Nengeulaula 12:19 - Manobo Western Bukidnon

¹⁹ Impepengahà ni Hirudis, iyan, wazè dan sikandin maahà. Ne impepengimbistiga zin sikan is menge guwardya ne impepenhimetayan din sikandan. Ne zutun mid-awà si Hirudis diyà te prubinsya he Hudiya ne midtupang diyà te Sisarya ne ziyà med-ubpà.

Nengeulaula 12:19 Кръстосани препратки

Mateo 2:1

Diyà si Jesus ianak te inged he Bitlihim, te prubinsya he Hudiya zutun te timpu te kedhadì te aney en he hadì he egngezanan ki Hirudis. Ne zutun te vatè pa utew si Jesus, nekeuma ziyà te Hiruselim is menge memimituen. Diyà sikandan ebpuun te meziyù he inged diyà te edsilaan.

Mateo 2:13

Ne hein migenat en kes menge memimituen, mibpeteg̵einep en maan ki Jose is belinsug̵uen te Nengazen he egkag̵i te, “Enew kad, Jose. Ne uwita nu heeyan is batà wey iney zin ne pelag̵uy kew pehendiyà te Ihiptu. Ne zutun kew tag̵ad taman te kenè ku pa sikew egkeg̵iyan. Su ebpenahaan ni Hirudis heeyan is batà su edhimetayan din.”

Mateo 2:16

Ne hein netuenan ni Hirudis he mid-akal zà kandin kes menge memimituen, nepauk utew. Ne insug̵ù din he ibpepenhimetayan is langun he menge vatà he maama he ebpenuig̵en te zezuwa he tuig wey minus pa zutun te tivuuk he inged te Bitlihim wey is menge siringan dutun he inged. Midhimu zin heini su wey mepatey si Jesus su zezuwa en he tuig is kelug̵ayad puun te kegkeahaa te menge memimituen duen te vituen.

Nengeulaula 12:18

Ne hein nepawà dutun, utew nengeliveg is menge sundaru ziyà te pirisuwan su hendei vuwa si Pedro?

Nengeulaula 12:4

Ne zutun te kegkezakep ki Pedro, impepirisu sikandin ni Hirudis ne impalad din diyà te heepat he gurupu he menge sundaru he iyan eguwardya kandin. Ne tig-epat he sundaru is kada gurupu. Neisip ni Hirudis he emun egkeipus haazà is pista he egngezanan te Pista te Kedlevayi, ed-imbistigahan din si Pedro ziyà te etuvangan te menge Hudiyu.

Nengeulaula 12:6

Ne zutun te kezukileman he emun egkepawà dutun ibpeetuvang ni Hadì Hirudis si Pedro te menge etew, ne si Pedro, diyà ipehizeg̵à te teliwazà te zezuwa he sundaru. Midhiketan sikandin te zezuwa he kedina ne zuen daan menge sundaru he impevantey zutun te g̵emawan te pirisuwan.

Nengeulaula 16:27

Ne zutun nepukew sikan is ebantey zutun te pirisuwan. Ne hein neehè din he nengepuwas is menge lekeb te pirisuwan, kunaan din ke nemekepelag̵uy is menge pirisu ne midhulavut din is sundang din. Edsundangen din en pezem is lawa zin su edhiket.

Nengeulaula 21:8

Ne hein nepawà, migenat key en maan ne nekezunggù key ziyà te Sisarya. Ne ziyè key medhulavung te valey ni Felipe, sikan is ebpesavut te Meupiya he Tudtulanen. Iyan sikandin sevaha zutun te pitu he maama he nepilì dengan diyà te Hiruselim he timbang te menge epustul.

Nengeulaula 25:13

Ne nepipira he andew zutun, nekeuma ziyà te Sisarya si Hadì Egripa wey is esawa zin he si Birinisi su edtelavuk dan ki Pistu.

Nengeulaula 27:42

Ne neisip te menge sundaru he ebpenhimetayan dan is menge pirisu su wey kenè dan mekeg̵aun dutun te veyvey ne kenè dan egkepeleg̵uyan haazà is menge sundaru.

Nengeulaula 8:40

Ne si Felipe, diyè en maahà te inged he Asdud ne midlaus medhipanew is ebpenudtul te Meupiya he Tudtulanen diyà te langun he menge inged he ibayè din taman te nekeuma sikandin diyà te Sisarya.