Mateo 7:21 - Manobo Western Bukidnon

²¹ Su zuen menge etew he ebpengumew-umew kedì te, ‘Nengazen, he Nengazen!’ Iyan, kenà langun te sikandan ebmehimuwen he mehedii te Amey ku he Megbevayà he ziyà te langit, kekenà, iyan dà sikan is edtuman te egkesuatan te Megbevayà.

Mateo 7:21 Кръстосани препратки

Mateo 12:50

Su is minsan hentei he edtuman te egkesuatan te Amey tew he ziyà te langit, iyan daan iney ku, menge suled ku he maama, wey suled ku he vahi.”

Mateo 16:17

Ne migkag̵i si Jesus te, “Simon, anak ni Juan, midtuvazan ka te Megbevayà su wazè nu metueni heini pinaag̵i te etew, kekenà, impinted kenikew te Amey ku he ziyà te langit.

Mateo 18:10

Ne is menge etew he iring kayi te menge vatà, kenè niw lupig̵i is minsan sevaha kandan su venar is egkeg̵iyen ku keniyu he is menge velinsug̵uen te Megbevayà he ebantey kandan, kenà ed-awà diyà te etuvangan te Amey ku he Megbevayà he ziyà te langit.

Mateo 18:19

Ne heini zaan is ibpesavut ku keniyu: ke zuen minsan hengkey he ebuyuen niw ziyà te Megbevayà he neuyunan te minsan dezuwa zà keniyu zini te tanà, ibeg̵ey heini keniyu te Amey ku he Megbevayà he ziyà te langit.

Mateo 18:3

Ne ke si Jesus te, “Kenè niw lipati heini: kinahanglan he ed-ewaan niw ziyà te isip niw is kebpelavew ne iringi niw heini is batà, su nelevawan sikandin te langun. Su emun kenè niw ed-iringan heini, ne kenè kew egkehedian te Megbevayà.

Mateo 18:35

Ne,” ke si Jesus te, “iring ded daan kayi is ed-ul-ulahan te Amey ku he ziyà te langit diyà te uman sevaha keniyu emun kenà tutuu is kebpesaylu niw te minsan hentei he zuma niw.”

Mateo 19:24

Egkeg̵iyen ku keniyu he kenè din egkehimu. Melemu pa te kemilyu is kedseled din diyà te vudsi te rag̵um kenà te sepian he etew is kebpesakup din te Megbevayà wey sikandin mehedii.”

Mateo 25:10

Ne zutun migenat haazà is menge tulebung su ebpemasa zan te gas, ne hein nehaus dan en nekeuma sikan is ebpengesawa. Ne haazà is lelima he menge rag̵a he memetau, miduma zan kandin te edseled dutun te valey he zutun is eseweey. Ne hein nekeseled dan en dutun ne midlekevan haazà is baley.

Mateo 25:21

Ne migkag̵i haazà is egalen din te, ‘Utew meupiya is baal nu! Metinumanen ka he sulug̵uen! Ne g̵eina te egkeserig̵an ka te zeisey he selapì idsarig ku kenikew is dekelà. Seled ka zini wey ka mekeambit te kelipey ku.’

Mateo 26:39

Ne midlaus si Jesus diyà te uvey zà dutun ne midlangkeb sikandin ne mid-ampù, ke sikandin te, “Amey ku, ke egkehimu zà ne kenè nu en kediey ipeseg̵azi heini is merasey he imbanglis nu kediey, iyan, kenà egkesunud is kediey he egkesuatan, kekenà, iyan egkesunud is kenikew he egkesuatan.”

Mateo 26:42

Ne midlikù si Jesus ne mid-ampù med-uman, ke sikandin te, “Amey ku, emun kenè en egkehimu he id-awà sikan is kedresaya kedì ne iyan egkesunud is kenikew he egkesuatan.”

Marcos 3:35

su is minsan hentei he edtuman te egkesuatan te Megbevayà, iyan daan iney ku wey menge suled ku he maama, wey menge etevey ku.”

Marcos 9:47

Ne emun iyan igkeawà te kedsarig nu kedì is mata nu, lug̵ita nu wey itimbag su meupiya pa ke sevaha zà is mata nu ke edhedian ka te Megbevayà kenà te zezuwa is mata nu ne idtimbag ka ziyà te Impirnu.

Lucas 11:28

Iyan, midtavak si Jesus te, “Lavew pa he zekelà is kelipey te etew he ebpemineg te Lalag te Megbevayà ne ebpezumdumahan din!”

Lucas 13:25

Su edlekevan te teg̵ivaley haazà is gemawan. Ne emun diyè kew pa te g̵awas ebpenelehuzan kew is egkag̵i te, ‘Puwasi key kenikew!’ Ne iyan dà idtavak dutun te teg̵ig̵aked is, ‘Kenè ku egketuenan ke hentei kew wey ke hendei kew ebpuun.’

Lucas 18:25

Kenè din egkehimu su melemu pa te langgam he kemilyu is kedseled din diyà te vudsi te rag̵um, kenà te sepian he etew te kebpesakup din te Megbevayà wey sikandin mehedii.”

Lucas 6:46

Ne mid-uman megkag̵i si Jesus te, “Maan is egkeg̵iyen niw he iyan a egalen niw, iyan, kenè niw edtumanen is menge sambag ku keniyu.

Juan 14:7

Emun egketuenan niw ke hentei a, egketuenan niw zaan ke hentei is Amey ku. Puun guntaan netuenan niw en ke hentei sikandin su neehè niw en sikandin.”

Juan 15:23

Is egkuntada kediey, kenà iyan e zà egkuntedahan din, kekenà, egkuntedahan din daan is Amey ku he Megbevayà.

Juan 3:5

Ne ke si Jesus te, “Utew venar is egkeg̵iyen ku kenikew he wey zà ebpekeragkes is etew ziyà te menge etew he edhedian te Megbevayà ke id-anak sikandin pinaag̵i te wahig wey pinaag̵i te g̵ehem te Wag̵as he Mulin-ulin.

Juan 5:17

Iyan, duen ketezengan ni Jesus, ke sikandin te, “Is Amey ku he Megbevayà, kenà sikandin edhimeley he ebaal, ne siak, ebpenigudu a zaan ebaal.”

Juan 6:40

Is langun he nesayud ke hentei a is anak din, ne edtuu kediey, egkesuatan te Amey ku he meveg̵ayi te untung he wazà pidtemanan ne ebenhawen ku keuzemà dutun te ketepusan he andew.”

Juan 7:17

Is etew he egkesuat he edtuman te ebpeveelan te Megbevayà, iyan egkesayud ke ziyè be ebpuun te Megbevayà is ibpenurù ku wey ke zini zè be ebpuun te isip ku.

Nengeulaula 14:22

Ne impesavut dan te menge tumutuu zutun is ibmezesen te kedtuu zan. Migkag̵i zan kandan he kinahanglan he kenè dan engkezi is kedtuu zan ki Jesus. Ke sikandan te, “Sikita is tumutuu, wey ki zà egkehedii te Megbevayà ke egkeantus ta is mezakel he kemereg̵enan.”

Ruma 12:2

Kenè niw iringi is menge ulaula te menge etew he kuntada te Megbevayà, kekenà, itug̵ut niw he helina kew te Megbevayà pinaag̵i te kebeg̵uwa zin te isip niw. Ne zutun egkesavut niw human is egkesuatan te Megbevayà, he ke và dà egkeg̵iya, egkesavut niw ke hengkey is menge ulaula he metazeng he egkesuatan he kenà egkesewayan te Megbevayà.

Ruma 2:13

Su emun iyan ta edserig̵an is kesug̵uan, kenè egkehimu he ed-isipen ki te Megbevayà he metazeng pinaag̵i zà te kebpemineg te insug̵ù dutun te kesug̵uan, kekenà, kinahanglan he wazà minsan hengkey he sayep ta zutun te kedtumana ta te kesug̵uan.

Ipisu 6:6

Kinahanglan he layun meupiya is baal niw ne kenà dutun dà te ebentayan kew te egalen niw su kinahanglan he kenà iyan dà ebpekezalig te vaal niw is etew, kekenà, elin daan is Megbevayà su menge sulug̵uen kiw zaan ni Kristu ne kinahanglan he edtumanen ta is ebpeveelan kenita te Megbevayà tenged te ebpuun te keputian te atey ta is kedtumana ta kayi. Kinahanglan he meupiya is gehinawa ta zutun te vaal ta iring te iyan ebayàbayà kenita is Megbevayà ne kenà iyan dà is egalen ta zini te kelibutan.

Kulusas 4:12

Ebpengemusta zaan keniyu si Ipapras. Duma niw zaan he tigKulusas he sulug̵uen ni Jesu Kristu. Layun kew zin id-ampù. Ed-ampù sikandin diyà te Megbevayà he mebmelig-en wey meheg̵et is kedtuu niw ne wey meheg̵et daan is kedtumana niw te egkesuatan te Megbevayà.

1 Tiselunika 4:3

Iyan egkesuatan te Megbevayà is: kinahanglan he zait is menge ulaula niw te etew he g̵aked din. Kinahanglan he kenè niw hileveti is kenè niw esawa.

Tito 1:16

Duen menge etew he egkeg̵iyen dan he emig̵u sikandan te Megbevayà, iyan, pinaag̵i te menge ulaula zan egketuusan ta he kuntada sikandan te Megbevayà. Utew zin sikandan egkeepesi su kenè dan ebpememineg te tutuu he tuluuwen. Ne tenged dutun kenè dan dait he ibpeulaula zin te minsan hengkey he meupiya.

Hibriyuhanen 13:21

Berakat he pinaag̵i ki Jesu Kristu, is Megbevayà he ebeg̵ey te kelinew, beg̵ayi kew zin te minsan hengkey he tavang wey niw tumana is egkesuatan din. Berakat daan he himuwa kiw zin he menge etew he utew zin egkesuati is menge ulaula. Edelig̵en tew si Jesu Kristu te wazà pidtemanan.

Hibriyuhanen 4:6

Tenged kayi, netuenan ta he haazà is menge etew zengan he nehuna he nemekezineg te Meupiya he Tudtulanen mehitenged kayi te kedhimeley, wazà sikandan mehimuwa te Megbevayà he mekeseled dan wey zan mekehimeley tenged te wazè dan kebpemineg. Iyan, netuenan tew zaan he zuen menge zuma pa he ebmehimuwen mulà te Megbevayà he mekeseled sikandan wey zan mekehimeley zuma kandin.

Santiago 1:22

Kinahanglan he edtumanen niw is Lalag te Megbevayà. Emun ebpemineg̵en niw zà is lalag din ne kenè niw edtumanen, henduen be te edterteruen niw is gehinawa niw.

1 Pedro 2:15

Umba edhengyuen ku heini su egkesuatan te Megbevayà he is menge mepedeligen he wazà mekesavut te hustu, meehè dan is menge metazeng he ulaula tew. Ne pinaag̵i kayi ebpekeengked dan is edsudì kenitew.

1 Pedro 4:2

Ne tenged kayi, puun dutun taman te kebpatey zin egkehimu he kenè din en human edtumanen is mezaat he kebayà te lawa zin, kekenà, iyan din edtumanen is egkesuatan te Megbevayà.

Impezayag 22:14

Utew egkengelipey haazà is langun he ebpìpian dan is ugelingen dan, he ke và dà egkeg̵iya, ibpepalis dan is menge salè dan su wey utew meputì su emun ebeelan dan haazà, ebeg̵ayan sikandan te ketenged te kegkaan te veg̵as dutun te kayu he ebpekeveg̵ey te untung wey te kedseled dutun te menge pultahan te inged.

Impezayag 3:5

Is minsan hentei he ebpekezaag ki Setanas, edsun-uzan sikandin te meputì ne kenè ku ebpenasen is ngazan din diyà te libru he zutun isurat is menge ngazan te ebeg̵ayan te untung he wazà pidtemanan. Ne ziyà te etuvangan te Amey ku he Megbevayà wey is menge velinsug̵uen din, ed-engkenen ku sikandin he g̵aked ku.