Mateo 28:19 - Manobo Western Bukidnon

¹⁹ Umba, penhipanew kew en diyà te minsan hendei wey niw metukid te ebpesavut is langun he menge etew ziyà te langun he menge inged. Ne penurua niw he medsundan dan kedì. Pemewtismuwi niw sikandan wey metueni he nekidsevaha zan te Amey tew he Megbevayà, wey siak is Anak din, wey is Wag̵as he Mulin-ulin.

Mateo 28:19 Кръстосани препратки

Mateo 13:52

Ne mid-uman megkag̵i si Jesus te, “Ne tenged kayi,” ke sikandin, “ke zuen menunudlù te kesug̵uan he nekesundan te hadì tew he Megbevayà, ebpekeiring sikandin te etew he zekelà is ketig̵eyunan din diyà te valey zin. Su kenà iyan dà igkepenurù din is kinezaan, kekenà, igkepenurù din daan is beg̵u.”

Mateo 25:32

Ebpekeetuvang kedì is tivuuk he menusiyà. Ne zutun edtepizen ku sikandan te zezuwa he vahin iring te kedtepiza te bekidu zuen te menge kambing wey menge kerehidu.

Nengeulaula 1:2

taman en te kebetuna kandin te Megbevayà pehendiyà te langit. Hein midhimetayan si Jesus ne nevanhew, mezakel is paag̵i te kebpaahaa zin te menge epustul te timaan he nevanhew en sikandin. Su seled te kepatan he andew zutun, layun sikandin ebpaahà kandan. Impenurù din kandan is kedhadì te Megbevayà. Ne te wazè pa sikandin betuna pehendiyà te langit, impenurù din daan pinaag̵i te g̵ehem te Wag̵as he Mulin-ulin is ebpeveelan din kandan te menge epustul he zaan he nepilì din.

Nengeulaula 1:8

Iyan,” ke si Jesus, “ebeg̵ayan kew zin te g̵ehem emun egkelumunan kew en te Wag̵as he Mulin-ulin, ne is tudtul te keag̵i ku, idsangyew niw zini te Hiruselim wey id-eneb niw zini te prubinsya he Hudiya wey ziyà daan te prubinsya he Semarya wey minsan hendei zini te egketemanan te kelibutan.”

Nengeulaula 14:21

Ne impesavut ni Pablo wey ni Bernabe is Meupiya he Tudtulanen diyà te menge etew ziyà te Dirbi, ne mezakel zutun is midsundan ki Jesus. Ne zutun mid-ikul zan is imbayè dan ne midlikù dan diyà te inged he Listera, wey ziyà te inged he Ikunya wey Entiyukya he ziyà te prubinsya he Pisidya.

Nengeulaula 2:41

Ne zutun, mezakel is nemeketuu te impesavut kandan ni Pedro ne mibpebewtismu sikandan. Ne zutun he andew neumanan kes menge tumutuu te tetelu he libu.

Nengeulaula 28:28

Ne migkag̵i zaan si Pablo te, “Ibpesavut ku en keniyu he is tudtul te paag̵i te kegkelibriya te Megbevayà te menusiyà, insug̵ù din he ipesavut heini zaan diyà te menge etew he kenà Hudiyu, ne ebpemineg dan mulà.”

Nengeulaula 9:18

Ne zutundutun henduen be te zuen nelekat diyà te mata ni Seulu ne nepuwasan is ked-ehè din. Ne mid-enew ne mibpebewtismu.

Ruma 10:18

Ne siguradu zuen egkag̵i he umba ves wazà meketuu is menge Hudiyu su wazè dan mezineg heini is kebpesavut, iyan, kenà egkehimu he wazè dan mezineg, su zuen insurat he Lalag te Megbevayà he edhenduen te, “Heini is lalag, ne nekeeneb is kebpenudtula kayi te tivuuk he menusiyà ne wazà taman te kedsengyawa kayi,” ke sikandin.

1 Kurintu 15:29

Ne heini pa zaan su emun kenà egkengevanhew is menge minatey, hengkey is pulus dutun te ulaula te menge etew he ebpebewtismu he elili te menge zuma zan he minatey en? Maan is ebpebewtismu zan ke kenà ebenhawen te Megbevayà is menge minatey?

2 Kurintu 13:14

Berakat he ikeg̵ag̵ew kew te Nengazen tew he si Jesu Kristu wey verakat he ipeehè keniyu te Megbevayà he mahal kew ziyà te g̵ehinawa zin wey verakat daan he meheg̵et is upakat niw te Wag̵as he Mulin-ulin. Iyan a si Pablo.

Gelasya 3:27

Su midtuuwan niw si Jesu Kristu, ne nebewtismuwan kew he tuus te sumusundan kew zin, ne tenged dutun insun-ud niw si Kristu, he ke và dà egkeg̵iya, neiringan niw is menge ulaula ni Kristu.

Ipisu 2:18

Tenged te kebpekidsevaha tew ki Kristu, sikami is menge Hudiyu wey sikiyu is kenà menge Hudiyu, ebpekeuvey kiw en ziyà te Amey tew he Megbevayà pinaag̵i te kedtavang te Wag̵as he Mulin-ulin.

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

1 Pedro 3:21

Ne iyan teg̵ialung kayi te wahig is kebewtismu he ebpekelibri kenitew te silut. Ne haazà is kebewtismu, ne kenà iyan is kedlumpiyuwi te lawa tew ziyà te wahig, kekenà, iyan is kedhengyui tew te Megbevayà he maawè din is menge salè tew. Egkehimu heini tenged te mibanhew zin si Jesu Kristu.

1 Juan 5:7

Tetelu is ebpenistig̵us mehitenged ki Jesu Kristu.