Nengeulaula 4:17 - Manobo Western Bukidnon

¹⁷ Edewayen tew nasì sikandan he kenè dan en maan ipenurù is kedtuu te ngazan ni Jesus diyà te minsan hentei su wey kenà mekeeneb heini is ibpenurù dan diyà te menge etew.”

Nengeulaula 4:17 Кръстосани препратки

Mateo 27:64

Umba, meupiya ke ebpeventayan nu te menge sundaru sikan is surung taman te iketelu he andew su kela ke tekawa is lawa zin te menge sumusundan din, ne egkeg̵iyen dan diyà te menge etew he nevanhew sikandin. Ne ed-iseg ebmezaat is ebpekesunud he kedlimbungi zan te menge etew.”

Mateo 9:30

Ne neulian is menge mata zan. Ne zutundutun nepuwasan is ked-ehè dan. Ne zutun migkeg̵iyan sikandan ni Jesus he kenè dan penudtula.

Juan 15:21

Iyan, ebpesipelahan kew te menge etew tenged te kedtuu niw kediey su wazè dan mekilala is Amey ku he midsug̵ù kediey.

Nengeulaula 4:21

Iyan, impaawè ded sikandan ne mibeleuzan dan he kenà ipesangyew. Ne haazà is menge ebmeg̵urangen, wazè dan neisip he paag̵i te kedsiluti kandan su nahandek dan te menge etew. Is langun he menge etew, midalig dan is Megbevayà tenged te egkein-inuwan he nehimu,

Nengeulaula 5:24

Ne hein nezineg haazà te kepitan te guwardya ziyà te simbahan wey te menge punuan he memumuhat, neked-iinseey zan ke hendei vuwa is menge epustul.

Nengeulaula 5:28

ke sikandin te, “Imbelaud dey keniyu he kenè niw ipenurù is kedtuu te ngazan ni Jesus. Ne hengkey heini is mid-ulaula niw? Insangyew niw is penurù niw zini te tivuuk he Hiruselim ne kenà taman dà kayi is mid-ulaula niw, kekenà, iyan key pa keniyu ebesulan te kedhimetayi ki Jesus.”

Ipisu 6:9

Ne sikiyu is menge egalen, iring din ded daan kayi is ul-ulaha niw ziyà te menge sulug̵uen niw. Kenè kew mebpelihandek kandan su netuenan niw he sikitew is langun, ke sulug̵uen ki wey ke egalen ki ve, ne zuen gihapun egalen ta ziyà te langit he iyan is Megbevayà ne wazè din ibpelavi te minsan hentei.

1 Tiselunika 1:8

Ebpuun diyan nekeeneb is Lalag te Nengazen, kenà diyan dà te prubinsya he Mesidunya wey ziyà te prubinsya he Gerisya, kekenà, is menge etew ziyà te minsan hendei, nezineg dan is tudtul mehitenged te kedtuu niw te Megbevayà. Wazè en kinahanglan he ibpenudtul zey pa ziyà te menge etew is kedtuu niw.

1 Pedro 2:23

Hein edsumpeliten sikandin duen te kedrensanga kandin wazà sikandin medtavak te mezaat; wazà sikandin mebpenrawak. Is kebelesi zutun te edrasey kandin, insarig din diyà te Megbevayà he iyan kes metazeng is kedhukum din.