Nengeulaula 4:26 - Manobo Western Bukidnon

²⁶ Su migkayew en is menge hadì dini te kelibutan wey nengetig̵um is menge punuan su edtebeken dan is Nengazen wey egkuntedahan dan is mibpilì din he hadì.’

Nengeulaula 4:26 Кръстосани препратки

Lucas 4:18

“Mid-ulinan a te Wag̵as he Mulin-ulin he ebpuun te Megbevayà. Ne mibpilì a te Nengazen su wey ku ikepesavut te menge egkengeayuayu is Meupiya he Tudtulanen. Ne mibpeveyaan din kedì is menge etew wey ku sikandan metudtuli he egkengevelukasan is nengevihag ni Setanas, ne egkengeulian is nengelakap wey zan mekeahà ne egketevangan is egkengereg̵enan.

Nengeulaula 10:38

Si Jesus he tigNeserit, mibpeulinan sikandin te Megbevayà te Wag̵as he Mulin-ulin ne mibeg̵ayan sikandin te zekelà he g̵ehem. Ne mid-eneb din is menge inged ne meupiya is baal zin diyà te menge etew ne nengeulian din is langun he edlelungen ni Setanas. Neveelan din heini su kenà edsuwey kandin is Megbevayà.

Hibriyuhanen 1:9

Iyan egkesuatan nu is metazeng he ulaula ne igkeepes nu is mezaat he ulaula. Tenged kayi, siak is Megbevayà nu, midhimu ku sikew he lavew te menge zuma nu ne imbeg̵ey ku kenikew is utew zekelà he kelipey.”

Impezayag 11:15

Ne zutun midhiyup te ikepitu he velinsug̵uen is budyung din ne ziyà te langit nezineg is memezag̵ing he lag̵eng he edhenduen te, “Is kedhedii te tivuuk he menusiyà, ne ziyè en guntaan te Nengazen tew wey ziyà te hadì he mibpilì din. Ne heini he hadì, ebpekehadì sikandin te wazà pidtemanan.”

Impezayag 12:10

Ne zutun, nezineg ku is utew mezag̵ing he egkag̵i ziyà te langit he edhenduen te, “Guntaan egketuman en is kedlibriya te Megbevayà te menusiyà. Impeehè en te Megbevayà is keg̵ehem din te kedhadì. Is hadì he mibpilì te Megbevayà, impeehè din en is ketenged din te kedhadì. Su midsegseg en pehendiyà te tanà si Setanas, is edsumbung te menge suled tew. Iyan sikandin midsumbung kandan diyà te Megbevayà tew te maandew wey te mezukilem.

Impezayag 17:17

Umba ed-ul-ulahan dan haazà su is Megbevayà, midhimu zin he egkesuatan dan te edtuman is tuyù te Megbevayà. Ne tenged dutun sevaha zà is egkeisip dan ne idtavang dan te langgam is keg̵ehem dan te kedhadì taman te egkengetuman is nengetagnà he menge Lalag te Megbevayà.