Mateo 25:30 - Manobo Western Bukidnon

³⁰ Ne heini is wazè din pulus he sulug̵uen, itimbag niw ziyà te merusirem he utew meziyù diyà te g̵awas. Dutun ne ebpekekulahì wey ebpekengingitel tenged te utew ebpekedsendit.’

Mateo 25:30 Кръстосани препратки

Mateo 13:42

Ne zutun idtimbag sikandan diyà te hapuy ne zutun ebpemekekulahì dan ne ebpemekengingitel zan tenged te utew zan ebpemekedsendit.

Mateo 13:50

Ne is menge lalung, idtimbag dan diyà te hapuy. Ne sikan is menge lalung, ne ebpekekulahì dan wey ebpemekengingitel tenged te utew zan ebpemekedsendit.”

Mateo 22:13

Ne insug̵ù dutun te hadì te menge sulug̵uen din te, ‘Bekusa niw is menge velad wey paa zin ne itimbag niw sikandin diyà te g̵awas, diyà te merusirem he utew meziyù. Ne zutun sikandin ebpekengingitel ne ebpekekulahì tenged te utew sikandin ebpekedsendit.’ ”

Mateo 24:51

Ne haazà he sulug̵uen, edsilutan sikandin dutun te egalen din ne ebeelan diyà te kandin is iring te ebeelan daan diyà te menge etew he tarù is kedtuu zan. Ne zutun ebpekekulahì sikandin ne ebpekengingitel tuus te utew zin kebpekedsendit.”

Mateo 3:10

Is ebpiley te kayu, migkayew en su ebpemilayen din en is minsan hengkey he kayu he kenà meupiya is beg̵as din su wey mevinsuli, he ke và dà egkeg̵iya, is etew he kenà meupiya is ulaula zin, edsilutan sikandin te Megbevayà.

Mateo 5:13

Sikiyu is menge sumusundan ku, iring kew te timus he ibmeupiya te egkeenen su iyan kew ibmeupiya te tivuuk he menusiyà. Iyan, emun egkeawà diyà te timus is taam din wazè en paag̵i he egkehimu te kebpelikua te taam din. Ne wazè en pulus dutun te timus he wazà taam; idtimbag dà ne egketekutakan te menge etew.

Mateo 8:12

Iyan, mezakel zaan he kevuwazan ni Israyil he midteg̵enahan pezem te Megbevayà te ginhedian din, iyan, igketimbag sikandan diyà te merusirem he utew meziyù te ed-ubpaan te Megbevayà. Ne ebpemekekulahì dan is ebpemekengingitel he utew zan ebpemekedsendit.”

Lucas 13:28

Ne zutun,” ke si Jesus, “utew zekelà he erang niw ne ebpemekengingitel kew tenged te utew ibmesakit pezem te g̵ehinawa niw su kenè kew ebpekeragkes dutun te edhedian te Megbevayà, ne ziyà te seled, ne egkeehè niw is menge kepuun niw zengan, ensi Abraham wey sikan is anak din he si Isaak wey sikan is apù din he si Hakub wey elin daan dutun is langun he ebpemeneuven te Megbevayà.

Juan 15:6

Su ke zuen etew he edsuwey kediey, ed-engkezan sikandin iring te subpang he idtimbag wey meg̵angu. Ne is menge subpang he nengeg̵angu, edtig̵umen ne idtimbag diyà te hapuy wey metutung.

Tito 3:14

Ipenurù nu ziyà te menge zuma nu he tumutuu ziyan he kinahanglan he iyan dekelà diyà te g̵ehinawa zan is ked-ulaula zan te meupiya wey zan metevangi is menge edlised. Kenà meupiya ke zuen tumutuu he peg̵ulen su wazà pulus dutun.

2 Pedro 2:17

Ne haazà is menge etew he ebpenurù te tarù, iring sikandan te kalut he nemezahan. Iring sikandan te g̵apun he ebpegwisen te keramag su wazè dan menge pulus. Integ̵ana te Megbevayà is egkeubpaan dan diyà te Impirnu he utew merusirem.

Hudas 1:13

Iring daan sikandan te utew zezekelà he vag̵el ziyà te zag̵at ke zuen bagyu su iring is menge mekeeled-eled he ulaula zan te meremerik he vuràburà he ebpenlepew ziyà te veyvey. Iring sikandan te menge vituen he nekesuwey te hustu he nesevukan dan su kenè en egkeserig̵an is ibpenurù dan. Midteg̵ana te Megbevayà is utew merusirem he egkeubpaan dan te wazà pidtemanan.

Impezayag 21:8

Iyan, sikan is egkehandek he edsundan kedì wey is menge kenà metinumanen, is menge etew he memahawag is ulaula, is menge memumunù, wey is menge meremerik is betasan, is menge keteuwan he etew, wey menge ed-azap te kenà tutuu he Megbevayà wey is langun he teruen he menge etew, iyan egketemanan dan is id-agbur sikandan diyà te ranew he nepenù te egkeregreg he esupri he iyan ikezuwa he kemetayen,” ke sikandin.