Mateo 4:23 - Manobo Western Bukidnon

²³ Ne neeneb ni Jesus is tivuuk he prubinsya he Geliliya te ebpenurù te menge etew ziyà te menge simbahan dan. Impesavut din te menge etew is Meupiya he Tudtulanen te keag̵i te kedhadì te Megbevayà ne nengeulian din is egkengesekitan te migkelingulingu he varang te zaru.

Mateo 4:23 Кръстосани препратки

Mateo 12:9

Ne mid-awà si Jesus dutun, ne midhendiyà te sevaha he simbahan.

Mateo 13:19

Ke zuen menge etew he egkezineg dan is lalag mehitenged te kedhadì te Megbevayà, iyan, kenè dan edsevuten, ne iring haazà te venì he ziyà mengeulug te zalan. Edlepew si Setanas ne ed-eg̵awen din haazà is lalag he nezineg dan.

Mateo 13:54

mid-ulì diyà te inged din. Ne ziyà te simbahan mibpenurù din is menge etew zutun. Nengeinuinu is menge etew he mibpemineg kandin. Ke sikandan te, “Hentei vuwa is nekepenurù kandin? Maan is metau sikandin ebaal te menge egkein-inuwan?

Mateo 14:14

Ne hein nekezunggù ensi Jesus, neehè din is mezakel he menge etew. Ne utew zin nengehizuwi sikandan ne mibewian din is egkengezeruwan dutun ne nengeulian.

Mateo 24:14

Ne idsangyew ziyà te tivuuk he kelibutan heini is Meupiya he Tudtulanen te keag̵i te kedhadì te Megbevayà wey metueni heini te tivuuk he menusiyà. Ne emun egkepasad en haazà ne iyan en ketepusan.

Mateo 3:2

Ke sikandin te, “Iniyug̵i niw is memezaat he ulaula su meg̵aan en edhadì kenitew is Megbevayà he ziyà te langit.”

Mateo 9:35

Ne neeneb ni Jesus is langun he menge inged dutun wey menge unayan. Mibpenurù din is menge etew zutun diyà te seled te menge simbahan dan wey impesavut din diyà te kandan is Meupiya he Tudtulanen te keag̵i te kedhadì te Megbevayà. Nengeulian din is menge etew te minsan hengkey he zaru wey ebpenggezamen dan.

Marcos 1:14

Ne hein impezakep en ni Hadì Hirudis si Juan, midlikù si Jesus diyà te prubinsya he Geliliya ne impesavut din dutun te menge etew is Meupiya he Tudtulanen he ebpuun te Megbevayà.

Marcos 1:21

Ne midhendiyè dan te inged he Kepirnaum, ne hein neume en is andew he Sebadu he iyan Andew te Kedhimeley ne midseled si Jesus diyà te simbahan te menge Hudiyu ne mibpenurù din is menge etew zutun.

Marcos 1:39

Ne mid-eneb eni Jesus is langun he menge inged diyà te prubinsya he Geliliya ne midwali sikandin diyà te menge simbahan te menge Hudiyu zutun. Ne impemaawè din is menge mezaat he mulin-ulin puun dutun te edlelungen dan.

Marcos 3:10

Mezakel is nengeulian din en he egkengezeruwan ne tenged kayi, is egkengezeruwan dutun, ebpenlietliet dan en is edteg̵el ed-uvey diyà te ki Jesus wey zan mekezampà kandin su wey zan meulii.

Marcos 6:2

Ne zutun te andew he Sebadu he iyan mahal he Andew te Kedhimeley, mibpenurù ni Jesus is menge etew ziyà te seled te simbahan te menge Hudiyu. Mezakel he menge etew is nengetig̵um dutun, ne utew zan nengeinuinu is ebpememineg ki Jesus. Ke sikandan te, “Iyan sikandin sikan is pandey. Is iney zin, ne si Maria ne menge suled din ensi Santiago, si Jose, si Hudas, wey si Simon. Is menge etevey zin, ne kayi zà daan te inged tew. Maan is metau sikandin? Hendei zin buwa mekuwa is ketau zin? Maan is ebpekehimu sikandin te menge egkein-inuwan?” Ne zutun, wazè dan dewata is ibpenurù ni Jesus.

Marcos 6:6

Ne utew neinuinu si Jesus su wazà medtuu kandin is menge etew zutun he inged. Ne zutun midtukid ni Jesus te ebpenurù is menge siringan he inged dutun.

Lucas 10:9

Pemewii niw is egkengezeruwan dutun te inged. Ne keg̵iyi niw is menge etew zutun he meg̵aan en is timpu te kedhedii kandan te Megbevayà.

Lucas 13:10

Ne sevaha he andew he Sebadu, diyà si Jesus ebpenurù te simbahan te menge Hudiyu.

Lucas 16:16

Is kedtumana te kesug̵uan he imbilinbilin dengan ni Moises wey is kedtumana te menge lalag he insurat te menge ebpeneuven dengan te Megbevayà, ne impesavut heini taman dà te timpu ni Juan Megbebewtismu. Puun dutun iyan ibpesavut diyà te langun he menge etew is Meupiya he Tudtulanen te keag̵i te g̵inhedian te Megbevayà. Ne edteg̵el is minsan hentei wey meg̵aan pezem sikandan mekeseled dutun te g̵inhedian.

Lucas 20:1

Ne sevaha he andew zutun ne midlikù si Jesus diyà te zekelà he simbahan he egngezanan te Valey te Megbevayà ne mibpenurù din is menge etew, ne impesavut din kandan is Meupiya he Tudtulanen. Ne zutun mibeyaan sikandin te punuan te menge memumuhat wey menge menunudlù te kesug̵uan wey is menge ebmeg̵urangen te menge Hudiyu,

Lucas 4:14

Ne zutun mid-ulì si Jesus diyà te prubinsya he Geliliya ne zekelà diyà te kandin is gehem te Wag̵as he Mulin-ulin. Ne segugunà nekeeneb diyà te langun he menge inged dutun is tudtul mehitenged ki Jesus.

Lucas 5:17

Sevaha he andew he ebpenurù si Jesus, duen ebpemimpinuu he mezakel he menge Perisiyu wey menge menunudlù te kesug̵uan he midtelavuk dutun. Diyà haazà ebpemuun te langun he menge inged he sakup te Geliliya wey sakup te Hudiya. Ne zuen daan duma zan dutun he ebpemuun te Hiruselim. Ne zutun te ki Jesus is gehem te Megbevayà su wey zin mevewii is menge etew.

Lucas 6:17

Ne hein neipus ni Jesus is kebpilia zin kandan midtupang sikandin duma haazà is nengepilì din. Midteren dan dutun te patag ne nengevurun dutun is mezakel he menge sumusundan din wey is medmezakel he menge etew he ebpemuun diyà te menge inged he sakup te Hudiya wey ziyà te inged he Hiruselim. Ne zuen daan menge etew he ziyà ebpemuun te menge inged he Tiru wey Sidun he ziyà te veyvey te zag̵at. Iyan tuyù dutun te menge etew is ebpemineg dan te kebpenurù ni Jesus wey ebpemevawì daan sikandan kandin te menge zaru zan.

Lucas 6:6

Ne sevaha pa zutun he andew he Sebadu, midseled si Jesus duen te simbahan te menge Hudiyu ne nenurù sikandin. Ne zuen dutun etew he minatey is menge ug̵at te kewanan he velad din.

Lucas 7:21

Ne zutun he andew, mezakel is menge etew he nengeulian ni Jesus te menge zaru wey ebpenggezamen dan. Impemeg̵uwè din dutun te menge etew is menge mezaat he mulin-ulin he ebpenlalung kandan ne midhimu zin he mekeahà is mezakel he menge lakap.

Lucas 7:22

Ne migkeg̵iyan ni Jesus haazà is menge sug̵ù ni Juan te, “Likù kew en diyà te ki Juan ne tudtula niw ziyà te kandin is nengeehè niw he mid-ulaula ku wey ke hengkey is nezineg niw he migkag̵i ku. Iyan niw tudtula kandin he tenged kedì ne ebpemekeehè en is menge lakap ne ebpemekehipanew en is menge piang; nengeulian en is menge it-iten wey ebpemekezineg en is menge vengel. Mibanhew ku is nemematey wey impesavut ku ziyà te menge egkengeayuayu is Meupiya he Tudtulanen.

Lucas 8:1

Nepipira pa zutun he andew ne mibeyaan ni Jesus is mezakel he menge inged, dekelà wey se zeisek, ne impesavut din te menge etew zutun is Meupiya he Tudtulanen mehitenged te kedhedii te Megbevayà te menusiyà. Ne sikan is sepulù wey zezuwa he sumusundan din, miduma zan daan kandin.

Lucas 9:11

Ne netuenan te nerivurun he mezakel he menge etew he midhipanew ensi Jesus ne nemenelukun dan. Ne migalewg̵alew sikandan ni Jesus ne impesavut din kandan is mehitenged te kedhadì te Megbevayà ne mibpemewian din daan is menge etew zutun te minsan hengkey he ebpenggezamen dan.

Lucas 9:60

Ne midtavak si Jesus dutun te etew te, “Iyan nu ipeleveng te menge minatey sikan is wazà mekezawat te untung he wazà pidtemanan su iyan ku ibpeveelan kenikew is kebpenudtul te Meupiya he Tudtulanen te kedhedii te Megbevayà te menge etew.”

Juan 18:20

Ne midtavak si Jesus te, “Wazà mekeeles is menge penurù ku ziyà te menge etew su ziyà a mebpenurù te menge simbahan wey ziyà daan te Valey te Megbevayà he egketig̵uman te tivuuk he kehudiyuwan. Wazè ku ieles is minsan hengkey he lalag ku.

Juan 6:59

Iyan heini impenurù ni Jesus dutun te simbahan te menge Hudiyu ziyà te inged he Kepirnaum.

Juan 7:1

Ne hein nepasad ni Jesus haazà is kebpenurù midhendiyà sikandin te prubinsya he Geliliya ne zutun sikandin medrig̵urig̵u. Kenà egkesuat he edrig̵urig̵u ziyà te prubinsya he Hudiya su is menge punuan he menge Hudiyu zutun, ne edhimatey pezem kandin.

Nengeulaula 10:38

Si Jesus he tigNeserit, mibpeulinan sikandin te Megbevayà te Wag̵as he Mulin-ulin ne mibeg̵ayan sikandin te zekelà he g̵ehem. Ne mid-eneb din is menge inged ne meupiya is baal zin diyà te menge etew ne nengeulian din is langun he edlelungen ni Setanas. Neveelan din heini su kenà edsuwey kandin is Megbevayà.

Nengeulaula 18:4

Ne kada Sebadu edhendiyà si Pablo te menge simbahan te menge Hudiyu is ebpekidlewanà su wey mesavut te menge Hudiyu wey menge Gerisyahanen he tutuu is ibpenurù din.

Nengeulaula 20:25

Midtukid ku sikiyu weliyi te kedhadì te Megbevayà Ne g̵untaan netuenan ku en he kenà ad maan keniyu egkeahà.

Nengeulaula 28:31

Impesavut din kandan ke egkemenumenu is kedhadì te Megbevayà ne impenurù din daan ke hentei is Nengazen tew he si Jesu Kristu. Ne wazè din ieles is kebpenurù din ne wazà daan midawey kandin.

Ruma 10:15

Ne wey zà egkehimu is ebpenudtul ke edsug̵uen sikandin te Megbevayà. Ne zuen iyan midsug̵ù te Megbevayà su iring te migkag̵i ziyà te insurat he Lalag te Megbevayà he “Utew igkeg̵alew is kebpekeuma te menge etew he edsangyew te Meupiya he Tudtulanen.”