Mateo 5:29 - Manobo Western Bukidnon

²⁹ Ne emun iyan nu igkepenulayi is kewanan he mata nu, lug̵ita nu wey itimbag! Meupiya pa ke wazè nu mata, kenà ke igkeagbur ka ziyà te hapuy he Impirnu is tivuuk he lawa nu.

Mateo 5:29 Кръстосани препратки

Mateo 10:28

Kenè kew mahandek te menge etew zà duen su iyan dà egkepatey zan is lawa niw; ne kenè dan egkepatey is gimukud niw. Iyan ikehandek niw is Megbevayà su egkepatey zin is lawa wey minsan is gimukud niw pinaag̵i te Impirnu.

Mateo 16:26

Minsan ke maangken pa te etew is tivuuk he kelibutan, wazà pulus diyà te kandin ke kenà sikandin egkeveg̵ayan te untung he wazà pidtemanan, su wazà minsan hengkey he azen he igkeliwè din wey zin maangken is untung he wazà pidtemanan.

Mateo 17:27

Asal, kenà meupiya he mepauk kenita heini is menge menunukut te ibayad dutun te Valey te Megbevayà. Hendiyè ka te ranew ne pemunuwit ka. Ne zutun te vèbà te pait he egkehuna nu egkeutel, egkeehè nu is selapì. Kuwaa nu haazà is selapì ne ivayad nu kayi te edsukuten kenita he ibayad te Valey te Megbevayà.”

Mateo 19:12

Su kenè en ed-iring-iring is ketezengan te etew ke maan is kenè dan ebpengesawa wey egkeesawa. Is duma, kenà ebpekeesawa wey egkeesawa su iyan en haazà kegkeetew-etew zan; ne is duma zaan tenged te migkapun; ne is duma pa, kenà ebpekeesawa wey egkeesawa su wey zan metuman is insug̵ù kandan te Megbevayà tenged te kedhadì din. Sikan is ebpekezawat te kenè din kebpengesawa, wey ke kenè din kebpeesawa, ne meupiya ke edewaten din en.”

Mateo 23:15

Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Edlayun kew te zag̵at ne edhipenawen niw is meluag he tanà wey niw mekabig is etew; ne is egkekabig niw, edhimuen niw he tuwas pa he zait sikandin he edsilutan diyà te Impirnu, kenà sikiyu.

Mateo 23:33

Iring kew te menge uled wey menge anak te uled su utew mezaat is ulaula niw. Ebmenmenuwen niw te kedlikey is silut keniyu ziyà te Impirnu?

Mateo 5:22

Ne iyan kedì he penurù is: minsan sikan is egkepauk dà te zuma zin, edhukuman daan sikandin te Megbevayà. Ne sikan is edsulà te zuma zin te, ‘Wazè nu pulus he etew!’ ne egkeuwit sikandin diyà te husayen. Ne sikan is edsulaan din is duma zin he egkag̵i te, ‘Tulebung ka he wazè nu pulus,’ ne zait sikandin he egkeuwit diyà te hapuy te Impirnu.

Mateo 5:30

Emun iyan nu igkepenulayi is kewanan he velad nu ne tempeza nu wey itimbag. Meupiya pa ke wazè nu velad, kenà ke igkeagbur te Impirnu is tivuuk he lawa nu.

Marcos 8:36

Minsan ke maangken pa te etew is tivuuk he kelibutan, wazà pulus diyà te kandin ke kenà sikandin ebeg̵ayan te untung he wazà pidtemanan.

Lucas 12:5

Egkeg̵iyen ku keniyu ke hentei is engayan he igkehandek niw. Iyan niw ikehandek is Megbevayà su kenè din iyan dà egkepatey is lawa niw su zuen din keg̵ehem he ebpeketimbag te g̵imukud niw ziyà te Impirnu. Uya, iyan niw sikandin ikehandek!”

Ruma 6:6

Su netuenan tew he is daan he mesinupaken he kegkeetew tew, ne iring te inransang duma ki Kristu ziyà te krus su wey mebpatey. Ne tenged kayi, egkeawà is layun tew kebpekesalà ne human dutun kenè kiw en egkeuripen te ked-ulaula te mezaat.

Ruma 8:13

Su emun kenè niw iyan ed-iniyug̵an is menge suat te lawa niw, edsilutan kew te kemetayen he wazè din pidtemanan, iyan, ke pinaag̵i te kedtavang te Wag̵as he Mulin-ulin egkeiniyug̵an niw is menge mezaat he ulaula niw, ebeg̵ayan kew te untung he wazè din pidtemanan.

1 Kurintu 9:27

Ne heini is lawa ku, ke zuen mezaat he suat din, ne edhimuwen ku is taman te egkehimu ku su wey ku meeg̵en su kela ke, siak is nekepenurù te zuma, ne iyan a kenà egkesuhulan keuzemà te Megbevayà.

Gelasya 5:24

Ne is minsan hentei he migaked en ni Jesu Kristu, ne iring te inransang din en te krus is mekesesalà he lawa zin, he ke và dà egkeg̵iya, mid-engkezan din en is menge mezaat he kebayè din wey egkesuatan din.

Kulusas 3:5

Umba, menge suled, kenè niw en itug̵ut he tumana niw is mezaat he kebayè niw; kenè niw ul-ulaha is mahawag wey meremerik he ulaula ne kenè niw mehimuwa he zuen suat niw te kenè niw esawa; engkezi niw is mezaat he ulaula wey is keleleg̵ed su emun leg̵ezen ki te menge azen, henduen be te egkeilisan dini te g̵ehinawa ta is tutuu he Megbevayà te menge azen.