Nengeulaula 27:41 - Manobo Western Bukidnon

⁴¹ Ne nekesukung haazà is barku te mevavew he tanà ne mid-enget. Is egkehuna he zulung kenè en egkewaleng, iyan, is huziyan he zulung egkerupet en te kezesen te zezekelà he menge vag̵el.

Nengeulaula 27:41 Кръстосани препратки

Nengeulaula 27:17

Mibitbit dan ne in-untud dan. Ne zutun mibagkes dan haazà is barku te menge pisì su wey kenà mewag̵ey. Ne g̵eina te egkehandek dan su kela ke mewag̵ey is barku ke mekesukung te memevavew he tanà he uvey zutun te veyvey te tanà he Libya, ne in-awè dan is layag ne mibpesagdan dan is barku ke hendei ed-uwita te keramag.

Nengeulaula 27:30

Ne is menge terebahanti zutun te barku, ed-ewaan key zan pezem te ebpemelag̵uy puun dutun te barku. Impenaug dan is avang ne mid-ekalan key zan he egkag̵i zan he ebperivetuwan dan haazà is dulung he edhuna.

Nengeulaula 27:40

Ne zutun migetas dan is menge pisì he inhiket dutun te menge perivatu su wey metag̵ak is menge perivatu, ne mibpenhekad dan is menge vagkes dutun te menge vegsey he idtandang dutun te barku su egemiten dan. Intaud dan is layag he ziyà te egkehuna he zulung su wey meuwit te keramag is barku pehendutun te tanà. Ne zutun migenat is barku.

Nengeulaula 27:42

Ne neisip te menge sundaru he ebpenhimetayan dan is menge pirisu su wey kenè dan mekeg̵aun dutun te veyvey ne kenè dan egkepeleg̵uyan haazà is menge sundaru.

1 Kurintu 15:58

Na, menge mahal ku he menge suled, geina te iyan heini, heg̵eta niw is kedsarig niw te Megbevayà su wey wazà ebpekezezaat te kedtuu niw. Peniguduwi niw tumana is ebpeveelan keniyu te Nengazen; hag̵ù kew te taman te egkehimu niw su netuenan niw he emun iyan edtumanen niw is ebpeveelan te Nengazen, kenà egkehimu he wazà pulus te vaal niw.