Mateo 6:22 - Manobo Western Bukidnon

²² Is mata ta, ne iring te sulù kayi te lawa ta su emun merayag is ked-ehè ta, he ke và dà egkeg̵iya, metazeng is ulaula ta, ne henduen be te egketeyawan is tivuuk he lawa ta.

Mateo 6:22 Кръстосани препратки

Mateo 5:15

Ne wazà daan etew he edtemteman din is sulù ne ebpelengkevan din te vinevey, kekenà, idsavuk din diyà te sevukà wey meteyawi is tivuuk he seled te valey.

Nengeulaula 2:46

Ne kada andew edtig̵um is langun he menge tumutuu zuen te zekelà he simbahan he egngezanan te Valey te Megbevayà. Ne egkesevaha zan daan he utew melipayen te kegkaan dan dutun te menge valey zan wey kebpevegbeg̵ayè dan.

2 Kurintu 11:3

Egkeipeng a keniyu su kela ke meengkezi niw is kebpurungi niw kedtumana te menge sug̵ù ni Kristu su kela ke mesahug is kedtuu niw te selakew he edtuuwen. Kela ke meiringi niw si Ibà dengan su mid-akalan sikandin te teruen he uled he iyan si Setanas.

Ipisu 6:5

Sikiyu is menge sulug̵uen, purungi niw tumana is menge sug̵ù keniyu te menge egalen niw zini te kelibutan. Tehuza niw sikandan ne kinahanglan he ebpuun te meupiya he g̵ehinawa niw is kedtumana niw te menge sug̵ù dan iring te iyan si Kristu edsug̵ù keniyu.

Kulusas 3:22

Ne sikiyu is sulug̵uen, layun niw pemineg̵a is sug̵ù te egalen niw te minsan keenu he timpu, ne kenà dutun dà te timpu he ebentayan kew zin. Ne kenè niw iyan dà ibpemineg̵a kandin su wey meupiya is isip din keniyu, kekenà, kinahanglan he iyan ketezengan ke maan is ebpurungan niw is baal niw su g̵eina te zekelà is kedtahud niw te Nengazen tew.