Nengeulaula 7:38 - Manobo Western Bukidnon

³⁸ Ne hein nengetig̵um is menge kepuun tew ziyà te tanà he wazà dutun ed-ubpà he etew, pinaag̵i ki Moises nekepekidlalag dan te velinsug̵uen te Megbevayà diyà te vuntud he egngezanan te Siney. Ne nezawat ni Moises dutun kes kenà egkehanew he menge Lalag te Megbevayà wey zin daan ikeveg̵ey kenitew.

Nengeulaula 7:38 Кръстосани препратки

Juan 1:17

Ne pinaag̵i ki Moises imbulus te Megbevayà sikan is menge kesug̵uan, iyan, pinaag̵i ki Jesus imbulus te Megbevayà is gag̵ew zin kenitew wey is tutuu he tuluuwen.

Juan 6:63

Iyan dà ebpekeveg̵ey te untung he wazà pidtemanan is Wag̵as he Mulin-ulin. Wazà egkehimu te lawa zà duen. Is menge lalag he migkag̵i ku keniyu, diyà ebpuun te Wag̵as he Mulin-ulin, ne ebpekeveg̵ey te untung he wazà pidtemanan.

Nengeulaula 7:30

Ne neug̵et pa zutun, menge kepatan he tuig, duen belinsug̵uen te Megbevayà he mibpaahà ki Moises diyà te Siney, diyà te tanà he kenà ed-ubpaan te etew. Naahà ni Moises is belinsug̵uen te Megbevayà diyà te merapung he zug̵iyen he sagbet he egkeregreg.

Nengeulaula 7:35

Ne heini si Moises,” ke si Esteban diyà te menge punuan, “daan he wazè dan dewata te menge Hudiyu is penavang din, kekenà, migkeg̵iyan dan dà te, ‘Hentei is mibeg̵ey kenikew te keg̵ehem te kedatùdatù kenami?’” Ne ke si Esteban en maan te, “Ne pinaag̵i zutun te velinsug̵uen he mibpaahà kandin dutun te egkeregreg he sagbet, midsug̵ù si Moises te Megbevayà. Ne midhimu zin si Moises he pengulu he iyan edlibri te menge Hudiyu.

Nengeulaula 7:53

Ne is kesug̵uan te Megbevayà, imbeg̵ey kenitew zengan pinaag̵i te menge velinsug̵uen te Megbevayà, iyan, nasì wazè niw tumana,” ke si Esteban.

Ruma 3:2

Iyan, dekelà iyan is pulus su sikami is menge Hudiyu, insarig kenami is insurat he Lalag te Megbevayà.

Ruma 9:4

Su menge kevuwazan daan sikandan ni Israyil; mid-anak-anak sikandan dengan te Megbevayà. Ne impeehè din kandan is mekeg̵eg̵ehem he anlag din, ne zuen menge midtukud din he paag̵i te kedtuvazi zin kandan, ne imbeg̵ey zin kandan is kesug̵uan, ne impenurù din kandan is paag̵i te ked-ezapa kandin. Ne mezakel pa is meupiya he penaad din kandan.

Gelasya 3:19

Ne emun iyan heini, ne hengkey is pulus te kesug̵uan? Ibpesavut ku keniyu is pulus din. In-uman te Megbevayà is kesug̵uan su wey zin ipesavut kenita ke hengkey is mezaat he ulaula ta; ne egkesuatan din he zutun dà taman is kedserig̵i te kesug̵uan te kebpekeuma te kevuwazan ni Abraham he iyan si Kristu he iyan mibpenaazan te Megbevayà. Midsug̵ù te Megbevayà is menge velinsug̵uen din he ebpuun diyà te langit wey zan ikeveg̵ey is kesug̵uan diyà te ki Moises. Ne si Moises, nehimu sikandin he zatù te pid-elangan su imbeg̵ey zin daan is kesug̵uan diyà te menge etew.

Hibriyuhanen 2:2

Su is kesug̵uan he imbeg̵ey zengan te Megbevayà pinaag̵i te menge velinsug̵uen din, netuenan tew he is minsan hentei he nekesupak kayi, midsilutan te Megbevayà sumalà is supak din.

Hibriyuhanen 4:12

Uuyag is Lalag te Megbevayà ne zekelà is gehem din. Iring te sundang he zezuwa is gerangan din he utew meg̵arang, iyan, meg̵arang pa is Lalag te Megbevayà kenà haazà is sundang su edlembasan din minsan is isip ta, gehinawa ta, wey tuyù ta ne igkepetuenan din kenita ke hengkey is ked-isipa kenita te Megbevayà.

Hibriyuhanen 5:12

Neug̵et en is kebpeketuu niw ki Jesus, ne engayan kew en pezem he menge menunudlù, iyan, kenà egkehimu su kinahanglan he ebpekepepenurù kew pa ebpekepeuman wey niw mesavut is menge melemu zà he tuluuwen he ebpuun te Lalag te Megbevayà. Henduen te kemulu kew pa edsusu su kenè niw pa egkelutang te egkaan is mezesen he egkeenen, he ke và dà egkeg̵iya, is menge mezalem he ebpuun te insurat he Lalag te Megbevayà.

1 Pedro 4:11

Sikita is edwali, kinahanglan he is kedwali ta, ne utew hustu he iring te iyan en edwali is Megbevayà. Sikita is edtavang, ne kinahanglan he kenè ta edlipatan he is idtavang ta, ne ziyà ebpuun te Megbevayà su wey pinaag̵i te g̵ehem ni Jesu Kristu iyan mevantug is Megbevayà te minsan keenu su iyan dait he edelig̵en wey zait he ebayàbayà te wazà pidtemanan.