Mateo 5:12 - Manobo Western Bukidnon

¹² Iyan daan heini kes mid-ulaula te menge etew zengan diyà te menge ebpeneuven te Megbevayà. Medlipey kew utew su utew zekelà is idsuhul keniyu keuzemà diyà te langit.

Mateo 5:12 Кръстосани препратки

Mateo 16:27

Su Siak is Kakey te Menusiyà, imbanglis kedì he mekelikù a keuzemà he edumahan te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà. Ne zutun edsuhulan ku is langun he menge etew sumalà is mid-ulaula te uman sevaha.

Mateo 6:16

Ne emun edsalang kew egkaan su ebpengampù kew ziyà te Megbevayà, kenè niw ipetuusi pinaag̵i te kebuvuked niw iring te menge etew he egkesuat he mezalig sikandan te menge zuma he etew. Edrig̵urig̵u zan, ne kenè dan ebpendapug wey kenè dan ebpenuwat su wey metueni te menge etew he edsalang dan egkaan. Egkeg̵iyen ku keniyu he nezawat dan en is kedelig̵a kandan te menge etew. Ne wazè en duma pa he suhul he egkezawat dan he ebpuun te Megbevayà.

Lucas 13:34

Ne zutun netenuzan ni Jesus is menge ulaula te menge meg̵inged te Hiruselim ne ke sikandin te, “Igkeseeng ku sikiyu is menge meg̵inged diyà te Hiruselim su ebpemunuen niw is ebpemeneuven te Megbevayà ne is menge sulug̵uen te Megbevayà he ibpehendiyàn, ebpenulengen niw te vatu he edhimetayan niw. Utew zekelà is suat ku pezem he ed-uyemuwen ku sikiyu; ke và dà manuk, iring a te upa he edlekupan din is menge piyak din ne kenè kew ebpelekup.

Lucas 6:35

Iyan penurù ku keniyu is: kenà imezaat te g̵ehinawa niw is menge kuntada niw, kekenà, meupiya is ul-ulaha niw ziyà te kandan. Ke zuen etew he ed-utang keniyu, kenè niw itag̵ù diyà te g̵ehinawa niw he kinahanglan he beyazi kew zin. Emun edtumanen niw heini, igkepeehè niw he menge anak kew te utew lavew he Megbevayà. Ne utew zekelà is suhul zin keniyu su minsan is menge etew he memezaat is ulaula wey is menge kenà ebpeselamat kandin, egkehizuwan din sikandan gihapun.

Nengeulaula 16:25

Ne hein metaneb en is kezukileman, mid-ampù si Pablo wey si Silas wey migkanta zan is edalig te Megbevayà, ne ebpememineg kandan is menge zuma zan he pirisu.

Nengeulaula 5:41

Ne is menge epustul, migenat dan ne utew zan nelipey su mid-isip sikandan te Megbevayà he meinentusen te ked-el-eleza kandan tenged te kedtuu zan ki Jesus.

Ruma 5:3

Ne kenà duen dà taman su ebelesen te kelipey is menge kemereg̵enan he nengeseg̵azan ta su netuenan ta he pinaag̵i kayi edlumbazen ki wey ki mehimu he meinentusen.

1 Kurintu 3:8

Ebpeked-iring is pulus te ebpemula wey is pulus te ebinyag ne edsuhulan heini is dezuwa te Megbevayà sumalà is mibeelan dan.

2 Kurintu 4:17

Ne heini is menge kemeresayan he egkeantus dey g̵untaan, ne meg̵aan dà utew, iyan, tenged te ked-antus dey kayi zuen egkeperateng dey he utew zekelà he kegkelavew he ibeg̵ey kenitew keuzemà. Ne kenà ebpekesusuluwan is kemeresayan he egkeantus dey kayi te utew zekelà he wazè din pidtemanan he kegkelavew.

Pilipus 1:29

Su is mibpeveelan keniyu te Megbevayà, ne kenà iyan dà is kedtuuwi niw ki Kristu, kekenà, elin daan is ked-entusa niw te kemeresayan tenged te kedtuu niw kandin.

Pilipus 2:17

Is kedtuu niw te Megbevayà, ne iring te pemuhat he edewaten din. Ne emun egkesuatan din pa he id-uman is kebpatey ku kayi te pemuhat, igkelipey ku pa. Ne igkelipey ku zaan is kedtuu niw iring te nelipey kew.

Kulusas 1:24

Maambe ke ebpekeantus a g̵untaan te merasey su iyan igkezeyzey niw. Igkelipey ku heini su iring te kegkerasey ni Kristu edhimesazan ku en is langun he mereg̵en he ibpaantus din kediey su wey mezeyzey is lawa ni Kristu, he ke và dà egkeg̵iya, is menge tumutuu kandin.

Kulusas 3:24

su netuenan niw en he edsuhulan kew keuzemà te Nengazen. Ne ibeg̵ey zin keniyu haazà is suhul he impenaad din su is tutuu he egalen niw ne iyan si Kristu.

1 Tiselunika 2:15

Is menge Hudiyu, iyan kes midhimatey te ebpemeneuven te Megbevayà dengan wey te Nengazen tew zaan he si Jesus. Ne mid-avug key zan daan. Utew supak is menge ulaula zan te egkesuatan te Megbevayà,

Hibriyuhanen 10:34

Ne nehizuwan niw, ne midtevangan niw is menge tumutuu he nengepirisu. Ne minsan pa te mibpen-ileg te menge etew is langun he menge azen niw, midlipey kew gihapun su netuenan niw he zuen azen niw he utew pa meupiya ziyà te langit he kenà egkeileg diyà te keniyu te wazè din pidtemanan.

Hibriyuhanen 11:26

Neisip din he tuwas pa he meupiya is ked-entusa zin te kedlupig̵i kandin tenged te kedsarig din te mibpilì he hadì he ibpevulus te Megbevayà keuzemà, kenà is dekelà he ketig̵eyunan he egkekuwa zin diyà te Ihiptu. Su iyan hustu he edteg̵azan din is langun he meupiya he ibeg̵ey kandin te Megbevayà keuzemà.

Hibriyuhanen 11:33

Su pinaag̵i te kedtuu zan te Megbevayà nengezaag te zuma kandan is menge sundaru te menge zekelà he inged. Ne is menge zuma pa, metazeng is kedhedii zan te menge sakup dan, ne is duma pa, nezawat dan is impenaad kandan te Megbevayà, ne is duma, nezaag dan is ebpekekaid he erimaung ne wazè dan mekag̵at.

Hibriyuhanen 11:6

Is etew he wazè din kedtuu te Megbevayà, kenà egkehimu he egkesuatan te Megbevayà is menge ulaula zin. Su is etew he ebpetavang te Megbevayà, kinahanglan he edtuuwen din he zuen Megbevayà, ne kinahanglan daan he edtuuwen din he edtuvazan te Megbevayà te meupiya is minsan hentei he edhag̵ù he ebpen-ahà te paag̵i wey sikandin mekepekid-emig̵u te Megbevayà.

Santiago 1:2

Menge suled, mebmelipayen kew emun merasey is egkeulaula niw tenged te idtug̵ut te Megbevayà he zuen ebarangbarang he penggezam te kedtuu niw kandin.

Santiago 5:10

Menge suled, ed-iringan ta is kebmeinentusen te menge ebpeneuven dengan te Megbevayà su zutun te kebpesevuta zan te Lalag te Nengazen nekeantus dan te kemeresayan.

1 Pedro 4:13

Kenè kew meinuinu, kekenà, lipey kew utew su pinaag̵i kayi ebpekeambit kew te menge kemeresayan he naantus ni Kristu ne tenged dutun utew kew zaan egkelipey keuzemà ke ibpezayag din kenitew haazà is bulawan he ed-ulian.