Nengeulaula 4:27 - Manobo Western Bukidnon

²⁷ Na,” ke sikandan is ed-ampù te, “netuman en kes migkag̵i nu su zini te Hiruselim mid-uyun is menge Hudiyu wey is kenà menge Hudiyu su si Hadì Hirudis wey si Gubirnedur Pilatu, nesevaha zan he ebpekigkuntada ki Jesus he pinilì nu he sulug̵uen he ibpahadì nu.

Nengeulaula 4:27 Кръстосани препратки

Mateo 14:1

Ne zutun he timpu nezineg ni Hadì Hirudis is tudtul mehitenged te ulaula ni Jesus.

Mateo 14:3

Ne iyan hinungdan te kegkehimetayi ki Juan, su midsawey zin si Hirudis he migkag̵i te, “Nekesupak ka te kesug̵uan su mid-esawa nu si Hirudyas,” ke sikandin. Ipag ni Hirudis si Hirudyas, su esawa te hazi zin he si Felipe. Ne tenged dutun te kedsewaya kandin ni Juan impezakep ni Hirudis si Juan ne mibpirisu zin. Edhimetayan din pezem si Juan, iyan, egkehandek te menge Hudiyu su netuenan dan he ebpeneuven si Juan te Megbevayà.

Mateo 14:6

Ne neuma is andew he edsilibrahan ni Hirudis is ked-enaka kandin, ne midseyawan te anak he rag̵a ni Hirudyas is menge etew he nengetig̵um dutun. Ne utew nesuat si Hirudis tenged dutun.

Mateo 21:28

Ne mid-uman megkag̵i si Jesus diyà te kandan te, “Hengkey is isip niw kayi? Duen etew he zezuwa is anak din he maama. Mibeyaan din is kakey ne migkeg̵iyan din te, ‘Diyè ka g̵untaan, Mama, terebahu te perasan.’

Mateo 23:37

Ne zutun netenuzan ni Jesus is menge ulaula te menge meg̵inged te Hiruselim ne ke sikandin te, “Igkeseeng ku sikiyu is menge meg̵inged diyà te Hiruselim su ebpemunuen niw is ebpemeneuven te Megbevayà, ne is menge sulug̵uen te Megbevayà he ibpehendiyan, ebpenulengen niw te vatu he edhimetayan niw. Utew zekelà is suat ku pezem he ed-uyemuwen ku sikiyu; ke và dà manuk, iring a te upa he edlekupan din is menge piyak din, ne kenè kew ebpelekup.

Mateo 27:2

Mibakus dan si Jesus te kedina ne inhated dan sikandin diyà te ki Pilatu he iyan gubirnedur zutun.

Marcos 10:33

Ke sikandin te, “Netuenan niw he edhendiyè kiw te Hiruselim ne emun ebpekeuma kiw zutun, siak is Kakey te Menusiyà, ibpalad a ziyà te menge punuan he menge memumuhat wey menge menunudlù te kesug̵uan. Ne egkeuyun dan he ebpehimetayan a ne ibpalad e zan daan diyà te menge etew he kenà menge Hudiyu.

Marcos 15:31

Ne sikan is menge punuan te memumuhat wey sikan is menge menunudlù te kesug̵uan, iring din ded daan is mid-ulaula zan kandin, su mid-engitan dan daan. Ke sikandan te, “Wey zè be! Nelibri zin is duma he etew, iyan, is keugelingen din, kenè din egkelibri.

Lucas 1:35

Ne midtavak haazà is belinsug̵uen te, “Is Wag̵as he Mulin-ulin, iyan ebpengelintau kayi ziyan te kenikew ne edlig-enan ka te g̵ehem te Megbevayà. Ne tenged kayi, heini is id-anak nu, pudu metazeng is menge ulaula zin ne egkengezanan sikandin he Anak te Megbevayà.

Lucas 22:63

Ne haazà is menge etew he ebantey ki Jesus, ne mid-eled-eled dan sikandin. Ne mibagkes dan is menge mata zin ne midsumbag dan sikandin, ne ke sikandan te, “Tegnaa nu ke hentei is midsumbag kenikew.”

Lucas 23:1

Ne zutun, haazà is langun he menge punuan he nengetig̵um dutun, ne mid-uwit dan si Jesus diyà te ki Gubirnedur Pilatu su wey zin mehukumi.

Lucas 4:18

“Mid-ulinan a te Wag̵as he Mulin-ulin he ebpuun te Megbevayà. Ne mibpilì a te Nengazen su wey ku ikepesavut te menge egkengeayuayu is Meupiya he Tudtulanen. Ne mibpeveyaan din kedì is menge etew wey ku sikandan metudtuli he egkengevelukasan is nengevihag ni Setanas, ne egkengeulian is nengelakap wey zan mekeahà ne egketevangan is egkengereg̵enan.

Lucas 9:22

Ne ke sikandin daan te, “Siak is Kakey te Menusiyà, kinahanglan he mezakel is menge kemeresayan he ibpaantus kediey. Edsumpeliten a te menge ebmeg̵urangen te menge Hudiyu wey te menge punuan he memumuhat wey te menge menunudlù te kesug̵uan. Edhimetayan e zan ne seled te tetelu he andew zutun egkevanhew a.”

Juan 1:11

Minsan te ziyà sikandin mekeuma te keugelingen din he menge inged, wazà utew zutun te menge zuma zin midawat kandin.

Juan 10:36

maan is egkag̵i kew he edsupaken ku is Megbevayà emun egkag̵i a he Anak a te Megbevayà? Iyan a sikan is mibpilì te Megbevayà wey a mekehendini te kelibutan.

Juan 18:28

Ne zutun mid-uwit dan en maan si Jesus puun dutun te valey ni Keyipas ne midhendiyè dan te turug̵an te gubirnedur he Rumanu. Ne meselem pa utew zutun. Ne ziyè dà is menge punuan he menge Hudiyu te g̵awas su wey kenè dan mekesupak te vetasan dan te kegkelumpiyuwi su ke edseled dan dutun wazà itug̵ut kandan is kedtampu te kegkaan te Idlavung te Kedlevayi.

Juan 18:29

Tenged dutun migawas si Gubirnedur Pilatu ziyà te kandan ne ke sikandin te, “Hengkey is idsumbunga niw kayi te etew?”

Juan 19:34

Iyan, is sevaha zutun te menge sundaru, mibpilak din te vangkew is tengkilizan ni Jesus ne zuen midtudà he ebpuun dutun he lengesa wey wahig.

Nengeulaula 10:38

Si Jesus he tigNeserit, mibpeulinan sikandin te Megbevayà te Wag̵as he Mulin-ulin ne mibeg̵ayan sikandin te zekelà he g̵ehem. Ne mid-eneb din is menge inged ne meupiya is baal zin diyà te menge etew ne nengeulian din is langun he edlelungen ni Setanas. Neveelan din heini su kenà edsuwey kandin is Megbevayà.

Nengeulaula 2:27

su netuenan ku he kenè nu ebpesegdanen is gimukud ku ziyà te Iveyaan. Siak is metinumanen he sulug̵uen nu, netuenan ku zaan he kenè nu idtug̵ut he meredak is lawa ku.

Nengeulaula 4:30

Ipelepew nu is gehem nu su wey zey meulii is egkengezeruwan, wey zuen daan menge egkein-inuwan wey singyal he igkepeehè dey pinaag̵i te g̵ehem te ngazan ni Jesus he pinilì nu he sulug̵uen nu.”

Hibriyuhanen 7:26

Iyan si Jesus lavew he memumuhat he egkinehenglanen tew su wazà igkesewayi te menge ulaula zin, wazè din salà, ne wazè din sayep. Ne kenà sikandin iring te menge mekesesalà he menusiyà, ne midhimu sikandin te Megbevayà he lavew te minsan hentei ziyà te langit.