Nengeulaula 9:36 - Manobo Western Bukidnon

³⁶ Ne ziyà te inged he Hupi, duen sumusundan he vahi he egngezanan ki Tebita, ne emun kineg̵iyan he Gerisyahanen, iyan ngazan din si Durkas, he ke và dà egkeg̵iya, Kuleping. Ne heini is bahi, mezakel is menge meupiya he vaal zin; layun edtavang te egkengeayuayu.

Nengeulaula 9:36 Кръстосани препратки

Mateo 25:17

Iring din ded daan sikan is sulug̵uen he mibeg̵ayan te zezuwa he libu he pisus, su netig̵ayun daan te zezuwa pa he libu.

Juan 15:5

Su iyan a sikan is lawa ne iyan kew menge subpang ku. Is etew he kenà edsuwey kedì iring te kenà a zaan edsuwey kandin, iyan ebpekepenigudu ebpekepemeg̵as. Wazà egkehimu niw ke ebpekesuwey kew kediey.

Juan 15:8

Emun ebpenigudu kew ebpemeg̵as, he ke và dà egkeg̵iya, ke layun meupiya is menge vaal niw, egkezelig̵an te menge etew is Amey ku he Megbevayà ne egketuenan he tutuu kew iyan he menge sumusundan ku.

Nengeulaula 10:23

Ne impeseled dan ni Pedro ne impehizeg̵è din sikandan te sengekezukileman. Ne te nepawà dutun, miduma si Pedro kandan. Ne zuen daan miduma he menge tumutuu he tigHupi.

Nengeulaula 10:31

Ke sikandin te, ‘Cornelio, midineg en te Megbevayà is ked-ampù nu, ne wazè din daan melipati is tavang nu te menge etew.

Nengeulaula 10:8

Midtudtul kandan ni Cornelio is nehitavù kandin ne midsug̵ù din sikandan diyà te inged he Hupi.

Nengeulaula 11:13

Ne midtudtulan key ni Cornelio he zuen belinsug̵uen te Megbevayà he mibpaahà kandin diyà te valey zin. Ne migkag̵i kandin haazà is belinsug̵uen te, ‘Sug̵ua nu ziyà te inged he Hupi is ed-angey te etew he egngezanan ki Simon Pedro.

Nengeulaula 11:5

Ke sikandin te, “Diyà a te inged he Hupi is ed-ampù ne zuen impaahà kediey te Megbevayà. Neehè ku is midteyuntun he ebpuun te langit he iring te zekelà he layag he midhiketan is heepat he kilid din ne neketanà diyà te uvey ku.

Nengeulaula 9:38

Ne is inged he Hupi, uvey te inged he Lida, ne is menge sumusundan diyà te Hupi, hein nezineg dan he ziyà si Pedro te Lida, midsug̵ù dan diyà te kandin is dezuwa he maama he impepenudtul kandin te, “Hendini ka g̵aanggaan.”

Nengeulaula 9:42

Ne nekeeneb haazà he tudtul te tivuuk he inged he Hupi, ne mezakel is nemeketuu te Nengazen he si Jesus.

Ipisu 2:10

Su is kedlimbag̵a kenita he veg̵u, ne iyan baal te Megbevayà. Pinaag̵i te kebpekidsevaha ta ki Jesus midlimbag ki zin su wey ta meulaula is meupiya he midteg̵ana zin en he zaan wey ta meveeli.

Pilipus 1:11

Ne zutun egkeveelan niw is minsan hengkey he metazeng he ulaula tenged te g̵ehem he ibeg̵ey ni Jesu Kristu su wey mezalig wey mevantug is Megbevayà.

Kulusas 1:10

Su emun ebeelan din is iring kayi, ne human egkehimu is menge ulaula niw he zait he menge ulaula te menge etew he neg̵aked te Nengazen tew, ne egkehimu zaan he layun niw egkeveeli is egkesuatan din; layun niw egkeulaula is minsan hengkey he menge meupiya he ulaula. Ne layun daan ed-iseg is kegketueni niw te menge ulaula te Megbevayà.

1 Tiselunika 4:10

Netuenan ku he ebmahalen niw en is menge tumutuu ziyà te tivuuk he prubinsya he Mesidunya. Ne edhengyuan dey pa sikiyu, menge suled, he ipeiseg niw pa is kebmahala niw ziyà te g̵ehinawa niw te langun.

1 Timoteo 5:10

Ne kinahanglan daan he nevantug sikandin tenged te menge vaal zin he meupiya iring te ked-elimahi te menge vatà, ked-elimahi te menge meg̵eliyug; nekelùlù sikandin te paa te menge tumutuu, midtavang sikandin te nengeseeng wey mibeelan din is minsan hengkey he menge meupiya.

Tito 2:14

Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge g̵aked din he etew he nelumpiyuwan he utew en egkengesuat he ed-ulaula te meupiya.

Tito 2:7

Sikew zaan, kinahanglan he layun meupiya is kenikew he ulaula su wey iyan ka meiringi te menge zuma nu. Ne emun ebpenurù ka, kinahanglan he hustu is tuyù nu wey sungkad te Lalag te Megbevayà is paag̵i nu te kebpenurù.

Tito 3:8

Utew tutuu heini is impesavut ku kenikew. Egkesuatan ku he ipurung nu ipenurù heini ziyan su utew hustu wey zekelà is pulus kayi ziyà te minsan hentei. Ne emun nesavut en heini te menge tumutuu te Megbevayà iyan dekelà diyà te g̵ehinawa zan is ked-ul-ulaha zan te meupiya.

Hibriyuhanen 13:21

Berakat he pinaag̵i ki Jesu Kristu, is Megbevayà he ebeg̵ey te kelinew, beg̵ayi kew zin te minsan hengkey he tavang wey niw tumana is egkesuatan din. Berakat daan he himuwa kiw zin he menge etew he utew zin egkesuati is menge ulaula. Edelig̵en tew si Jesu Kristu te wazà pidtemanan.

Santiago 1:27

Is etew he hustu is ked-azap din te Megbevayà, edlikayan din is menge mezaat he ulaula he iyan ed-ul-ulahan te menge etew zini te kelibutan he kuntada te Megbevayà. Meupiya mulà is ulaula zin. Ebpurungan din is menge edlised he menge ilu he vatà wey menge valu he vahi. Iyan heini egkesuatan te Amey tew he Megbevayà he paag̵i te ked-ezapa tew kandin.