Nengeulaula 26:18 - Manobo Western Bukidnon

¹⁸ Ne is ibpesavut nu kandan, egkehimu he iyan igkeawà te kegkelakap dan te kedtuu wey zan daan meewai is merusirem ne medhalin dan diyà te merayag. Ne pinaag̵i kayi egkepeleg̵uyan dan is kebeyveyai kandan ni Setanas ne ebpekepesakup dan te Megbevayà. Ne egkepesaylu is menge salè dan tenged te kedtuu zan kedì ne egkehimu zan daan he menge tumutuu he pinilì te Megbevayà.’

Nengeulaula 26:18 Кръстосани препратки

Mateo 4:10

Ne mibensag̵an ni Jesus te, “Setanas, ewai a kenikew! Duen insurat he Lalag te Megbevayà he edhenduen te, ‘Iyan niw zà ezapa is Nengazen he Megbevayè niw. Ne is duma pa he ngazan he megbevayà, kenè niw tumana is sug̵ù din.’ ”

Mateo 4:16

Is langun kayi he menge etew, henduen be te ziyà mekeubpà te merusirem wey henduen be te ziyè dan en te Iveyaan su g̵eine te nekesuwey zan te Megbevayà. Iyan, diyà te huziyan he timpu egketeyawan en sikandan su ebpekeuma ziyà te kandan is ebpeketayew te isip dan.”

Lucas 1:77

Ibpesavut nu kandan he egkeveg̵ayan sikandan te untung he wazà pidtemanan emun ebuyù dan te pesaylu ziyà te Megbevayà.

Lucas 1:79

Henduen be te ziyè kiw ed-ubpà te utew merusirem su utew kiw egkengehandek te silut he iyan is wazè din ketepusan he kemetayen; iyan, emun ebpekeuma is Nengazen tew edteyawan kiw zin te g̵ag̵ew zin. Ne ibpeehè din kenitew is paag̵i wey ebmelinawen is ked-ubpè tew,” ke si Zacarias.

Lucas 2:32

Iyan sikandin idtayew te isip te menge etew he kenà menge Hudiyu he wazà mesayud ke hentei ka is tutuu he Megbevayà. Pinaag̵i kandin edelig̵en key is nengepilì nu he etew he menge kevuwazan ni Israyil.” Iyan heini migkag̵i ni Simeon.

Lucas 24:45

Ne zutun impesavut din human kandan is langun te impemesurat he Lalag te Megbevayà.

Lucas 24:47

Ne ibpesavut daan dutun he kinahanglan he edsug̵uen ku sikiyu te kebpenudtul te Meupiya he Tudtulanen. Ebpuunan niw is kebpenudtul niw zini te Hiruselim ne ieneb niw heini ipesavut te tivuuk he kelibutan. Ipesavut niw he kinahanglan he ed-iniyug̵an te menge etew is memezaat he ulaula ne human dan ebpeseyluwa te Megbevayà.

Lucas 4:18

“Mid-ulinan a te Wag̵as he Mulin-ulin he ebpuun te Megbevayà. Ne mibpilì a te Nengazen su wey ku ikepesavut te menge egkengeayuayu is Meupiya he Tudtulanen. Ne mibpeveyaan din kedì is menge etew wey ku sikandan metudtuli he egkengevelukasan is nengevihag ni Setanas, ne egkengeulian is nengelakap wey zan mekeahà ne egketevangan is egkengereg̵enan.

Juan 17:17

Heini is menge g̵aked ta he etew, pinaag̵i te tutuu he tuluuwen, himuwa nu sikandan he menge sulug̵uen nu. Is lalag nu, iyan tutuu he tuluuwen.

Juan 3:19

Umba edsilutan sikandin su hein nekeuma a is migeraran te kerayag dini te kelibutan, midtumù din is kerusireman, he ke và dà egkeg̵iya, is kedsupaka te Megbevayà, kenà is kerayag su mezaat is ed-ul-ulahan din.

Juan 4:10

Ne zutun midtavak si Jesus te, “Bayi, angin ke netuenan nu is ibeg̵ey kenikew te Megbevayà wey ke hentei a is ebuyù te wahig su ebpekevuyù ka pezem dini te kediey te wahig ne egkeveg̵ayan ka te wahig he ebpekeveg̵ey te untung he wazà pidtemanan.”

Juan 4:14

iyan, ke zuen ed-inum te wahig he ibeg̵ey ku kandin kenè en maan sikandin egkemezahan te minsan keenu. Su is wahig he ibeg̵ey ku kandin, egkehimu ziyà te kandin he ulu te wahig he ebpekeveg̵ey kandin te untung he wazà pidtemanan.”

Juan 8:12

Ne mid-uman megkag̵i si Jesus diyà te menge etew, ke sikandin te, “Iyan a sikan is kerayag he ebpeketayew te isip te tivuuk he menusiyà. Ne is etew he edsundan kediey, kenà en sikandin egkesakup te g̵ehem te kerusireman, kekenà, egketeyawan is kedsavut din te kerayag he ebpekeveg̵ay te untung he wazà pidtemanan.”

Juan 9:39

Ne migkag̵i si Jesus diyà te kandin te, “Umba midhendini a te kelibutan su wey mesusi is nengeulaula te menge etew. Ne is etew he netuenan din he lakap is kedsavut din, ebewian ku wey mebmeupiya is kedsavut din. Ne is etew he egkeg̵iyen din he kenà lakap is kedsavut din, utew pa ed-iseg is kegkelakap te kedsavut din.”

Juan 9:5

Kayi te zini e pa te kelibutan, iyan a kerayag he ebpeketayew te tivuuk he menusiyà.”

Nengeulaula 10:43

Netagnà si Jesu Kristu te langun he ebpemeneuven dengan te Megbevayà ne migkag̵i zan he pinaag̵i te g̵ehem te ngazan din, is langun he edsarig kandin, ebpeseyluwen din sikandan te menge mezaat he ulaula zan.”

Nengeulaula 13:47

Iyan heini ebpeveelan kenami te Nengazen su zuen insurat he lalag din he edhenduen te, ‘Midhimu ku sikew he sulù he ebpeketayew te menge etew he kenà menge Hudiyu wey mesangyew ziyà te egketemanan te kelibutan is kedlibriya ku te menge etew wey zan kenà mesiluti.’ ”

Nengeulaula 15:9

Wazà daan isipa te Megbevayà he zuen kebpekeviza te kenà menge Hudiyu kenitew su tenged te kedtuu zan mibpesaylu zin sikandan te menge ulaula zan he mezaat iring te kebpesaylu zin dini te kenitew.

Nengeulaula 2:38

Ne midtavak si Pedro te, “Kada sevaha keniyu, iniyug̵i zin is mezaat he ulaula zin ne mebpebewtismu wey metueni he ebpekidsevaha sikandin ki Jesu Kristu. Ne human egkepesaylu is menge salè din ne is Wag̵as he Mulin-ulin, ibeg̵ey kandin te Megbevayà.

Nengeulaula 20:21

Hudiyu se kenà Hudiyu, ne wazè ku impelavi su pudu ku midweliyi he kinahanglan he edtumanen dan is ebpeveelan kandan te Megbevayà he iniyug̵i zan is menge mezaat he ulaula zan ne medtuu zan te Nengazen tew he si Jesus.

Nengeulaula 20:32

Ne g̵untaan idsarig ku sikiyu ziyà te Megbevayà he iyan ebpeketavang keniyu. Ebpeketavang daan is impenurù ku keniyu he g̵ag̵ew zin kenitew. Is Megbevayà, iyan ebpekeveg̵ey kenitew te kezesen te kedtuu. Diyà te kandin egkekuwa ta zaan is kenita he vahin te menge tuvad he ibeg̵ey zin diyà te langun he menge tumutuu zin.

Nengeulaula 26:19

Na, Hadì Egripa, midtuman ku is impeehè kedì he ebpuun te langit.

Nengeulaula 26:23

su netuman en is netagnè dan he is mibpilì te Megbevayà he ibpahadì, kinahanglan he edresayen wey edhimetayan. Ne netagnè dan daan he iyan sikandin egkehuna he egkevanhew ne edtudtulan din is menge Hudiyu wey is kenà menge Hudiyu he egketeyawan is isip dan te tutuu he tuluuwen.”

Nengeulaula 3:19

Ne g̵untaan kinahanglan he ed-iniyug̵an tew en is memezaat he ulaula. Ed-empuan tew is Nengazen ne ebpeseyluwen kiw zin te menge salè tew. Ne zutun duen timpu he ebeg̵ayan is gehinawa tew te zesen he ziyà ebpuun te kandin.

Nengeulaula 5:31

Ne midtulus din en ne ziyè en sikandin te zapit te egkekewanan te Megbevayà. Sikitew is menge kevuwazan ni Israyil, egalen tew sikandin wey iyan kenitew edlibri te silut. Ne ebpeiniyug̵an din kenitew is mezaat he ulaula ne ebpeseyluwen kiw zin.

Ruma 8:17

Ne g̵eina te anak ki zin, keuzemà egkezawat ta is langun he meupiya he impenaad din kenita, ne kenà duen dà taman, su is minsan hengkey he ibeg̵ey zin ki Kristu, ibeg̵ey zin daan kenita. Iyan, wey ki zà ebpekeambit te utew meupiya he kebpekesavuk ni Kristu ke ed-entusen ta is menge kemereg̵enan tenged te kedtuu ta, iring te si Jesu Kristu, nekeantus daan te kemereg̵enan.

1 Kurintu 1:30

Ne minsan pa zutun, midhimu te Megbevayà he mesevaha si Jesu Kristu wey sikitew ne midhimu zin daan he zuen ketau tew he ebpuun te ki Kristu. Ne pinaag̵i ki Kristu mid-isip kiw en he metazeng te Megbevayà ne nehimu kiw en daan he menge g̵aked te Megbevayà, ne nevelukasan kiw zin te kegkeuripen tew te mezaat he ulaula.

2 Kurintu 4:4

Kenè dan edtuu su mid-elangan is isip dan ni Setanas he iyan ed-ezapen te menge etew kayi te kelibutan. Tenged kayi kenà egketeyawan is isip dan te Meupiya he Tudtulanen mehitenged te utew kegkelavew ni Kristu. Pinaag̵i ki Kristu egkesayud ki ke hentei is Megbevayà su iyan sikandin dagwey te Megbevayà.

2 Kurintu 4:6

Su zutun te kedlimbag̵a te Megbevayà te langun migkag̵i sikandin te, “Maawà is kerusireman ne mehimu is kerayag.” Ne iyan daan sikandin kes midtayew te isip dey su wey zey mesavut ke hengkey is gehem te Megbevayà he impezayag pinaag̵i ki Jesu Kristu.

2 Kurintu 6:14

Kenè kew, menge suled, mebpekidsevaha te menge etew he kenà tumutuu su kenà egkehimu he egkesevaha is meupiya wey mezaat. Ne kenà daan egkehimu he ebpeked-amur is kerayag wey is merusirem.

Gelasya 2:20

Tenged te kedsarig ku ki Kristu, inransang a te krus duma kandin su elili ku sikandin. Minatey a, iyan, uuyag a g̵ihapun su zini ed-ubpà te kediey si Kristu ne heini is kebpengungubpaan ku zini te kelibutan, pinaag̵i zà te kedsarig ku kandin te Anak te Megbevayà. Mahal a ziyà te g̵ehinawa zin ne mibpehimatey sikandin he elili kediey su wey a melibri.

Gelasya 3:14

Ne umba mibpehimatey si Jesu Kristu te iring dutun su wey pinaag̵i kandin ikeveg̵ey zaan diyà te menge etew he kenà menge Hudiyu is ketazeng he intuvad te Megbevayà ki Abraham. Ne pinaag̵i zutun sikitew is langun he edtuu ki Jesus, ebeg̵ayan kiw zin te Wag̵as he Mulin-ulin he impenaad dengan te Megbevayà.

Gelasya 3:2

Duen id-insè ku keniyu. Hengkey is paag̵i te kegkezewata niw te Wag̵as he Mulin-ulin? Nezawat niw ve is Wag̵as he Mulin-ulin tenged te kedtumana niw te kesug̵uan he imbilinbilin ni Moises? Wazà, su netuenan niw he imbeg̵ey keniyu te Megbevayà is Wag̵as he Mulin-ulin tenged dà te nezineg niw ne midtuuwan niw is tudtul mehitenged te nehimu ni Jesus.

Ipisu 1:11

Is langun he ed-ul-ulahan te Megbevayà, ne iyan kedtumana te tuyù din wey egkesuatan din. Ne tenged te iyan tuyù din, mibpilì key zin is menge tumutuu he Hudiyu wey key mehimu he menge sakup din he ebpekidsevaha ki Kristu. Iyan heini tuyù din he zaan he mid-isip din. Ne sikami is menge Hudiyu he nengehuna he nemeketuu ki Kristu, umba mibpilì key zin su iyan egkesuatan din he pinaag̵i kenami edelig̵en sikandin he utew mekeg̵eg̵ehem.

Ipisu 1:14

Is ked-ulini kenitew te Wag̵as he Mulin-ulin, ne iyan tuus kenitew he keuzemà ibeg̵ey zin kenitew te menge sakup din is langun he impenaad din kenitew. Ne pinaagi kayi egketuenan tew he keuzemà edhimesazen din is kedlibriya kenitew te kebpekesalè tew. Edelig̵en tew sikandin is mekeg̵eg̵ehem!

Ipisu 1:18

Id-ampù ku he iveg̵ey zin daan keniyu is kebpurung kedsavut su wey niw metueni ke hengkey is langun he meupiya he egkeperateng tew keuzemà tenged te midhimu kiw en he menge tumutuu zin, ne wey niw zaan metueni he utew mezakel zutun is menge meupiya he idtuvad din kenitew.

Ipisu 1:7

Su tenged te utew zekelà is gag̵ew zin kenitew, midlibri kiw zin te silut pinaag̵i te kedtig̵is te lengesa zutun te kebpehimatey ni Kristu, ne mibpesaylu zin is menge salè tew.

Ipisu 2:8

Su tenged dà te g̵ag̵ew zin kenita, midlibri ki zin te silut dutun te kebpeketuu ta. Wazè ki melibri pinaag̵i te kenita he vaal,

Ipisu 4:18

Wazè dan hanew te hustu he ibayà ne wazè dan untung he ibeg̵ey te Megbevayà, geina te nengepaglung sikandan tenged te kezesen te g̵ehinawa zan.

Ipisu 5:11

Is menge etew he kemulu pa ziyà te kerusireman, kenè kew medtampu kandan te ed-ulaula te menge vaal he wazè din pulus, kekenà, ipeehè niw he mezaat is menge vaal zan.

Ipisu 5:14

Ne mehitenged kayi zuen erubasa he edhenduen te, “Sikew is edlipezeng, gimerat kad; sikew is minatey, ne mevanhew kad ne egketeyawan ka ni Jesu Kristu.”

Ipisu 5:8

Su zengan utew merusirem is ibayè niw, iyan, guntaan neteyawan is ibayè niw su nehimu kew en he menge sakup te Nengazen. Ne tenged kayi, kinahanglan he zait is ulaula niw te ked-ikula niw te merayag he ibayà.

Ipisu 6:12

Su kenà iyan edtebeken tew is menge etew zà duen, kekenà, iyan edtebeken tew is menge mezaat he kedesenan he ziyà ed-ubpà te langit wey is menge kenà egkeahà he hadì, wey menge egalen, wey menge ebayàbayà te langun he menge mezaat he etew he nesakup te kerusireman guntaan dini te kelibutan.

2 Timoteo 2:26

Ne pinaag̵i zutun human ebmetandang is ked-isipa zan te langun, ne human dan egkepeleg̵uyi is gehem ni Setanas su iyan si Setanas nekezakep kandan wey zan metuman is egkesuatan din.

Hibriyuhanen 10:10

Ne g̵eina te midtuman ni Jesu Kristu is egkesuatan te Megbevayà, nengepalis is menge salè tew pinaag̵i te kesevaha zà he kebpemuhata zin te keugelingen din he lawa.

Hibriyuhanen 10:14

Ne tenged kayi te kesevaha zà he kebpemuhat din diyà te Megbevayà, sikitew is mibpelisan din te salà, midhimu kiw zin he metazeng te wazà pidtemanan.

Hibriyuhanen 11:6

Is etew he wazè din kedtuu te Megbevayà, kenà egkehimu he egkesuatan te Megbevayà is menge ulaula zin. Su is etew he ebpetavang te Megbevayà, kinahanglan he edtuuwen din he zuen Megbevayà, ne kinahanglan daan he edtuuwen din he edtuvazan te Megbevayà te meupiya is minsan hentei he edhag̵ù he ebpen-ahà te paag̵i wey sikandin mekepekid-emig̵u te Megbevayà.

Hibriyuhanen 9:15

Ne tenged kayi zaan nehimu en si Kristu he zatù tew su wey zin metukud is beg̵u en he paag̵i te kebpekidsevaha tew te Megbevayà. Ne pinaag̵i kayi, is langun he midhimu te Megbevayà he meketuu, egkezawat dan is langun he meupiya he wazè din pidtemanan he impenaad te Megbevayà. Umba egkehimu heini su pinaag̵i te kebpatey ni Kristu nengepalis is langun he menge mezaat he ulaula he nehimu te menge etew zutun te timpu he nengesakup sikandan te nehuna he paag̵i.

Santiago 2:5

Pemineg̵a niw, menge minahal ku he suled, is ibpesavut ku keniyu. Duen mibpilì te Megbevayà he egkengeayuayu. Ne minsan deisek is ketig̵eyunan dan midhimu te Megbevayà he zekelà mulà is kedsarig dan kandin ne iyan sikandan edtuvazan din pinaag̵i te kedhadì din sumalà is penaad din diyà te langun he ebmahalen dan sikandin diyà te g̵ehinawa zan.

1 Pedro 1:4

Ne elin daan egkeperateng tew is utew meupiya he idtuvad din kenitew. Integ̵ana zin en heini ziyà te langit ne zutun kenà egkeredak, kenà egkezeetan, ne kenà daan egkehanew.

1 Pedro 2:25

Iring kiw zengan te menge ayam he kerehidu he nengetazin, iyan, guntaan impeulì kiw en diyà te Megbevayà he iyan bekidu he metau he ebantey kenitew.

1 Pedro 2:9

Iyan, sikitew mulà, pinilì kiw zin. Menge memumuhat kiw te mibpilì he hadì he iyan si Kristu. Iyan kiw menge sakup din; iyan kiw menge g̵aked din he etew. Umba mibpilì kiw zin su wey tew mesangyew is tudtul te utew egkein-inuwan he menge vaal zin. Iyan sikandin nengelintau wey kiw meketuu wey kiw maawà dutun te kerusireman. Ne g̵untaan edteyawan kiw zin, he ke và dà egkeg̵iya, utew en meupiya is kedtuvazi zin kenitew.

1 Juan 1:9

Emun idtug-an ta ziyà te Megbevayà is menge salè ta, kenà egkehimu he kenè ki zin ebpeseyluwen su metazeng sikandin ne metinumanen te pesarig din. Edlumpiyuwan ki zin te langun he menge ulaula ta he kenà metazeng.

1 Juan 2:12

Ebpesuratan ku sikiyu, menge anak ku, su nengepesaylu en is menge salè niw tenged ki Kristu.

1 Juan 3:8

Ke zuen etew he layun ed-ulaula te mezaat ne sakup sikandin ni Setanas su layun daan si Setanas ed-ulaula te mezaat puun pa te kedlimbag̵a te kelibutan. Umba midhendini te kelibutan is Anak te Megbevayà su wey zin ikeawà is gehem te menge ulaula ni Setanas.

1 Juan 5:19

Netuenan tew he menge anak kiw te Megbevayà, iyan, is langun he menge kuntada te Megbevayà dini te kelibutan, ebeyveyaan sikandan ni Setanas.

Hudas 1:1

Siak si Hudas is suled ni Santiago wey is sulug̵uen ni Jesu Kristu. Sikiyu is midhimu te Amey tew he Megbevayà he menge tumutuu he menge minahal zin he midlig-enan ni Jesu Kristu, iyan kew ebpesuratan ku.

Impezayag 21:27

Iyan, wazà minsan hengkey he mezaat wey is minsan hentei he ebpenurù te tarù wey is etew he ed-azap te ledawan he ebpekeseled dutun. Iyan dà ebpekeseled dutun is menge etew he inlista is menge ngazan dan dutun te libru te nati he kerehidu he zutun idlista is ebpemeg̵ayan te untung he wazà pidtemanan.