Mateo 7:6 - Manobo Western Bukidnon

⁶ Ne zutun insempità ni Jesus is menge etew he kenà egkesuat he ebpemineg te Lalag te Megbevayà. Ke sikandin te, “Kenè niw iveg̵ey te asu is butang he mahal ziyà te Megbevayà su kela ke keg̵ata kew zin. Ne kenè niw zaan isawed is menge mahal he ebelieg̵en diyà te etuvangan te menge vavuy su egketekutakan dan dà.

Mateo 7:6 Кръстосани препратки

Mateo 15:26

Ne midtavak si Jesus te, “Kenà meupiya ke egkuwaan ta is egkeenen te menge vatà ne idsamak te menge asu.”

Mateo 24:10

Dutun he timpu, mezakel is egkepenulayan ne ibpalad te kada sevaha zutun is duma zin he tumutuu wey mehimetayi ne ebpekunkuntedehè dan.

Mateo 7:5

Utew tarù is ulaula nu! Ihuna nu iawà is batang he nekepesek kenikew ne human ka ebpekeahà. Ne zutun melemu nu zà igkeawà haazà is nekepesek te zuma nu.”

2 Kurintu 11:26

Ne zutun te menge kedhipanew ku ne nengeeg̵iyan ku is mezakel he menge kemereg̵enan tenged te kedalem te wahig, wey tenged te menge tulisan, wey tenged te menge kuntada ku he menge zuma ku he Hudiyu wey menge kenà Hudiyu. Mezakel is menge hitavù kediey ziyà te menge inged wey ziyà te wazà meg̵inged wey ziyà te zag̵at wey pinaag̵i te menge tarù he tumutuu.

Pilipus 3:2

Likayi niw is menge kuntada te Megbevayà he mezaat is ulaula zan he iyan is menge Hudiyu he ebpenurù he iyan egkesuatan te Megbevayà is kebpelii niw te lawa niw.

Hibriyuhanen 10:29

Ne emun iyan haazà, wey pe be kenà utew meveg̵at is idsilut dutun te etew g̵untaan he edsumpeliten din is hizu kandin te Anak te Megbevayà. Utew meveg̵at is idsilut kandin su igkepesavut din pinaag̵i zutun te mid-ulaula zin he wazà pulus dutun te lengesa ni Jesus he ibpalis pezem kandin he iyan tuus te veg̵u en he paag̵i te kebpekidsevaha te Megbevayà te menusiyà. Meveg̵at is silut kandin su edsumpeliten din is belig̵eg̵awen he Wag̵as he Mulin-ulin.

2 Pedro 2:22

Netuman en pinaag̵i kandan sikan is erubasa he edhenduen te, “Migkaan te asu is in-utè din ne sikan is nezig̵ù he vavuy, midtunè en maan.”

Impezayag 22:15

Iyan, diyè dà te meziyù is mekeeled-eled is baal zin, wey is menge keteuwan, is memeremerik is ulaula, is menge memumunù, is ebpemenimba te menge ledawan wey is langun he menge etew he ebpenurù te tarù wey is etew he limbung is ulaula zin.