Nengeulaula 2:22 - Manobo Western Bukidnon

²² Ne mid-uman megkag̵i si Pedro te, “Sikiyu is menge zuma ku he kevuwazan ni Israyil, pemineg̵a niw is egkeg̵iyen ku. Si Jesus, kes tigNeserit, sug̵ù sikandin te Megbevayà. Impesavut kenitew te Megbevayà he sug̵ù din si Jesus pinaag̵i te g̵ehem din wey menge egkein-inuwan wey menge singyal he mibpeveelan kandin te Megbevayà. Netuenan niw en heini is egkeg̵iyen ku su neulaula heini is langun dini te inged niw.

Nengeulaula 2:22 Кръстосани препратки

Mateo 12:28

Su heini is gehem ku te kebpemug̵ew te mezaat he mulin-ulin, ne ziyà ebpuun te Wag̵as he Mulin-ulin he Megbevayà. Ne pinaag̵i kayi egketuusan he iyan en heini sikan is timpu te kedhadì te Megbevayà.

Mateo 2:23

Ne ziyè dan med-ulì te inged he egngezanan te Neserit. Umba neulaula zan heini su egketuman is netagnà dengan te menge ebpeneuven te Megbevayà su nekag̵i zan he egngezanan si Jesus he tigNeserit.

Mateo 9:8

Hein naahà heini te menge etew zutun, nengehandek dan ne midalig dan is Megbevayà tenged te mibeg̵ayan din is menusiyà te keg̵ehem he iring kayi.

Lucas 11:20

Su heini is gehem ku te kebpemug̵ew te mezaat he mulin-ulin, ne ziyà ebpuun te Megbevayà. Ne pinaag̵i kayi egketuusan niw he iyan en heini sikan is timpu te kedhadì te Megbevayà.”

Lucas 18:37

Ne zuen migkag̵i ziyà te kandin te, “Iyan si Jesus he tigNeserit is edsag̵ad.”

Lucas 24:18

Ne midtavak is sevaha zutun he egngezanan ki Keliyupas, ke sikandin te, “Iyan ke zà buwa etew he nekehengkayi te inged he Hiruselim he wazà metau kayi te veg̵u pa he nehitavù.”

Juan 1:45

Ne si Felipe, mibeyaan din si Natanael, ne ke sikandin te, “Neehè dey en kes etew he netagnà dengan te ebpemeneuven wey netagnà ni Moises dutun te insurat din diyà te libru he kesug̵uan. TigNeserit sikandin he si Jesus he anak ni Jose.”

Juan 10:37

Is menge vaal te Amey ku he Megbevayà, iyan ebeelan ku. Emun kenà, kenà a keniyu tuuwi.

Juan 11:47

Ne zutun midtig̵um te menge punuan he memumuhat wey menge Perisiyu is menge ebmeg̵urangen te menge Hudiyu. Ne hein netig̵um dan en, migkag̵i zan te, “Ebmenumenu kiw su heini si Jesus, mezakel is menge egkein-inuwan he ebeelan din.

Juan 12:17

Is menge etew he nekeahà ki Jesus dutun te ked-umawa zin wey kebenhawa zin ki Lazaro, midsangyew zan is neehè dan dutun.

Juan 15:24

Duen mibeelan ku he neehè dan he menge egkein-inuwan he kenà egkeveelan te minsan hentei he menusiyà. Angin ke wazè dan maahà heini su kenà sikandan egkevesulan tenged te mezaat he mid-ulaula zan kedì. Iyan, neehè dan en ne minsan pa zutun, siak wey is Amey ku, egkuntedahan key zan.

Juan 19:19

Duen insurat ni Gubirnedur Pilatu he impezeket dan dutun te zivavew te krus. Is menge lalag he insurat, edhenduen te, “Si Jesus he TigNeserit he Hadì te Menge Hudiyu.”

Juan 3:2

Midhendiyà sikandin te ki Jesus dutun te mezukilem ne migkeg̵iyan din si Jesus te, “Datù, netuenan dey he menunudlù ka he sug̵ù te Megbevayà su is menge egkein-inuwan he ebeelan nu, iyan dà ebpekehimu te iring kayi is etew he ebeg̵ayan te g̵ehem te Megbevayà.”

Juan 4:48

Ne migkeg̵iyan ni Jesus haazà is etew te, “Kenè kew ves ebpeketuu kediey emun kenè kew ebpekeahà te menge egkengein-inuwan wey menge singyal.”

Juan 5:36

Iyan, duen kebpenistig̵us he lavew pa kenà is ki Juan, su is langun he mibpeveelan kediey te Amey ku he Megbevayà he ed-ul-ulahan ku, iyan edtistig̵us he midsug̵ù a te Amey ku he Megbevayà.

Juan 6:14

Ne hein naahà te menge etew is egkein-inuwan he nehimu ni Jesus migkag̵i zan te, “Tutuu ves iyan he iyan en heini sikan is netagnà he ebpeneuven te Megbevayà he ibpehendini zin te kelibutan!”

Juan 6:27

Kenè niw pen-ahaa is egkeenen he meg̵aan dà egkehanew, kekenà, hag̵ù kew wey niw mekuwa is egkeenen he ebpekeveg̵ey te untung he wazà pidtemanan. Siak is Kakey te Menusiyà, iyan heini egkeenen he igkeveg̵ey ku keniyu su impeehè en te Amey ku he Megbevayà he ingkesuat din is menge vaal ku.”

Juan 7:31

Duen mezakel he menge etew he nemeketuu he iyan si Jesus kes netagnà he hadì he mibpilì te Megbevayà. Ke sikandan te, “Iyan si Jesus sikan is hadì su wazà duma he ebpekevaal te lavew pa he menge egkein-inuwan duen te mibeelan din.”

Juan 9:33

Ke kenà sug̵ù si Jesus te Megbevayà wazà egkehimu zin.”

Nengeulaula 13:16

Ne midhitindeg si Pablo ne imbayew zin is belad din su wey zan metueni he zuen egkeg̵iyen din ne migkag̵i te, “Menge zuma ku he kevuwazan ni Israyil wey sikiyu is langun he ed-azap daan te Megbevayà, pemineg̵a niw is egkeg̵iyen ku.

Nengeulaula 14:27

Ne hein nekeuma zan diyà te Entiyukya, midtig̵um dan is menge tumutuu ne midtudtul zan is langun he nehimu te Megbevayà pinaag̵i kandan wey is kedhimuwa zin te paag̵i wey meketuu is menge etew he kenà Hudiyu.

Nengeulaula 2:19

Ne zuen menge egkengein-inuwan he singyal he ibpeehè ku ziyà te langit wey ziyan daan te lumpad. Egkeahà is lengesa wey hapuy wey zekelà he evel.

Nengeulaula 2:43

Mezakel is menge egkein-inuwan wey singyal he nehimu pinaag̵i te menge epustul, umba neteg̵uan is menge etew te kegkehandek te Megbevayà.

Nengeulaula 21:28

Ne mibpememensag dan is egkag̵i te, “Sikiyu is menge zuma zey he Isreyilihanen, tevangi key! Iyan heini sikan is etew he in-eneb din is penurù din te minsan hendei he inged. Ne supak is impenurù din te tivuuk he kehudiyuwan wey supak daan te kesug̵uan tew wey kayi te simbahan tew. Ne g̵untaan impeseled din en kayi te simbahan tew is kenà menge Hudiyu ne neremerikan heini is simbahan he ebulusan te Megbevayà.”

Nengeulaula 22:8

Ne mid-insà a te, ‘Hentei ka?’ Ne ke sikandin te, ‘Iyan a sikan is ebpesipelahan nu he si Jesus he tigNeserit.’

Nengeulaula 24:5

Iyan is: netuenan dey he heini is etew, utew mesamuk, su is menge vaal zin, ne iyan idsinamuk te menge Hudiyu ziyà te minsan hendei. Ne sevaha zaan sikandin he egalen te menge etew he egngezanan te menge Neserinu.

Nengeulaula 26:26

Sikew, Hadì Egripa, kenà a egkelenew he egkag̵i kenikew su netuenan ku he netuenan nu he zaan is langun he egkeg̵iyen ku. Netuenan nu iyan su heini is nengeulaula, wazà mekeeles.

Nengeulaula 26:9

Ne siak, kunaan ku zengan ke iyan ebpeveelan kedì te Megbevayà is ed-ul-ulahan ku is taman te egkehimu ku su wey maawà diyà te minsan hentei is kedtuu zan ki Jesus he tigNeserit.

Nengeulaula 3:12

Ne hein naahà haazà ni Pedro, migkeg̵iyan din haazà is menge etew te, “Menge kezuzumahi ku he menge kevuwazan ni Israyil, maan is igkeinuinu niw utew heini? Maan is edtengtengan key keniyu? Kunaan niw vuwa ke pinaag̵i te kenami en he g̵ehem wey ke tenged be te wazè dey salà, ne neulian dey heini wey mekehipanew.

Nengeulaula 3:6

Ne migkag̵i si Pedro te, “Wazè ku naazen he vulawan wey selapì, iyan, is naazen ku, ibeg̵ey ku kenikew. Tenged te g̵ehem te ngazan ni Jesu Kristu he tigNeserit, ebpekehipanew ka!”

Nengeulaula 4:10

ne sikiyu wey is langun he menge zuma ku he kevuwazan ni Israyil, kinahanglan he sevuta niw heini. Su heini is etew he zini te etuvangan niw, neulian sikandin pinaag̵i te g̵ehem te ngazan ni Jesu Kristu he tigNeserit. Heini si Jesus, inransang niw te krus ne minatey, iyan, mibanhew te Megbevayà.

Nengeulaula 5:35

migkeg̵iyan ni Gemelil haazà is menge zuma zin te, “Sikiyu is menge zuma ku he kevuwazan ni Israyil, kenè tew edegdeg̵usuwan ke hengkey is ed-ul-ulahan tew kayi te menge etew su kela ke mesayep ki.

Nengeulaula 6:14

Su nezineg dey sikandin is egkag̵i he is simbahan tew he Valey te Megbevayà, edrundusen ni Jesus he tigNeserit ne ed-ilisan daan ni Jesus is langun he menge vetasan tew he imbilinbilin kenitew zengan ni Moises.”

2 Kurintu 12:12

Ne hein diyan a te keniyu impeehè ku keniyu he tutuu a he epustul ni Kristu su minsan nereg̵enan a, mid-antus a su wey ku ikepaahà is menge singyal wey menge egkengein-inuwan he iyan tuus te tutuu he epustul.

Hibriyuhanen 2:4

Ne is Megbevayà, midtistig̵usan din daan haazà is impenurù dan su mibeg̵ayan din sikandan te g̵ehem wey zan ikepaahà is menge singyal, wey menge egkein-inuwan he kenà ed-iring-iring. Ne zuen daan menge ketau he imbeg̵ey zin diyà te menge tumutuu pinaag̵i te ked-ulini kandan te Wag̵as he Mulin-ulin sumalà is egkesuatan din he ebeg̵ayan.