Mateo 7:15 - Manobo Western Bukidnon

¹⁵ Likayi niw is menge ebpeneuven kun te Megbevayà he tarù is ibpenurù dan. Henduen be te hustu sikandan he tumutuu te Megbevayà, iyan, ebpekezezaat is ibpenurù dan.

Mateo 7:15 Кръстосани препратки

Mateo 10:17

Andam kew su edekepen kew zan, ne ed-uwiten kew zan diyà te hukmanan, ne ebug̵elen kew zan diyà te menge simbahan dan.

Mateo 16:11

Maan is wazè niw mesavut he kenà supas is egkeg̵iyen ku? Andam kew wey kew mekelikey te tapey te menge Perisiyu wey Sedusiyu.”

Mateo 16:6

Hein nekerapas dan en, duen sempità he impezineg kandan ni Jesus. Ke sikandin te, “Andam kew wey niw melikayi is tapey te menge Perisiyu wey Sedusiyu.”

Mateo 24:11

Ne zutun ebpemenlepew is mezakel he teruen he etew he egkag̵i is uman sevaha kandan he ebpeneuven sikandin te Megbevayà. Ne mezakel is egkelimbungan dan.

Mateo 7:14

Melig̵et mulà is pultahan wey mereg̵en he ed-ikulen is dalan he ibpehendiyà te untung he wazè din pidtemanan ne mezelag dà is ed-ikul kayi.

Lucas 12:15

Ne migkag̵i si Jesus diyà te menge etew te, “Purungi niw ventayi is ulaula niw su wey wazà keleleg̵ed diyan te keniyu. Su is ibmeupiya te untung te etew, kenà ebpuun te mezakel he menge azen.”

Lucas 6:26

Kehizu niw te edtehuzen guntaan te langun he menge etew su iyan heeyan mid-ulaula zengan te menge kepuun dan diyà te menge kenà tutuu he ebpeneuven te Megbevayà. Umba edtehuzen kew te menge etew su iring kew zutun te menge kenà tutuu he ebpeneuven ne edsilutan kew zaan te Megbevayà.

Juan 10:12

Is etew he sinuhulan dà, kenà tutuu he ed-elima su kenà kandin is menge kerehidu. Ne emun egkeehè din is ebpekeuma he leew he asu he egngezanan te lubu, ed-ewaan din haazà is menge kerehidu ne ebpelag̵uy. Ne ebengaan dutun te lubu is sevaha he kerehidu ne is duma, ne ebpekedsusuwey.

Nengeulaula 13:40

Purungi niw isipa heini su wey kenà mehitavù diyà te keniyu is netagnà dengan he Lalag te Megbevayà he insurat te ebpemeneuven he ke sikandin te,

Nengeulaula 13:6

Ne mid-abley zan haazà is pulu ne nekeuma zan diyà te inged he Pepus. Ne zutun neuma zan is selemengkiru he egngezanan ki Berhisus. Hudiyu haazà he mibpetuu he ebpeneuven sikandin te Megbevayà.

Gelasya 2:4

Iyan, duen menge etew he kenà tutuu he menge tumutuu te tutuu he tuluuwen he midtampu kenami. Egkesuatan dan dutun he sirkunsidara si Tito. Umba midtampu zan he id-eles dan he kenè dan tutuu he tumutuu su wey zan maahà ke edtumanen tew is menge sug̵ù he imbilinbilin ni Moises. Su egkesuatan dan he meiring kiw te uripen pinaag̵i te kedtuman te kesug̵uan minsan te nelibri kiw en ni Jesu Kristu ne wazè en kinahanglan he ebenteyanan tew pa is kesug̵uan.

Ipisu 4:14

Dutun ne egkehimu he kenè kiw en ebpekeiring te vatà su is etew he iring dutun ne egkehalinhalin is kedtuu zin su melemu ebpeketuu te minsan hengkey he tuluuwen he ibpenurù kandin te menge teruen he etew he metau he edlimbung.

Ipisu 5:6

Su tenged kayi he menge ulaula, utew egkepeuki te Megbevayà keuzemà is menge etew he kenà ebpemineg te menge sug̵ù din. Ne tenged dutun, kenè niw itug̵ut he meketuu kew te tarù he penurù te minsan hentei he etew pinaag̵i te menge ketezengan dan he kenà tutuu.

Pilipus 3:2

Likayi niw is menge kuntada te Megbevayà he mezaat is ulaula zan he iyan is menge Hudiyu he ebpenurù he iyan egkesuatan te Megbevayà is kebpelii niw te lawa niw.

Kulusas 2:8

Andam kew su kela ke zuen egkabig keniyu pinaag̵i te kebpenurù te tuluuwen he tarù ne wazè din pulus su imbilinbilin dà te menge etew. Kenà haazà hustu he tuluuwen su kenà ebpuun diyà te ki Kristu.

2 Timoteo 3:13

Iyan, is menge lalung he etew, wey is menge uvag kun tumutuu, ed-iseg mulà ebmezaat is menge ulaula zan. Edtezinen dan is isip te menge etew, iyan, egketazin daan is kandan he isip.

2 Timoteo 4:3

Umba idtelaan ku heini kenikew su egkeuma keuzemà is timpu he kenà edewaten te menge etew is tutuu he tuluuwen, kekenà, iyan dan edsunuzen is menge mezaat he kebayè dan. Ebpemepenurù dan te mezakel he menge menenudlù. Ne iyan ibpenurù kayi is tuluuwen he utew zan egkesuati te ebpemineg.

2 Pedro 3:17

Minahal ku he menge suled, geina te netuenan niw en heini he zaan, andam kew su wey kenè kew meketuu te menge tarù he ibpenurù te menge lalung he etew ne egkelipatan niw is tutuu he tuluuwen he midtuuwan niw.

1 Juan 4:1

Menge minahal ku he suled, kenè niw petuluy tuuwi is etew he egkag̵i he mid-ulinan sikandin te Wag̵as he Mulin-ulin. Gezami niw zè pa wey niw metueni ke ebpuun be te Megbevayà is ed-ulin kandin. Umba egkeg̵iyen ku heini su mezakel en is menge ebpenurù te tarù he midlepew zini te kelibutan he mid-ulinan sikandan te teruen he mulin-ulin.

Hudas 1:4

Umba kinahanglan he egkeg̵iyen ku heini su zuen menge etew he nekeamur keniyu, iyan, id-eles dan he kenà hustu is edtuuwan dan. Wazè dan kedtahud te Megbevayà; edhelinen dan pezem is tutuu he tuluuwen su ibpenurù dan he egkehimu ke ed-ul-ulahan tew is meremerik su utew kun belig̵eg̵awen is Megbevayà ne ebpeseyluwen kiw zin gihapun. Kenè dan edtuu he si Jesu Kristu, iyan dà egalen tew wey Nengazen tew. Dengan dà isurat te menge ebpeneuven te Megbevayà ke hengkey is silut kandan.

Impezayag 16:13

Ne neehè ku zutun is tetelu he menge utew memekehandekhandek he mezaat he mulin-ulin he henduen be te vakbak. Midlepew is sevaha he ebpuun duen te vèbà te zekelà he deragun he iyan si Setanas, ne is sevaha, diyà medlepew puun te vèbà duen te langgam, wey is sevaha zuen medlepew te vèbà te ebpeneuven ni Setanas.

Impezayag 17:6

Ne neehè ku he nelangut haazà is bahi te lengesa te menge tumutuu he midhimetayan din tenged te kedtuu zan ki Jesus. Ne utew a neinuinu te kegkeahaa ku zutun te vahi.

Impezayag 19:20

Ne midakep haazà is langgam ne midakep daan kes ebpeneuven ni Setanas, sikan is mibpaahà te menge egkein-inuwan diyà te etuvangan te langgam. (Pinaag̵i zutun te menge egkein-inuwan mid-ekalan din wey meketuu te langgam haazà is langun he menge etew he midtiyapan te tiyap duen te langgam wey mid-azap te ledawan te langgam.) Ne sikan is langgam wey kes ebpeneuven ni Setanas, intimbag sikandan he uuyag pa ziyà te ranew he egkeregreg te esupri.

Impezayag 20:10

Ne zutun, is mid-akal kandan he si Setanas, intimbag sikandin diyà te ranew he egkeregreg te esupri he zutun itimbag sikan is langgam wey kes ebpeneuven ni Setanas ne zutun edresayen sikandan te maandew wey mezukilem te wazà pidtemanan.