Pilipus 3:19 - Manobo Western Bukidnon

¹⁹ Siguradu egkeimpirnu sikandan su iyan ebayàbayà kandan is menge mezaat he kebayà te lawa zan. Ibmeupiya te g̵ehinawa zan is menge mezaat he ulaula, iyan, meupiya pezem ke igkeeled dan; ne iyan dan dà egkeisip is menge vutang he zini te kelibutan.

Pilipus 3:19 Кръстосани препратки

Mateo 16:23

Ne midsinaru si Jesus diyà te ki Pedro is egkag̵i te, “Sikew is ed-iring ki Setanas, awè ka zini te kediey. Egkesanggen a kenikew su wazà diyà te isip nu is egkesuatan te Megbevayà, kekenà, iyan diyà te isip nu is egkesuatan te etew!”

Mateo 25:41

Ne zutun ekeg̵iyan ku is menge etew he ziyà te zapit te egkeg̵ivang ku te, ‘Sikiyu is midrewakan te Amey ku he Megbevayà, awè kew kayi! Su zutun kew te regreg he wazè din pidtemanan he integ̵ana he zaan ki Setanas he iyan idsilut kandin duma te menge velinsug̵uen din!

Lucas 12:19

Ne zutun, geina te utew meupiya is kebpekesavuk ku he etew, kenà ad maan edterebahu su naazen ku en is minsan hengkey he egkinehenglanen ku taman te pira pa he tuig. Ne tenged kayi ebperenggey e zà is ebpurung egkaan, ed-inum, wey edlipeylipey,’ ke sikandin.

Lucas 16:19

Ne mid-uman megkag̵i si Jesus te, “Duen sevaha he etew he sepian utew. Ne haazà is sepian, utew menge mahal he manggad is idsun-ud din. Ne kada andew ne iyan dà ibpekaan kandin is utew mahal wey metaam he egkeenen.

Lucas 18:4

Ne neug̵et en haazà he kenà edseg̵ipaan dutun te huwis is hangyù dutun te vahi. Ne g̵eina te neug̵et en is layun kedlikùlikù dutun te vahi he edhangyù diyà te kandin, ne neisip dutun te huwis is, ‘Minsan wazè ku kehandek te Megbevayà ne wazè ku zaan kedtahud te minsan hentei etawa,

Ruma 16:18

Su is menge etew he ed-ulaula te iring kayi, kenè dan edtumanen is sug̵ù te Nengazen tew he si Kristu, kekenà, iyan dan edtumanen is kandan he menge suat. Pinaag̵i te ketau zan te kegkag̵i wey pinaag̵i te mekempet he egkeg̵iyen dan, egkeekalan dan is isip te menge paglung he etew.

Ruma 6:21

Ne wazà pulus he nekuwa niw te ked-ul-ulaha niw zengan te menge mahawag he g̵untaan utew niw en igkeeled. Su emun ebpeniguduwan te etew is iring dutun, iyan edungguan din is kemetayen he wazè din pidtemanan.

1 Kurintu 3:3

su kemulu kew pa ebeyveyaan te keniyu zà he suat. Su zuen kun duma keniyu he egkesina ne zuen duma pa he ebpekidtebek, ne tenged kayi henduen be te ebeyveyaan kew pa te suat niw iring te menge etew he wazè pa medtuu ki Jesus.

1 Kurintu 5:2

Ne minsan pa zutun kemulu kew pa ebpegalbu. Kunaan niw vuwa ke utew meupiya is ulaula niw! Deyzey pezem ke egkeseeng kew. Kinahanglan pezem he wazè niw tug̵uti heeyan is maama he mebpekiduma keniyu.

1 Kurintu 5:6

Maan is ebpegalbu kew? Netuenan niw is erubasa he edhenduen te, “Minsan ke zuen deisek dà he tapey ne egketepayan din is sengebisin en he erina he ebeelan he supas.”

2 Kurintu 11:12

Kenè ku edlekaan heini is lalag ku he kenè ku kebuyù diyan su wey haazà is menge uvag kun lavew he epustul ni Kristu, kenè dan mekekag̵i he iring te kenami is menge paag̵i zan te kebaal.

2 Kurintu 11:15

Umba, kenè ki egkeinuinu ke egkehimu zaan is menge sulug̵uen ni Setanas he iring te menge metazeng he sulug̵uen te Megbevayà. Iyan, keuzemà edsilutan sikandan sumalà is menge mezaat he vaal zan.

Gelasya 6:13

Haazà is menge etew, ne ibpenurù dan he kinahanglan he mebpesirkunsidar kew sumalà is penurù te kesug̵uan, ne minsan pa zutun kenè dan ebpurungan edtumana is kesug̵uan. Umba egkesuatan dan he mebpesirkunsidar kew su wey mezalig sikandan tenged te nehimu kew he menge kabig dan.

Pilipus 2:21

Is duma, ne iyan dà egkeisip dan is kandan dà he egkesuatan, ne kenà iyan is egkesuatan ni Jesu Kristu.

Kulusas 3:2

Ed-isipen ta layun heini ne kenè te en ed-isipen is menge mezaat he ulaula zini te tanà.

2 Tiselunika 1:9

Iyan silut din kandan is kemetayen he wazà pidtemanan. Egkesuwey zan is Nengazen wey is mekeg̵eg̵ehem he anlag din.

2 Tiselunika 2:12

Ne tenged dutun, edsilutan te Megbevayà is langun he kenà edtuu te tutuu he tuluuwen, su iyan igkesuat dan is mezaat he ulaula.

2 Tiselunika 2:8

Ne zutun, human ebpeg̵awag̵awa sikan is utew mesinupaken he etew. Iyan, dutun te kebpekeuma ni Jesus edhimetayan sikandin ni Jesus pinaag̵i te mekeg̵eg̵ehem he anlag din; edhiyupen din dà ne segugunà ebpatey, ne egkeawà is gehem din.

1 Timoteo 6:5

wey is kebpekidsemukà. Ulaula heini te menge etew he nelalung en is isip dan wey kenè dan en edewaten is tutuu he tuluuwen. Kunaan dan ke petig̵ayun is kebpesakup te Megbevayà.

2 Timoteo 3:4

Menge men-aakal sikandan; kenè dan ed-isipen ke hengkey is egkeulaula tenged te kelelalung dan. Menge gelbuwen sikandan. Iyan dan ibpelavi is kelibutanen he kelipey kenà is kebmahala zan te Megbevayà.

Santiago 4:16

Iyan, sikiyu mulà, memepedelig̵en su idantal niw is ed-ul-ulahan niw, ne mezaat is iring dutun.

2 Pedro 2:1

Duen dengan menge teruen he etew he uvag kun ebpeneuven te Megbevayà ne iring din ded daan, duen menge etew he edlepew g̵untaan he ebpenurù te tarù diyan te keniyu. Sayep is ibpenurù dan te meeles ne ebpekezezaat heini te upakat niw te menge tumutuu. Ibpenurù dan he kenà Nengazen tew si Jesus he iyan pezem mibelukas kandan ne tenged dutun egketik-awan sikandan ke edsilutan dan.

2 Pedro 2:13

Utew merasey is silut he egkeantus dan keuzemà iring te merasey zaan is ibpeantus dan te menge etew. Iyan kelenganan he egkesuatan dan is kedtumana zan te minsan maandew pa te minsan hengkey he meremerik he kebayà te lawa zan. Igkeeled niw wey igkesudii sikandan keniyu su minsan ke ebpekidtug̵en dan keniyu ziyà te menge keemuran niw utew zan egkesuati is kedtarùtarù keniyu.

2 Pedro 2:3

Tenged te suat dan te selapì, ebpenepian kew zan pinaag̵i te penurù dan he tarù. Daan en he midteg̵ana is silut kandan; andam en is Megbevayà te kedsilut kandan.

Hudas 1:10

Iyan, haazà is menge etew mulà he ebpenurù te tarù, edsumpeliten dan is kenè dan egkesavut. Iring sikandan te menge leew he langgam he kenà ebpekeisip-isip su is ulaula he egkesuatan te lawa zan, iyan edtumanen dan ne iyan haazà ebpekezezaat kandan.

Hudas 1:16

Ne haazà is menge etew he netagnà ni Inuk, menge perelivak wey perevasul sikandan. Iyan dan edtumanen is menge memezaat he kebayè dan. Memepelevawen dan, iyan, edigdig̵en dan is menge zuma he etew su wey zan melimbungi.

Hudas 1:4

Umba kinahanglan he egkeg̵iyen ku heini su zuen menge etew he nekeamur keniyu, iyan, id-eles dan he kenà hustu is edtuuwan dan. Wazè dan kedtahud te Megbevayà; edhelinen dan pezem is tutuu he tuluuwen su ibpenurù dan he egkehimu ke ed-ul-ulahan tew is meremerik su utew kun belig̵eg̵awen is Megbevayà ne ebpeseyluwen kiw zin gihapun. Kenè dan edtuu he si Jesu Kristu, iyan dà egalen tew wey Nengazen tew. Dengan dà isurat te menge ebpeneuven te Megbevayà ke hengkey is silut kandan.

Impezayag 18:7

Utew subra is kebpurungi zin te kebpekesavuk din ne g̵untaan iyan bales kandin is kegkeseeng wey is merasey he kebpekesavuk. Su kenà sikandin ed-engked he ebpegalbu, ke sikandin diyà te isip din te, ‘Bai a ne kenà a valu. Kenà egkehimu he egkeumahan a te kemereg̵enan.’

Impezayag 19:20

Ne midakep haazà is langgam ne midakep daan kes ebpeneuven ni Setanas, sikan is mibpaahà te menge egkein-inuwan diyà te etuvangan te langgam. (Pinaag̵i zutun te menge egkein-inuwan mid-ekalan din wey meketuu te langgam haazà is langun he menge etew he midtiyapan te tiyap duen te langgam wey mid-azap te ledawan te langgam.) Ne sikan is langgam wey kes ebpeneuven ni Setanas, intimbag sikandan he uuyag pa ziyà te ranew he egkeregreg te esupri.

Impezayag 21:8

Iyan, sikan is egkehandek he edsundan kedì wey is menge kenà metinumanen, is menge etew he memahawag is ulaula, is menge memumunù, wey is menge meremerik is betasan, is menge keteuwan he etew, wey menge ed-azap te kenà tutuu he Megbevayà wey is langun he teruen he menge etew, iyan egketemanan dan is id-agbur sikandan diyà te ranew he nepenù te egkeregreg he esupri he iyan ikezuwa he kemetayen,” ke sikandin.

Impezayag 22:15

Iyan, diyè dà te meziyù is mekeeled-eled is baal zin, wey is menge keteuwan, is memeremerik is ulaula, is menge memumunù, is ebpemenimba te menge ledawan wey is langun he menge etew he ebpenurù te tarù wey is etew he limbung is ulaula zin.