Mateo 23:15 - Manobo Western Bukidnon

¹⁵ Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Edlayun kew te zag̵at ne edhipenawen niw is meluag he tanà wey niw mekabig is etew; ne is egkekabig niw, edhimuen niw he tuwas pa he zait sikandin he edsilutan diyà te Impirnu, kenà sikiyu.

Mateo 23:15 Кръстосани препратки

Mateo 23:13

Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Su ke zuen etew he ibeg̵ey zin pezem is gehinawa zin diyà te hadì tew he Megbevayà, kenè niw edtug̵utan, ne kenè niw zaan ibpeveyveyaan is gehinawa niw te Megbevayà.

Mateo 3:7

Ne naahà ni Juan is mezakel he etew he menge Perisiyu wey menge Sedusiyu he edhendiyà te kandin su ebpebewtismu. Ne migkeg̵iyan din sikandan te, “Iring te ulaula te uled is ulaula niw su teruen kew. Maan is edhendini kew? Kunaan niw vuwa ke ebpekeg̵awas kew te silut te Megbevayà.

Mateo 5:22

Ne iyan kedì he penurù is: minsan sikan is egkepauk dà te zuma zin, edhukuman daan sikandin te Megbevayà. Ne sikan is edsulà te zuma zin te, ‘Wazè nu pulus he etew!’ ne egkeuwit sikandin diyà te husayen. Ne sikan is edsulaan din is duma zin he egkag̵i te, ‘Tulebung ka he wazè nu pulus,’ ne zait sikandin he egkeuwit diyà te hapuy te Impirnu.

Mateo 5:29

Ne emun iyan nu igkepenulayi is kewanan he mata nu, lug̵ita nu wey itimbag! Meupiya pa ke wazè nu mata, kenà ke igkeagbur ka ziyà te hapuy he Impirnu is tivuuk he lawa nu.

Juan 8:44

Iyan amey niw si Setanas, ne is egkesuatan te amey niw, iyan daan egkesuatan niw he meveeli niw. Puun pa te puunà ne memumunù en si Setanas. Ne wazè din kelavet te tutuu he tuluuwen su wazà diyà te kandin is minsan hengkey he tutuu. Emun egkag̵i sikandin, ne tarù is lalag din su tarù dà is egkeisip din. Teruen man sikandin wey ziyà te kandin ebpuun is minsan hengkey he tarù.

Nengeulaula 13:10

ne migkeg̵iyan din te, “Iring ka ki Setanas he ebpenlimbung. Utew ka lalung ne kuntada ka te minsan hengkey he meupiya. Su is Lalag te Nengazen he utew hustu, egkeg̵iyen nu he tarù.

Nengeulaula 13:43

Ne zutun te ked-awè dan puun te simbahan, mezakel is menge etew he nemenduma ki Pablo wey ki Bernabe. Elin dutun is menge Hudiyu wey kenà menge Hudiyu he edsimba zuma te menge Hudiyu. Mibpekibitiyara kandan ensi Pablo. Ne midsembag̵an dan sikandan he kenè dan engkezi is kedsarig dan te g̵ag̵ew te Megbevayà.

Nengeulaula 14:19

Ne nekeuma is menge Hudiyu he tig-Entiyukya ziyà te prubinsya he Pisidya wey elin dutun is menge Hudiyu he tig-Ikunya. Midhimu zan he mengepauk engki Pablo haazà is menge etew. Midtuleng dan si Pablo te vatu ne miguyud dan in-awà dutun te inged su kunaan dan ke minatey en.

Nengeulaula 14:2

Ne sikan is menge Hudiyu he wazà medtuu, midhimu zan he mengepauk te menge tumutuu is kenà menge Hudiyu.

Nengeulaula 17:13

Ne sikan is menge tigTiselunika he menge Hudiyu, hein nezineg dan he impesavut daan ni Pablo is Lalag te Megbevayà dutun te inged he Biriya, midhendutun dan ne midhimu zan he mengepauk engki Pablo is mezakel he menge etew.

Nengeulaula 2:10

menge tigPrigya, menge tigPempilya, menge tig-Ihiptu wey ebpemuun te menge inged diyà te Libya he uvey te Sirini. Ne zuen daan dini minsan menge tigRuma he menge Hudiyu wey kenà menge Hudiyu he nemeketuu zaan te tinuuwan te menge Hudiyu.

Nengeulaula 6:5

Ne hein nezineg haazà te menge tumutuu, nengesuat dan dutun te sambag te menge epustul. Ne mibpilì dan si Esteban. Ne si Esteban, utew mezesen is kedtuu zin wey nepurung sikandin ulini te Wag̵as he Mulin-ulin. Ne elin dutun te nepilì dan si Felipe, si Pukuru, si Nikenur, si Timen, si Perminas, wey si Nikulas he tig-Entiyukya. Ne haazà si Nikulas, kenà Hudiyu, iyan, neketuu zengan te tinuuwan te menge Hudiyu.

Gelasya 4:17

Haazà is menge etew he kenà tutuu is ibpenurù dan keniyu, ebpurungan kew zan, iyan, kenà meupiya is tuyù dan diyan te keniyu. Egkesuatan dan he maawà is upakat niw kediey su wey iyan niw zà sikandan mepurungi.

Gelasya 6:12

Ne sikan is menge etew he egkesuatan dan he mebpesirkunsidar kew, egkesuatan dan he zelig̵a zan te menge zuma zan. Egkehandek dan te menge zuma zan he Hudiyu su kenè dan egkesuat he pesipelahi sikandan tenged te kedsarig dan te kebpehimatey ni Kristu.

Ipisu 2:3

Ne sikitew zaan, elin kiw zengan ebpen-ulaula te mezaat sumalà is mezaat he kebayà te lawa tew, wey is mezaat he isip tew. Ne tenged kayi neragkes kiw pa zutun te silut iring te zuma he menusiyà he kenà sakup te Megbevayà.