Nengeulaula 9:29 - Manobo Western Bukidnon

²⁹ Ne ebpekidlalag wey ebpekidibati te menge Hudiyu he Gerisyahanen is kineg̵iyan dan. Ne ed-isipen dan en sikandin edhimetayi.

Nengeulaula 9:29 Кръстосани препратки

Nengeulaula 11:20

Ne tigSipru wey tigSirini is duma zutun te nemelag̵uy. Ne hein nekeuma zan diyà te Entiyukya, mibpenudtulan dan daan is menge kenà Hudiyu; ne impesavut dan is keag̵i te Nengazen tew he si Jesus.

Nengeulaula 17:17

Ne tenged dutun, midseled sikandin diyà te simbahan te menge Hudiyu, ne mibpekidibati sikandin te menge Hudiyu wey te kenà menge Hudiyu he edsimba zaan te Megbevayà. Ne minsan daan diyà te mirkadu ebpekidibati sikandin te minsan hentei he zutun.

Nengeulaula 18:19

Nekeuma zan diyà te inged he Ipisu ne mid-ewaan ni Pablo si Ekilu wey si Priscila. Midhendiyà sikandin te simbahan te menge Hudiyu ne mibpekibpezeyag̵à sikandin te menge ketezengan.

Nengeulaula 19:8

Ne kada Sebadu taman te tetelu he vulan mibpekiduma si Pablo te menge Hudiyu zutun te kedsimba zan, ne wazè din ikelenew is kebpenurù din kandan. Mezakel is menge ketezengan he imbeg̵ey zin kandan wey zan meketuu te penurù din mehitenged te kedhadì te Megbevayà.

Nengeulaula 22:18

Neehè ku is Nengazen he si Jesus ne ke sikandin te, ‘Gaanggaan ka genat ne awè ka kayi te Hiruselim su is menge etew kayi, kenè dan edewaten is ibpesavut nu kandan mehitenged kediey.’

Nengeulaula 6:1

Ne zutun he timpu ed-iseg ebmezakel is menge tumutuu ki Jesus. Is menge tumutuu he Hudiyu he Gerisyahanen is kineg̵iyan dan, duen ibmezaat te g̵ehinawa zan te zuma he menge tumutuu he Hudiyu. Egkag̵i haazà is menge Gerisyahanen he kenà pudu egkeveg̵ayan is kandan he menge valu he vahi ke ebpeneltelazen te kada andew is idtavang dutun te menge valu he vahi.

Nengeulaula 9:27

Ne midtevangan si Seulu ni Bernabe ne miduma zin diyà te menge epustul ne mibpenudtul zin kandan is kebpaahà te Nengazen ki Seulu ziyà te imbayè din, wey is lalag kandin te Nengazen. Ne midtudtul zin daan he si Seulu, minsan te nekuntada zin is menge Hudiyu diyà te Demasku, wazè din kegkehandek te kedsengyawa zin te kedtuu te ngazan ni Jesus.

Nengeulaula 9:28

Ne zutun nekeamur si Seulu kandan ne midrig̵urig̵u sikandin diyà te Hiruselim ne wazè din kegkehandek te kedsengyawa zin te kedtuu te ngazan te Nengazen he si Jesus.

2 Kurintu 11:26

Ne zutun te menge kedhipanew ku ne nengeeg̵iyan ku is mezakel he menge kemereg̵enan tenged te kedalem te wahig, wey tenged te menge tulisan, wey tenged te menge kuntada ku he menge zuma ku he Hudiyu wey menge kenà Hudiyu. Mezakel is menge hitavù kediey ziyà te menge inged wey ziyà te wazà meg̵inged wey ziyà te zag̵at wey pinaag̵i te menge tarù he tumutuu.

Hudas 1:3

Minahal ku he menge suled, minsan pa te iyan aney he egkesuatan ku is ebaal a te surat he ibpeuwit ku ziyan wey ku ikeseysey ziyan te keniyu is kedlibriya kenitew te Megbevayà, iyan, utew en guntaan epiki he ebpesuratan ku sikiyu wey ku sikiyu mesembag̵i. Kinahanglan, menge suled, he pekezesen kew sukul te menge etew he edhelinen dan pezem is tutuu he tuluuwen he imbeg̵ey te Megbevayà. Haazà is tuluuwen, imbeg̵ey zin kenitew te menge g̵aked din ne kinahanglan he kenè en ed-umanan te minsan hentei.

Hudas 1:9

Ne minsan si Miguel, sikan is lavew he velinsug̵uen te Megbevayà, kenà sikandin ed-ulaula te iring dutun su hein minatey zengan si Moises, mibpelewanà si Miguel wey si Setanas ke hentei is ebpekeangken te lawa ni Moises. Ne wazà mekeg̵ehem si Miguel he edsulà ki Setanas. Iyan dà lalag din kandin is: “Iyan edsawey kenikew is Megbevayà.”