Nengeulaula 1:2 - Manobo Western Bukidnon

^2-3 taman en te kebetuna kandin te Megbevayà pehendiyà te langit. Hein midhimetayan si Jesus ne nevanhew, mezakel is paag̵i te kebpaahaa zin te menge epustul te timaan he nevanhew en sikandin. Su seled te kepatan he andew zutun, layun sikandin ebpaahà kandan. Impenurù din kandan is kedhadì te Megbevayà. Ne te wazè pa sikandin betuna pehendiyà te langit, impenurù din daan pinaag̵i te g̵ehem te Wag̵as he Mulin-ulin is ebpeveelan din kandan te menge epustul he zaan he nepilì din.

Nengeulaula 1:2 Кръстосани препратки

Mateo 12:28

Su heini is gehem ku te kebpemug̵ew te mezaat he mulin-ulin, ne ziyà ebpuun te Wag̵as he Mulin-ulin he Megbevayà. Ne pinaag̵i kayi egketuusan he iyan en heini sikan is timpu te kedhadì te Megbevayà.

Mateo 3:16

Ne si Jesus, hein nebewtismuwan en, migaun dutun te wahig. Ne zutun nepuwasan is langit ne naahà ni Jesus is Wag̵as he Mulin-ulin he Megbevayà he iring te merepatik he edlugtanà diyà te kandin ne midlatun diyà te kandin.

Marcos 6:30

Ne is menge epustul ni Jesus, nekelikù dan diyà te kandin, ne midtudtul zan diyà te kandin is langun he mid-ulaula zan wey impemenurù dan.

Lucas 24:51

Ne zutun te kemulu pa sikandin ebpenuvadtuvad ne nevatun sikandin pehendiyà te langit.

Lucas 9:51

Ne hein egkeuvayan en is andew te kebpeewaa ki Jesus dini te kelibutan su ed-ulì en diyà te langit ne netivuuk is gehinawa zin te kedhendiyà te Hiruselim ne zutun migenat dan.

Juan 1:16

Ne g̵eina te utew sikandin belig̵eg̵awen kenà egketapus is menge meupiya he idtuvad din kenitew te langun.

Juan 13:1

Sengeandew pa zutun ne egketuman en is Pista te Kedlevayi. Netuenan ni Jesus he uvey en is ked-awè din dini te kelibutan su ed-ulì en diyà te Amey zin he Megbevayà. Utew mahal ziyà te g̵ehinawa zin is menge sumusundan din dini te kelibutan, ne zutun ibpeehè din ke hengkey kemahal sikandan diyà te g̵ehinawa zin.

Juan 13:18

Kenè kew pudu is egkeg̵iyan ku kayi su netuenan ku ke hengkey is gehinawa te uman sevaha keniyu te menge pinilì ku. Duen sevaha keniyu he ed-ekalan e zin. Umba egkeulaula heini su wey metuman sikan is netagnà dengan diyà te insurat he Lalag te Megbevayà he edhenduen te, ‘Is duma ku he ebpekidtug̵en kediey, iyan nehimu he kuntada ku.’

Juan 13:3

Ne si Jesus, netuenan din he insarig kandin te Amey zin is kebayàbayà te langun. Netuenan din daan he ziyà sikandin ebpuun te Megbevayà ne ziyà daan sikandin ed-ulì.

Juan 16:28

Diyà a ebpuun te Amey ku ne midhendini a te kelibutan. Ne g̵untaan ed-ewaan ku heini is kelibutan ne ed-ulì ad diyà te Amey ku.”

Juan 17:13

Ne g̵untaan ed-ulì ad diyan te kenikew ne edhengyuen ku kenikew heini te kemulu e pa zini te kelibutan su wey mepurung sikandan mengelipey te kediey he kelipey.

Juan 20:17

Ne migkag̵i kandin si Jesus te, “Kenè ka kepkep dini su wazè e pa vetuna pehendiyà te Amey ku. Beyai nu is menge suled ku ne keg̵iya nu te, ‘Edhendiyà a te Amey ku, diyà te Megbevayè ku. Iyan daan sikandin Amey niw wey Megbevayè niw.’ ”

Juan 20:21

Ne mid-uman si Jesus megkag̵i ziyà te kandan te, “Mebmelinawen kew. Ne iring te midsug̵ù a te Amey tew he Megbevayà, edsug̵uen ku zaan sikiyu.”

Juan 3:34

Ne is midsug̵ù te Megbevayà, egkeg̵iyen din is ibpekag̵i kandin te Megbevayà su is Megbevayà, mibpepurungan din sikandin peulini te Wag̵as he Mulin-ulin.

Juan 6:62

Hengkey vuwa is egkekag̵i niw emun siak is Kakey te Menusiyà, egkeahà a keniyu is ebetunen pehendiyà te zivavew, diyà te langit he mibpuunan ku.

Juan 6:70

Ne migkag̵i kandan si Jesus te, “Siak, mibpilì ku sikiyu is sepulù wey zezuwa, iyan, sakup ni Setanas is sevaha keniyu.”

Nengeulaula 1:11

Ne migkag̵i heini is dezuwa te, “Sikiyu is menge tigGeliliya, maan is kemulu kew pa edlingahà diyà te langit? Heini si Jesus he neehè niw he nevatun pehendiyà te langit, keuzemè en edlikù dini te tanà, ne is kedlikù din, ne iring ded daan te kegkevatun din.”

Nengeulaula 1:13

Ne hein nekeuma zan diyà te Hiruselim, mid-ulì dan diyà te rug̵u he zivavew ziyà te valey he dus endanas he ubpeey zan. Iyan heini ensi Pedro, si Juan, si Santiago, si Andres, si Felipe, si Tomas, si Bartolome, si Mateo, si Santiago he anak ni Alfeo, si Simon Siluti, wey si Hudas he anak ni Santiago.

Nengeulaula 1:9

Ne te nekag̵i ni Jesus haazà, nevatun sikandin pehendiyà te langit. Ne te kemulu zan pa edlingahà su ed-ahaan dan is kegkevatun din, neelangan si Jesus te g̵apun ne naawà sikandin diyà te ked-ehè dan.

Nengeulaula 10:38

Si Jesus he tigNeserit, mibpeulinan sikandin te Megbevayà te Wag̵as he Mulin-ulin ne mibeg̵ayan sikandin te zekelà he g̵ehem. Ne mid-eneb din is menge inged ne meupiya is baal zin diyà te menge etew ne nengeulian din is langun he edlelungen ni Setanas. Neveelan din heini su kenà edsuwey kandin is Megbevayà.

Gelasya 1:1

Siak si Pablo is midsurat kayi. Ibpeuwit ku heini ziyan te keniyu te langun he menge tumutuu ziyan te menge inged te tivuuk he prubinsya he Gelasya. Siak wey is langun he menge tumutuu he menge zuma ku zini, ebpengemusta keniyu. Epustul a, iyan, wazà a g̵erari he epustul te etew zà duen, ne kenà daan pinaag̵i te etew zà duen is kedsug̵ua kedì, kekenà, migeraran a he epustul ni Jesu Kristu wey te Amey tew he Megbevayà he mibanhew ki Jesus, ne iyan sikandan midsug̵ù kedì.

Ipisu 2:20

Ne sikitew is menge tumutuu, iring kiw te valey he ibpehitindeg te Megbevayà diyà te vatu. Iyan si Kristu kes batu he edtukuzan kayi te valey. Is menge epustul wey ebpemeneuven te Megbevayà, ne iyan menge tukud. Ne iyan kew menge zuma he himan kayi te valey.

1 Timoteo 3:16

Ne netuenan tew te langun he lavew pa te langun is imbugnà he tuluuwen he midtuuwan tew. Mibpeetew si Kristu; midtistig̵usan te Wag̵as he Mulin-ulin he metazeng sikandin; naahà sikandin te menge velinsug̵uen te Megbevayà; insangyew sikandin diyà te menge etew he kenà menge Hudiyu; duen menge tumutuu kandin dini te tivuuk he kelibutan; midtulus sikandin pehendiyà te langit.

Hibriyuhanen 9:24

Dutun te kebpemuhat ni Kristu, wazè sikandin medseled diyà te utew mahal he rug̵u te simbahan he zini te kelibutan su alung dà heini te tutuu he simbahan he ziyà te langit. Iyan midselezan din kes tutuu he simbahan he ziyà te langit ne g̵untaan iyan sikandin datù tew he edtavang kenitew ziyà te etuvangan te Megbevayà.

1 Pedro 3:22

Diyà si Jesus med-ulì te langit ne g̵untaan diyà sikandin ebpimpinuu te zapit te egkekewanan te Megbevayà tuus te utew lavew sikandin. Iyan sikandin ebayàbayà te langun he menge velinsug̵uen te Megbevayà wey te menge kedesenan wey te minsan hentei ziyà te langit he zuen din gehem.

2 Pedro 3:2

Egkesuatan ku he meisip-isip niw is menge lalag he insurat dengan te ebpemeneuven te Megbevayà wey is sug̵ù te Nengazen tew he Menluluwas tew he imbeg̵ey zin kenitew pinaag̵i kenami te menge epustul.

Impezayag 1:1

Iyan heini kedtudtula te impezayag ni Jesu Kristu. Insarig heini kandin te Megbevayà wey zin daan ikepesavut diyà te menge sulug̵uen te Megbevayà ke hengkey is meg̵aan en he egkengeulaula. Impesavut heini ni Kristu pinaag̵i te kedsug̵ua zin te velinsug̵uen din diyà te kediey te sulug̵uen din he si Juan.

Impezayag 2:11

Is minsan hentei keniyu, mebpemineg kayi te egkeg̵iyen te Wag̵as he Mulin-ulin diyan te keniyu te menge tumutuu. Is etew he ebpekezaag ki Setanas, kenè en egkeragkes te silut he iyan is ikezuwa he kemetayen.’ ”

Impezayag 2:17

Is minsan hentei keniyu, mebpemineg te egkeg̵iyen te Wag̵as he Mulin-ulin diyan te keniyu te menge tumutuu. Is etew he ebpekezaag ki Setanas, ebeg̵ayan ku sikandin te in-eles ku pa he egkeenen he mana he ziyà ebpuun te langit. Ne ibeg̵ey ku zaan kandin is meputì he vatu he insurat dutun is beg̵u en he ngazan. Iyan dà egkesayud te ngazan dutun is ebeg̵ayan.’ ”

Impezayag 2:29

Is minsan hentei keniyu, mebpemineg kayi te egkeg̵iyen te Wag̵as he Mulin-ulin diyan te keniyu te menge tumutuu.’ ”

Impezayag 2:7

Is minsan hentei keniyu, mebpemineg kayi te egkeg̵iyen te Wag̵as he Mulin-ulin diyan te keniyu te menge tumutuu! Is etew he ebpekezaag ki Setanas, edtug̵utan ku he mekekaan sikandin te veg̵as te kayu he iyan puunà te untung he wazà pidtemanan he ziyà te ed-ubpaan te Megbevayà.’ ”

Impezayag 21:14

Ne is elavat dutun te inged, ne sepulù wey zezuwa is impepinuuwan dutun he zekelà he vatu. Ne midsuratan haazà is menge vatu te menge ngazan te sepulù wey zezuwa he menge epustul zuen te nati he kerehidu.

Impezayag 3:13

Is minsan hentei keniyu, mebpemineg te egkeg̵iyen te Wag̵as he Mulin-ulin diyan te keniyu te menge tumutuu.’ ”

Impezayag 3:16

Angin pezem ke meinit kew ne emun kenà, ne meg̵enew kew, iyan, geina te meg̵elimendew kew zà, idrepu ku sikiyu.

Impezayag 3:22

Is minsan hentei keniyu, mebpemineg te egkeg̵iyen te Wag̵as he Mulin-ulin diyan te menge tumutuu,’ ” ke sikandin.