Nengeulaula 21:40 - Manobo Western Bukidnon

⁴⁰ Ne midtug̵utan din, ne si Pablo, midhitindeg dutun te heg̵ezan, ne imbayew zin is belad din he tuus te zuen egkeg̵iyen din dutun te menge etew, ne hein mid-engked is keg̵urub dan, migkag̵i si Pablo te kineg̵iyan he Hibriyuhanen.

Nengeulaula 21:40 Кръстосани препратки

Lucas 23:38

Ne impezeket dan is surat te zivavew zin diyà te krus he edhenduen haazà is surat te, “Iyan heini sikan is Hadì te menge Hudiyu.”

Juan 19:13

Ne zutun te nezineg haazà ni Pilatu, impelawang din si Jesus ne mibpinuu zutun te pinuuwè din te hukmanan, kes migngezanan dan te Gebata te kineg̵iyan he Hibriyuhanen, ne ke và dà kenitew, midseeg̵an te vatu.

Juan 19:17

ne migawas dan dutun te inged ne impetiang dan ki Jesus haazà is krus he edrensangan kandin. Midhendiyè dan te egngezanan te Tulan te Ulu. (Ne te kineg̵iyan he Hibriyuhanen egngezanan te Gulguta.)

Juan 19:20

Mezakel he menge Hudiyu is nemekevasa zutun su uvey te inged he Hiruselim haazà is midrensangan ki Jesus. Tetelu he kineg̵iyan is kedsurata zutun: Linatin, kineg̵iyan he Gerisyahanen, wey kineg̵iyan he Hibriyuhanen.

Juan 5:2

Ne ziyà te Hiruselim duen linew uvey te idselang te kutà he egngezanan te Idselang te Menge Ayam he Kerehidu. Ne ziyà te kilid dutun te linew, duen lelima he helungà. Ne haazà is linew, egngezanan te Bitsata te kineg̵iyan he Hibriyuhanen.

Nengeulaula 1:19

Ne hein netuenan heini te menge tigHiruselim, migngezanan dan haazà is tanà te Ekildama he ke và dà egkeg̵iya, tanà he nepemasa te selapì he imbayad te kedhimetayi te etew.)

Nengeulaula 12:17

Ne in-uyew zin kandan he kenè dan megurub ne mibpenudtul zin kandan is paag̵i te Nengazen te kedlibriya kandin puun diyà te pirisuwan. Ne migkeg̵iyan din sikandan te, “Tudtuli niw zaan si Santiago wey is menge zuma he suled tew.” Ne mid-awà sikandin dutun, ne midhendiyà te sengeinged.

Nengeulaula 13:16

Ne midhitindeg si Pablo ne imbayew zin is belad din su wey zan metueni he zuen egkeg̵iyen din ne migkag̵i te, “Menge zuma ku he kevuwazan ni Israyil wey sikiyu is langun he ed-azap daan te Megbevayà, pemineg̵a niw is egkeg̵iyen ku.

Nengeulaula 19:33

Kunaan te zuma ke iyan si Alejandro nekesalà su maan is impeetuvang sikandin te menge Hudiyu. Ne si Alejandro, imbayew zin is belad din he tuus te zuen egkeg̵iyen din he ketezengan dutun te menge etew.

Nengeulaula 21:35

Hein nekeuma zan diyà te heg̵ezan dutun te kutà mibitbit dan si Pablo tenged te utew ed-iseg is kedsinamuk te menge etew. Ne ed-eg̵awen pezem si Pablo zutun te menge etew

Nengeulaula 22:2

Ne hein nezineg dan he Hinibriyuhanen is kegkag̵i zin, ne mibpurung dan mebpemineg. Ne ke si Pablo te,

Nengeulaula 26:14

Ne sikami is langun, nepiley key ne nezineg ku is egkag̵i te kineg̵iyan he Hibriyuhanen te, ‘He Seulu, maan is ebpesipelahan a kenikew? Edlised ka su wazà pulus te kedsukul nu kediey.’

Nengeulaula 6:1

Ne zutun he timpu ed-iseg ebmezakel is menge tumutuu ki Jesus. Is menge tumutuu he Hudiyu he Gerisyahanen is kineg̵iyan dan, duen ibmezaat te g̵ehinawa zan te zuma he menge tumutuu he Hudiyu. Egkag̵i haazà is menge Gerisyahanen he kenà pudu egkeveg̵ayan is kandan he menge valu he vahi ke ebpeneltelazen te kada andew is idtavang dutun te menge valu he vahi.

Impezayag 9:11

Duen hadì he ebayàbayà kandan, iyan sikan is belinsug̵uen he mibpuwas duen te vitu he wazà pidtemanan is kezalem din. Ne ziyà te kineg̵iyan he Hibriyuhanen iyan ngazan din si Ebedun, ne ziyà te Gerisyahanen, si Epeliyun, he ke và dà egkeg̵iya, sikan is ebpekezezaat.