Nengeulaula 16:13 - Manobo Western Bukidnon

¹³ Ne zutun te Sebadu he iyan Andew te Kedhimeley, mid-awè key ziyà te inged ne midhendiyè key te veyvey te wahig su ed-ahaan dey ke zuen be zutun edtig̵uman te menge Hudiyu he ed-empuan dan te Megbevayà. Ne zuen menge vahi he nengetig̵um dutun, ne mibpinuu key ne mibpekidlalag key kandan.

Nengeulaula 16:13 Кръстосани препратки

Mateo 13:2

Ne zuen mezakel he menge etew he midtig̵um diyà te kandin. Ne g̵eina te utew zan mezakel, mid-untud si Jesus te avang ne zutun mebpinuu. Ne is menge etew, diyè dan dà te veyvey is ebpememineg kandin.

Marcos 16:15

Ne zutun migkeg̵iyan ni Jesus sikandan te, “Penhipanew kew ziyà te tivuuk he kelibutan, ne ipesavut niw is Meupiya he Tudtulanen diyà te minsan hentei he etew he linimbag te Megbevayà.

Lucas 13:10

Ne sevaha he andew he Sebadu, diyà si Jesus ebpenurù te simbahan te menge Hudiyu.

Juan 8:2

Ne hein nepawà dutun, midhendiyè en maan si Jesus te simbahan he Valey te Megbevayà, ne hein midtig̵um diyà te kandin is langun he menge etew, mibpinuu zutun ne mibpenurù din sikandan.

Nengeulaula 13:14

Ne mid-awè dan diyà te Pirga ne midlaus dan diyà te inged he Entiyukya, sikan is Entiyukya he ziyà te prubinsya he Pisidya. Ne te andew he Sebadu midseled dan diyà te simbahan te menge Hudiyu ne mibpinuu zan dutun.

Nengeulaula 13:42

Ne hein miguwà si Pablo wey si Bernabe zutun te simbahan, migkeg̵iyan sikandan te menge etew he medlikù dan te ed-ilis he Sebadu wey zan iuman ipesavut haazà is midseysey ni Pablo.

Nengeulaula 16:16

Sengeandew zutun te edhendiyè key te elempuey zan, midsinug̵ung kenami is bahi he uripen he mid-ulinan te mezaat he mulin-ulin he ibpeketagnè din. Ne zekelà is selapì he nekuwa te teg̵iuripen kandin pinaag̵i te kebpenagnè din.

Nengeulaula 16:6

Ne ziyè dan mekevayà te menge inged he ziyà te Perigya wey Gelasya su wazà sikandan tug̵uti te Wag̵as he Mulin-ulin he ibpesavut dan is Lalag te Megbevayà diyà te prubinsya he Asya.

Nengeulaula 17:2

Ne zutun midsimba si Pablo zuma te menge Hudiyu su iyan betasan din. Ne kada Sebadu seled te tetelu he simana mibpekidibati sikandin te menge etew, ne impesavut din kandan is tagnà he insurat diyà te libru he Lalag te Megbevayà he is hadì he mibpilì te Megbevayà, imbanglis kandin kes kedresaya wey kes kedhimetayi kandin ne emun egkeiwas haazà ebenhawen sikandin te Megbevayà. Ne ke si Pablo te, “Heini is etew he egngezanan ki Jesus, iyan en sikan is hadì he mibpilì te Megbevayà.”

Nengeulaula 18:4

Ne kada Sebadu edhendiyà si Pablo te menge simbahan te menge Hudiyu is ebpekidlewanà su wey mesavut te menge Hudiyu wey menge Gerisyahanen he tutuu is ibpenurù din.

Nengeulaula 20:7

Ne hein midsanlep en is andew zutun te andew he Sebadu midtig̵um key su wey zey metuman kes Wag̵as he Idlavung. Ne si Pablo, midweliyan din is menge etew ne taman te metaneb en is kezukileman te kedwali zin su zutun te egkepawà egenat sikandin.

Nengeulaula 21:5

Iyan, hein neume en is kegenat dey, mid-awè key zutun te inged. Ne nemenduma kenami is langun he menge tumutuu, maama se vahi wey menge anak dan. Ne midluhud key zutun te veyvey te zag̵at is ed-ampù.

Nengeulaula 9:20

Ne zutun midseled te simbahan te menge Hudiyu ne impenurù din is keag̵i ni Jesus. Ne ke sikandin te, “Si Jesus, Anak te Megbevayà.”

Gelasya 3:28

Ne tenged dutun kinahanglan he kenè niw isipa he ibpelavi te Megbevayà is menge Hudiyu, ne emun kenà, ne iyan is kenà menge Hudiyu, su ziyà te kandin neked-iiring is langun he menge etew, uripen se kenà uripen, maama se vahi, ne sikiyu zaan, neked-iiring kew ziyà te Megbevayà su neked-iiring kew he edtuu ki Jesu Kristu.

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.