaha zaan sikandin te menge zatù te menge Hudiyu, iyan, wazà sikandin mekeuyun te kedhimetayi ki Jesus.

Juan 7:18

Su ke zuen etew he ibpenurù din is kandin dà he isip, ebpevantug dà te menge etew, iyan, is etew he ibpenurù din is kegkevantug te midsug̵ù kandin, egkeserig̵an is lalag din su kenà tarù is ibpenurù din.

Nengeulaula 10:22

Ne migkag̵i zan te, “Impehendini key ni Kepitan Cornelio. Metazeng sikandin he etew. Ed-azap sikandin te Megbevayà, ne telehuzen daan sikandin te langun he menge Hudiyu. Migkeg̵iyan sikandin te velinsug̵uen te Megbevayà te, ‘Ipaangey nu si Simon Pedro wey nu mezineg is ibpesavut din,’ ” ke sikandan.

Nengeulaula 22:12

Ne zuen dutun etew he egngezanan ki Eneniyas; metinumanen sikandin te kesug̵uan tew, wey telehuzen te langun he menge Hudiyu he tigDemasku.

Nengeulaula 6:3

Umba, menge suled,” ke sikandan, “meupiya ke ebpilì kew te pitu he menge zuma niw he telehuzen. Kinahanglan he iyan ebpilien is menge maama he memetau he netuenan niw he nepurung sikandan ulini te Wag̵as he Mulin-ulin. Ne ibeg̵ey zey ziyà te kandan is keg̵ehem te kebahinbahin.

Ruma 13:13

Ed-ul-ulahan tew is hustu su iyan heini ulaula he zait te menge etew he neteyawan te Megbevayà. Kenè ki en edtampu te ketig̵uman te ebpemelelangut ne kenè ta egkevuten is kenè ta esawa. Kenè ki ebpekid-eg̵et wey kenè ki egkesina.

Ruma 13:3

Su wazà kinahanglan he egkehandek ki te ebpemunuan kenita ke meupiya is menge ulaula ta; wey ki zà egkehandek ke ebaal ki te mezaat. Emun egkesuat kew he kenè kew mahandek te menge ebpemunuan ne ul-ulaha niw is meupiya he ulaula ne edelig̵en kew zan.

Ruma 14:18

Ne ke pinaag̵i kayi edsundanan ta si Kristu, igkesuat ki utew te Megbevayà, ne egkesuatan daan te menge etew is menge ulaula ta.

Ruma 2:29

Ne iring din ded daan su is tutuu he Hudiyu, ne iyan is etew he midtuusan te Megbevayà is gehinawa zin pinaag̵i te Wag̵as he Mulin-ulin, ne kenà pinaag̵i te kedtumana te kesug̵uan. Ne is etew he iring kayi, ne egkehimu he kenà sikandin egkezalig te menge zuma zin he etew, iyan, egkezalig sikandin mulà te Megbevayà.

1 Kurintu 4:5

Umba, kenè kiw edsawey te menge zuma tew, kekenà, edteg̵azan tew is kedlikù te Nengazen tew he si Jesus. Ibpeg̵awag̵awa zin dutun is nekeeles he menge vaal te menge etew g̵untaan, ne ibpetuenan din is wazè pa metueni he menge ed-isipen te menge etew. Ne zutun egketuenan te kada sevaha he etew ke zuen igkezelig̵i kandin te Megbevayà wey ke wazà.

2 Kurintu 13:7

Id-ampù dey ziyà te Megbevayà he wazà ulaula niw he mezaat. Ne kenè dey iyan id-empua keniyu su wey metueni te menge etew he edtumanen niw is impenurù dey keniyu su maambe ke kenè niw ed-isipen he epustul key ni Kristu, asal, ed-ul-ulahan niw is hustu.

2 Kurintu 6:8

Duen edtahud kenami ne zuen daan menge etew he kenè key zan edtehuzen. Duen edalig kenami ne zuen daan ed-ituk kenami. Duen egkag̵i he teruen key, iyan, kenà tarù is egkeg̵iyen dey.

2 Kurintu 8:18

Ibpezuma zey kandin is sevaha kayi te menge suled tew he tenged te kedhag̵ù din te kedsengyawa te Meupiya he Tudtulanen, utew sikandin telehuzen te menge tumutuu te langun he menge inged.

2 Kurintu 8:21

Su egkesuatan dey he hustu is ebeelan dey sumalà is ked-isipa kenami te Megbevayà ne kenà duen dà taman, kekenà, maahà daan te menge etew he metazeng is menge vaal zey.

Gelasya 5:22

Egketuusan ta zaan is menge ulaula he egkehimu pinaag̵i te g̵ehem te Wag̵as he Mulin-ulin. Su emun ed-uwiten ki te Wag̵as he Mulin-ulin, mahal zini te g̵ehinawa ta is menge zuma ta, layun ki egkelipey, melinawen layun is gehinawa ta, mepelevayen ki, belig̵eg̵awen ki, metulanged ki, metinumanen ki,

Ipisu 4:25

Umba, menge suled, engkezi niw is kedtarùtarù. Kinahanglan he tutuu is egkeg̵iyen niw ziyà te menge zuma niw. Su nesevaha kiw he pudu parti te lawa ni Kristu.

Ipisu 5:9

Su emun neteyawan te Megbevayà is isip niw, egkeulaula niw is langun he hustu wey metazeng he vaal he ibpenurù te tutuu he tuluuwen.

Ipisu 6:14

Ne tenged kayi, andam kew en. Layun tutuu is egkeg̵iyen niw wey ed-isipen niw ne iyan heini bakes niw. Ul-ulaha niw layun is metazeng he ulaula ne iyan heini limbutung niw.

Pilipus 3:1

Na, menge suled, ketepusan heini he sambag ku keniyu. Lipey kew tenged te upakat niw te Nengazen. Maambe ke idsublì ku keniyu is daan he sambag ku su melemu zà heini, ne kela ke egkehimu he pinaag̵i kayi egkelig-enan is isip niw.

Kulusas 4:5

Purungi niw, menge suled, te minsan keenu he timpu is ulaula niw ziyà te menge etew he wazè pa medtuu ki Kristu su wey meketuu sikandan te Lalag te Megbevayà.

1 Tiselunika 4:12

Ne emun ebeelan niw heini edtehuzen kew te menge etew he kenè pa tumutuu, ne zutun kenè en daan kinahanglan he ebpekevuyù kew te igkeuyag niw ziyà te minsan hentei.

1 Timoteo 2:2

Iampù dan daan is menge hadì wey is minsan hentei he zuen din keg̵ehem su wey mebmelinew is ked-ubpè tew wey wazà samuk te kebpurungi tew kedtumana te egkesuatan te Megbevayà wey te hustu he ulaula.

1 Timoteo 3:11

Iring din ded daan is bahi he esawa te diyekunu su kinahanglan he telehuzen sikandin. Kenà menge vereituk, kekenà, egketengkaan is ked-isipa zin te langun wey egkengeserig̵an te minsan hengkey he meupiya he ulaula.

1 Timoteo 3:4

Kinahanglan he meupiya is ked-uwita zin te esawa zin wey menge anak din. Kinahanglan he menge mepeveyveyaan wey metinehuzan layun is menge anak din kandin.

1 Timoteo 4:12

Minsan pa te menguhed ke pa, kinahanglan he mezait ka he edtehuzen te minsan hentei; kinahanglan he iyan ka ed-iringan te menge tumutuu ki Kristu, ne tenged kayi kinahanglan he tegteg̵ami nu is kegkag̵ikag̵i nu, is ulaula nu, is kebmahala nu te langun, is kedsarig nu te Megbevayà, wey is kedlikayi nu te meremerik he ulaula.

1 Timoteo 5:10

Ne kinahanglan daan he nevantug sikandin tenged te menge vaal zin he meupiya iring te ked-elimahi te menge vatà, ked-elimahi te menge meg̵eliyug; nekelùlù sikandin te paa te menge tumutuu, midtavang sikandin te nengeseeng wey mibeelan din is minsan hengkey he menge meupiya.

1 Timoteo 5:2

Is menge vahi he meg̵urang en, sembag̵i nu zaan he iring te iney nu en wey is menge menguhed he vahi, sembag̵i nu sikandan he iring te menge etevey nu en. Ne kinahanglan he utew hustu is ked-isipa nu kayi ziyà te kandan.

Tito 1:8

Kinahanglan he meelima sikandin te menge meg̵eliyug din ne kinahanglan daan he iyan utew zin egkesuati is kedtevangi zin te menge etew. Metau sikandin he ed-isip te hustu. Metazeng sikandin he etew wey igkesuat te Megbevayà is menge ulaula zin. Metau zaan sikandin he ed-eg̵en te menge suat te lawa zin.

Tito 2:14

Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge g̵aked din he etew he nelumpiyuwan he utew en egkengesuat he ed-ulaula te meupiya.

Tito 2:2

Is menge meg̵urang en he maama, ne iyan ipenurù nu kandan is: kinahanglan he metau sikandan he ed-eg̵en te menge suat te lawa zan; kinahanglan he zait sikandan he edtehuzen tenged te menge ulaula zan he meupiya; kinahanglan he metau zan he ed-isip te hustu. Meheg̵et is kedtuu zan te Megbevayà, ebmahalen dan diyà te g̵ehinawa zan is menge zuma zan, wey meinentusen sikandan.

Tito 2:7

Sikew zaan, kinahanglan he layun meupiya is kenikew he ulaula su wey iyan ka meiringi te menge zuma nu. Ne emun ebpenurù ka, kinahanglan he hustu is tuyù nu wey sungkad te Lalag te Megbevayà is paag̵i nu te kebpenurù.

Tito 3:14

Ipenurù nu ziyà te menge zuma nu he tumutuu ziyan he kinahanglan he iyan dekelà diyà te g̵ehinawa zan is ked-ulaula zan te meupiya wey zan metevangi is menge edlised. Kenà meupiya ke zuen tumutuu he peg̵ulen su wazà pulus dutun.

Hibriyuhanen 11:2

Is menge tipehuna he etew, nezelig̵an sikandan te Megbevayà tenged te midtuuwan dan sikandin.

Hibriyuhanen 13:18

Menge suled, iampù key layun keniyu. Netuenan dey he wazà igkesawey te menge ulaula zey su iyan dà egkesuatan dey he meveeli zey is layun meupiya.

Santiago 1:27

Is etew he hustu is ked-azap din te Megbevayà, edlikayan din is menge mezaat he ulaula he iyan ed-ul-ulahan te menge etew zini te kelibutan he kuntada te Megbevayà. Meupiya mulà is ulaula zin. Ebpurungan din is menge edlised he menge ilu he vatà wey menge valu he vahi. Iyan heini egkesuatan te Amey tew he Megbevayà he paag̵i te ked-ezapa tew kandin.

Santiago 3:17

Is etew he ziyà ebpuun te Megbevayà is ketau zin, wazà igkesewayi kandin. Melinew is kedepitè din te zuma he etew, ebpurungan din is menge zuma zin; kenà sikandin mevurut, kekenà, mepezumdumahan. Hihizuwen wey metulanged sikandin; wazè din ibpelavi he minsan hentei ne kenà uvag dà is kedtuu zin.

1 Pedro 1:22

Ne g̵eina te nemeketuu kew en te tutuu he tuluuwen nengelumpiyuwan kew en te mezaat he ulaula ne kenà tarù is kebmahala niw te menge zuma niw he tumutuu. Minsan pa zutun, heg̵eta niw pa is kebmahala niw ziyan te g̵ehinawa niw te kada sevaha te menge zuma niw.

1 Pedro 2:12

Kinahanglan he utew metazeng is menge ulaula niw su wey maahà te menge etew he kenà tumutuu. Su minsan ke egkeg̵iyen dan he mezaat is ulaula niw, egketuenan dan gihapun he meupiya is ed-ul-ulahan niw ne ebpekezalig dan te Megbevayà keuzemà te andew te kebulusi zin te menusiyà.

1 Pedro 4:8

Kinahanglan he iyan lavew he edhemenan niw is kebmahala niw ziyà te g̵ehinawa niw te minsan hentei he zuma niw he tumutuu su emun ebmahalen ta is menge zuma ta melemu ki zà ebpekepesaylu te menge salè dan kenita.

2 Pedro 3:1

Minahal he menge suled ku, ikezuwa en heini te kebpesurati ku keniyu. Iyan tuyù ku kayi te kezezuwa ku kebpesurati keniyu is: wey kew mekeisip te hustu pinaag̵i kayi te menge sambag ku keniyu.

1 Juan 3:18

Menge mahal ku he anak, kinahanglan he kenà menge lalag dà is kebmahala ta te menge zuma ta, kekenà, kinahanglan he ibpeehè ta is kebmahala ta kandan pinaag̵i te menge ulaula ta.

1 Juan 3:3

Is minsan hentei he ebperateng te kedlikù ni Kristu, layun din ebpurungi is menge ulaula zin su wey wazà mezaat iring te wazà daan mezaat he ulaula ni Kristu.

1 Juan 4:1

Menge minahal ku he suled, kenè niw petuluy tuuwi is etew he egkag̵i he mid-ulinan sikandin te Wag̵as he Mulin-ulin. Gezami niw zè pa wey niw metueni ke ebpuun be te Megbevayà is ed-ulin kandin. Umba egkeg̵iyen ku heini su mezakel en is menge ebpenurù te tarù he midlepew zini te kelibutan he mid-ulinan sikandan te teruen he mulin-ulin.