Nengeulaula 19:26 - Manobo Western Bukidnon

²⁶ Siguradu neehè niw wey nezineg niw en is ebeelan kayi te etew he egngezanan ki Pablo. Egkeg̵iyen din he is menge ziwata he ebeelan te etew, kenà hustu he ed-ezapen. Mezakel is menge etew he nemeketuu te egkeg̵iyen din ne kenà dini zà te inged tew he Ipisu, kekenà, te tivuuk he prubinsya tew he Asya.

Nengeulaula 19:26 Кръстосани препратки

Nengeulaula 14:15

“Maan is ed-ezapen key keniyu, menge suled? Menge etew key zà daan; menusiyè key zaan iring keniyu! Midhendini key te inged niw wey zey ikepesavut keniyu is Meupiya he Tudtulanen wey niw meengkezi heini is menge ulaula niw he wazè din pulus ne wey niw zaan tuuwi is Megbevayà he wazè din kemetayen. Iyan sikandin nenlimbag te langit wey tanà wey zag̵at wey is minsan hengkey he tag̵ù kayi.

Nengeulaula 17:29

Ne g̵eina te menge anak kiw zin, iring kiw kandin. Ne tenged dutun kenè tew ed-isipen he is Megbevayà, sevaha he ledawan he vulawan wey selapì wey vatu he mideyzeyanan te etew he metau.

Nengeulaula 18:19

Nekeuma zan diyà te inged he Ipisu ne mid-ewaan ni Pablo si Ekilu wey si Priscila. Midhendiyà sikandin te simbahan te menge Hudiyu ne mibpekibpezeyag̵à sikandin te menge ketezengan.

Nengeulaula 19:1

Dutun te kemulu pa si Epulus diyà te Kurintu, diyà si Pablo mebayà te menge inged he zizaya te Ipisu ne midhendiyè en maan te Ipisu. Ne neuma zin dutun is menge sumusundan daan ni Jesus.

Nengeulaula 19:10

Ne seled te zezuwa he tuig iyan haazà mid-ulaula zan, ne insangyew is Lalag te Nengazen diyà te langun he menge Hudiyu wey se kenà Hudiyu he menge meg̵inged dutun te prubinsya he Asya.

Nengeulaula 19:25

Ne haazà si Dimitriyu, midtig̵um din haazà is menge sinuhulen din wey is menge iring dan he pandey ne ke sikandin te, “Menge suled, netuenan niw he mid-uswag kiw en kayi te kebpandey tew.

1 Kurintu 12:2

Netuenan niw he zengan te wazè kew pa meketuu ki Jesus ne zuen ebpengelintau keniyu he mekeazap kew te menge ledawan, ne pinaag̵i kayi te menge wazè dan gehinawa he ledawan ne layun egketazin dengan is menge isip niw.

1 Kurintu 8:4

Ne mehitenged te kegkaan te usa he impemuhat duen te menge tarù he ed-ezapen, netuenan tew he kenè man Megbevayà is iring dutun su sebsevaha zà is tutuu he Megbevayà.

Gelasya 4:8

Dengan te wazè niw pa tuuwi is tutuu he Megbevayà, neuripen kew te menge edtuuwan he kenà hustu he megbevayà.

1 Tiselunika 1:9

Nezineg dan en ne iyan sikandan ebpenudtul mehitenged te kegelg̵elawa niw kenami. Ebpenudtul zan he mid-engkezan niw kes ked-azap te menge kenà tutuu he ed-ezapen. Mid-engkezan niw kun wey kew mekeazap te tutuu he Megbevayà he wazè din kemetayen.

Impezayag 9:20

Ne is nesamà dutun te menge etew, langun te sikandan he wazà mepatey zutun te ebpemekekaid he menge kudà, wazè dan engkezi is ked-ezapa zan te mibeelan dan he menge ledawan he vulawan, wey selapì wey g̵alang wey vatu wey kayu. Heini is menge ledawan, ne kenà ebpekeahà, kenà ebpekezineg ne kenà daan ebpekehipanew. Wazà daan engkezi zutun te menge etew is ked-ezapa zan te menge mezaat he mulin-ulin.