Nengeulaula 25:11 - Manobo Western Bukidnon

¹¹ Emun nekesupak a te velaud pinaag̵i te mid-ulaula ku he zait he igkehimetayi kedì, ne kenè ku zaan ed-engkezan is silut kedì. Iyan, ke kenà tutuu is menge insumbunga zan kedì wazà minsan hentei he zuen gehem he ebpalad kedì diyà te kandan. Ne tenged kayi egkesuatan ku he iyan ed-imbistiga kedì si Cesar is hadì tew ziyà te Ruma.”

Nengeulaula 25:11 Кръстосани препратки

Nengeulaula 16:37

Ne zutun, wazà dewata ni Pablo ne migkag̵i sikandin diyà te menge pulis te, “Kenà egkehimu su ed-inged key he zizalem te velaud te inged he Ruma ne nesupak dan is belaud te menge Rumanu su wazè key zan imbistigaha ne wazè key mekesupak te velaud, ne impevug̵el key zan diyà te etuvangan te langun he menge etew ne mibpirisu key zan. Ne g̵untaan id-eles-eles key keniyu ibpaawa! Kenà egkehimu su kinahanglan he iyan ebpaawà kenami sikan is menge egalen niw he upisyal he Rumanu.”

Nengeulaula 18:14

Ne edtavak pezem si Pablo, iyan, migkag̵i si Galyu ziyà te menge Hudiyu te, “Sikiyu is menge Hudiyu, emun utew zekelà he samuk iring te hustu en he salà wey ke mezaat be he ulaula kayi te etew, ed-entusen ku te edhusey keniyu.

Nengeulaula 22:25

Ne hein midhiketan dan si Pablo su ebug̵elen dan en, migkeg̵iyan ni Pablo is serhintu he zutun, ke sikandin te, “Idtug̵ut be te velaud he vug̵ela a keniyu is sakup te inged he Ruma te wazè e pa imbistigaha?”

Nengeulaula 25:10

Ne midtavak si Pablo te, “Kayi a g̵untaan te hukmanan sumalà is belaud ni Cesar te hadì tew ziyà te Ruma ne iyan heini hustu he ed-imbistigahan kedì. Ne netuenan nu he wazà mezaat he mid-ulaula ku ziyà te menge Hudiyu.

Nengeulaula 25:12

Ne zutun mid-insaan ni Pistu is menge sumesambag din ne human din keg̵iyi si Pablo te, “Geina te ebpeimbistiga ka te hadì tew ziyà te Ruma, ibpeuwit ku sikew ziyà te kandin.”

Nengeulaula 25:21

Iyan, migkag̵i sikandin he ebpeimbistiga sikandin te hadì tew ziyà te Ruma su wey iyan mekehusey kayi is hadì. Umba, insug̵ù ku he kenè pa sikandin ibpeg̵uwà te pirisuwan taman te kenè ku pa igkepeuwit diyà te hadì.”

Nengeulaula 25:25

Iyan, hein midsusi ku, wazè ku netuenan he mid-ulaula zin he zait he igkehimetayi kandin. Ne g̵eina te ebpetavang te hadì tew ziyà te Ruma, neisip ku he ibpeuwit ku sikandin diyà te hadì.

Nengeulaula 26:32

Ne migkag̵i zaan si Egripa ziyà te ki Pistu te, “Angin ke kenà sikandin ebpeimbistiga te hadì diyà te Ruma su egkehimu en he ibpaawà.”

Nengeulaula 28:19

Ne hein kenà egkesuatan te menge zuma tew he Hudiyu he ipaawà a, ne g̵eina te wazà ku zaan duma he paag̵i, ebpetavang a te hadì tew zini te Ruma, minsan te wazè ku igkesumbunga kandan te menge zuma ku he Hudiyu.

1 Tiselunika 2:15

Is menge Hudiyu, iyan kes midhimatey te ebpemeneuven te Megbevayà dengan wey te Nengazen tew zaan he si Jesus. Ne mid-avug key zan daan. Utew supak is menge ulaula zan te egkesuatan te Megbevayà,