Pilipus 1:7 - Manobo Western Bukidnon

⁷ Hustu iyan is ked-isipa ku keniyu te iring kayi su minsan ke pinirisu a wey ke kenà a pinirisu wey ke edsangyew a te Meupiya he Tudtulanen wey ke edtevaken ku is menge kuntada te Lalag te Megbevayà, mahal kew layun dini te g̵ehinawa ku su pudu kiw ingkeg̵ag̵ew te Megbevayà.

Pilipus 1:7 Кръстосани препратки

Nengeulaula 20:23

Iyan dà egketuenan ku is: diyà te kada inged he imbayè dey ne impezayag kedì te Wag̵as he Mulin-ulin he egkepirisu ad ne mezakel pa he kemereg̵enan is egkeseg̵azan ku.

Nengeulaula 21:33

Ne haazà is kepitan, mibeyaan din si Pablo ne midakep din ne insug̵ù din he hiketi sikandin te zezuwa he kedina. Ne zutun in-insè din te menge etew ke hentei haazà is etew ne hengkey is salè din.

1 Kurintu 13:7

Ebpekeantus ki te minsan hengkey he mereg̵en, ne kenè ta ed-isipen he mezaat is ulaula te zuma ta, kekenà, layun ki edsarig te keupiya te ulaula te zuma ta. Ne kenè ta ebelesan is ebpesipala kenita, kekenà, ebpesegdanan ta.

1 Kurintu 9:23

Umba ebeelan ku heini su wey mesangyew is Meupiya he Tudtulanen ne wey a zaan mekeambit te menge tuvad he impenaad kenitew pinaag̵i te Meupiya he Tudtulanen.

2 Kurintu 3:2

Sikami mulà, kenè key egkinahanglan te iring dutun. Netuenan dey he iyan kew surat dey su pinaag̵i te ulaula niw he meupiya egketuenan te minsan hentei he meupiya zaan is kenami he ulaula.

2 Kurintu 7:3

Kenà iyan igkeg̵iya ku kayi su zuen igkesewayi ku keniyu. Nekag̵i ku he zaan he utew kew mahal zini te g̵ehinawa zey. Te uuyag key pa wey minsan ke ebpatey key en ne kenè kew g̵ihapun egkeawà dini te g̵ehinawa zey.

Gelasya 5:6

Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

Ipisu 3:1

Ne tenged kayi te langun, siak si Pablo, is pirisu tenged te kedsundan ku ki Jesu Kristu, layun ku sikiyu id-ampù diyà te Megbevayà. Umba nepirisu a su insangyew ku is Lalag te Megbevayà diyan te keniyu te kenà menge Hudiyu.

Ipisu 4:1

Ne tenged kayi te langun, siak is pirisu tenged te midtuman ku is menge sugù te Nengazen, edhengyuan ku sikiyu he g̵eina te midhimu kew te Megbevayà he menge tumutuu zin, ul-ulaha niw is ulaula he zait he ed-ul-ulahan te tumutuu.

Ipisu 6:20

Umba nehimu a he sulug̵uen te Megbevayà su wey ku ikepenudtul heini is Meupiya he Tudtulanen. Ne tenged daan kayi te kebpenudtul ku, nehimu a he pirisu. Umba, menge suled, iampù a su wey kenà a mahandek te kebpenudtul su iyan heini ketengdanan he imbeg̵ey kediey te Megbevayà.

Pilipus 1:12

Menge suled, egkesuatan ku he mesavut niw he is langun he mereg̵en he nehitavù kediey, ne kenà mezaat, kekenà, meupiya, su neketavang kedì te kedsengyawa te Meupiya he Tudtulanen.

Pilipus 1:13

Su is langun he menge sundaru he guwardya zini te turug̵an te hadì wey is minsan hentei pa kayi, ne netuenan dan he mibpirisu a tenged dà te sulug̵uen a ni Kristu.

Pilipus 1:14

Ne kenà duen dà taman su is kezekelan te menge zuma tew he tumutuu, ingkeheg̵et te kedsarig dan te Nengazen heini is kebpirisuwa kedì. Ne tenged kayi ed-iseg is sigudu zan te kedsengyawa te Lalag te Megbevayà ne kenè dan en egkehandek.

Pilipus 1:5

su egketenuzan ku is kedtevangi niw kediey te kedsengyawa ku te Meupiya he Tudtulanen puun pa te timpu zengan te kebpeketuu niw taman en guntaan.

Pilipus 2:22

Si Timoteo, netuenan niw he hustu is menge ulaula zin. Iring sikandin te tutuu he anak ku te kedtevangi zin kedì te kedsengyawa kayi te Meupiya he Tudtulanen.

Pilipus 4:14

Ne minsan pa te iyan heini, utew kew metulanged su midtevangan a keniyu kayi te menge seeng ku he mezakel.

Pilipus 4:15

Sikiyu is menge tigPilipus, netuenan niw he zutun te kedhipanew ku puun diyan te prubinsya he Mesidunya hein aney ku en ipenudtul ziyan is Meupiya he Tudtulanen, iyan kew zà menge tumutuu he midtavang kedì. Wazà duma he gurupu te menge tumutuu he nehimu he menge timbang ku su iyan kew zà nekeveg̵ey kedì te selapì.

Pilipus 4:3

Ne sikew zaan is timbang ku ziyan, egkesuatan ku he tevangi nu heini is menge vahi wey zan heini metuman su mibpenigudu zan te kedtavang kedì te kedsengyawa ku te Meupiya he Tudtulanen. Ne elin daan si Clemente wey zuen pa menge zuma niw he midtavang kedì. Is menge ngazan dan te langun, ne nekesurat en diyà te libru te Megbevayà he zutun inlista zin is mibeg̵ayan te untung he wazè din pidtemanan.

Kulusas 4:18

Siak si Pablo, ebpengemusta a keniyu. Tuus heini is kedsurata ku te ngazan ku he kediey he surat heini. Kenè niw lipati he pirisu a ne iampù a keniyu. Berakat he ikeg̵ag̵ew kew te Megbevayà.

Kulusas 4:3

Ne emun ed-ampù kew, iampù key zaan keniyu. Ampù kew he himuwa te Megbevayà is paag̵i wey key mekesangyew te in-eles dengan he lalag din mehitenged ki Kristu. Umba zini a g̵untaan te pirisuwan su insangyew ku heini is lalag.

1 Tiselunika 5:5

Su sakup kew mulà te merayag wey te maandew, he ke và dà egkeg̵iya, sakup kew te Megbevayà. Su sikitew, wazè tew kelavet te merusirem wey kezukileman.

2 Timoteo 1:8

Ne tenged dutun kenè nu ikeeled is kebpenurù nu mehitenged te Nengazen tew ne kenà a zaan kenikew ikeeled is gaked din wey nepirisu tenged te kedsengyawa kandin, kekenà, pinaag̵i te g̵ehem te Megbevayà he idtavang kenikew, ambit ka zaan kayi te ked-entusa ku te kemeresayan tenged te kedsengyawa te Meupiya he Tudtulanen.

2 Timoteo 2:9

Ne tenged kayi te kebpenudtul ku te Meupiya he Tudtulanen midrasey a te menge kuntada te Megbevayà ne neeg̵en a te kedina he iring te mesinupaken, iyan, kenà mulà egkeeg̵en is Lalag te Megbevayà.

Pilimun 1:13

Neisip ku he meupiya pezem ke iyan sikandin duma ku kayi su wey mehimu sikandin he iyan tavang nu kedì te kemulu e pa nepirisu zini tenged te kedsengyawa ku te Meupiya he Tudtulanen.

Hibriyuhanen 3:1

Ne tenged kayi, menge suled ku te kedtuu, mid-umbita kew zaan te Megbevayà wey kew mekeubpà keuzemà diyà te langit. Purungi niw isipa si Jesus. Iyan sikandin kes midsug̵ù te Megbevayà dini te kelibutan wey sikandin mehimu he lavew he memumuhat he edtavang kenitew kayi te kebpesakup tew te Megbevayà.

1 Pedro 4:13

Kenè kew meinuinu, kekenà, lipey kew utew su pinaag̵i kayi ebpekeambit kew te menge kemeresayan he naantus ni Kristu ne tenged dutun utew kew zaan egkelipey keuzemà ke ibpezayag din kenitew haazà is bulawan he ed-ulian.

1 Pedro 5:1

Sikiyu is ebmeg̵urangen te menge tumutuu, duen idhangyù ku keniyu su ebmeg̵urangen a zaan. Nekevantey a te kedresaya zengan ki Kristu ne iring keniyu, ebpekeseled a zaan te vulawan he ed-ulian he ibpeg̵awag̵awa keuzemà.

2 Pedro 1:13

Su taman te kemulu e pa zini te kelibutan meupiya ke igkepezineg ku keniyu heini su wey kenè niw melipati.

1 Juan 3:14

Netuenan tew he zengan iyan egkeperateng tew is kemetayen he wazà pidtemanan. Ne netuenan tew zaan he g̵untaan duen tew en untung he wazà pidtemanan. Umba netuenan tew heini su utew en mahal zini te g̵ehinawa tew is menge zuma tew. Is minsan hentei he kenà mahal ziyà te g̵ehinawa zin is menge zuma zin, kemulu pa sikandin ebpekeperateng te kemetayen he wazà pidtemanan.